រាជធានីភ្នំពេញ៖  មុខសញ្ញាចែកចាយថ្នាំញៀនយ៉ាងសកម្មម្នាក់ ត្រូវបានកម្លាំងសមត្ថកិច្ចខណ្ឌឬស្សីកែវ បើកការស្រាវជ្រាវរហូតឈានដល់ការចុះឃាត់ខ្លួនបានជាក់ស្តែងនៅចំណុច ផ្សារផ្លាហ្សា បន្ទប់ជួលលេខ២២ ផ្លូវលំ ក្រុម៣ ភូមិឡកំបោរ សង្កាត់ស្វាយប៉ាក កាលពីវេលាម៉ោង ១២ និង០០នាទីរំលងអាធ្រាត្រឈានចូលថ្ងៃទី២៩ ខែមេសា ឆ្នាំ២០១៧ ។

ជនសង្ស័យមានឈ្មោះ ង្វៀង យាំងទៀង ភេទប្រុស អាយុ២៩ឆ្នាំ ជនជាតិវៀតណាម ស្នាក់នៅបន្ទប់ជួលលេខ២២ ក្រុម៣ ភូមិឡកំបោរ សង្កាត់ស្វាយប៉ាក ។

អធិការនគរបាលខណ្ឌឬស្សីកែវ លោកវរសេនីយ៍ឯកទៀង ច័ន្ទសារ បានប្រាប់អោយដឹងថា មុនឈានដល់ការចុះបង្ក្រាប កម្លាំងនគរបាលជំនាញ បានបើកការស្រាវជ្រាវតាមដានរហូត ទទួលដំណឹងពីទីតាំងលាក់ខ្លួនរបស់ជនសង្ស័យ កម្លាំងសមត្ថកិច្ចបានបើកប្រតិបត្តិការចុះបង្ក្រាបទាំងរំលងអាធ្រាត្រតែម្តង និងឃាត់ខ្លួនបានជនសង្ស័យជាក់ស្តែង រួមជាមួយវត្ថុតាងថ្នាំញៀនមួយចំនួន ។

ក្នុងការចុះបង្ក្រាប សមត្ថកិច្ចដកហូតបាន  ម្សៅក្រាមសថ្លា ហៅម៉ាទឹកកក ១០កញ្ចប់ធំ ជញ្ជីងថ្លឹងគ្រឿងញៀនចំនួន០១គ្រឿង ថង់ប្លាស្ទិចសំរាប់ច្រកមួយចំនួន, រួមជាមួយឧបករណ៍សំរាប់ប្រើប្រាស់គ្រឿងញៀនមួយចំនួនធំផងដែរ ។

បច្ចុប្បន្នជនសង្ស័យនិងវត្ថុតាងត្រូវបានបញ្ចូនទៅអធិការដ្ឋាននគរបាលខណ្ឌឬស្សីកែវ ដើម្បីឃុំខ្លួនបណ្តោះអាសន្នរងចាំកសាងសំណុំរឿង បញ្ចូនទៅតុលាការ ចាត់ការទៅតាមផ្លូវច្បាប់ នៅពេលក្រោយ ៕

លោក ទៀង ច័ន្ទសារ បានបន្តថា ដើម្បីបន្តការស្រាវជ្រាវរកបក្សពួក និងបណ្តាក្រុមផ្សេងៗលោកបានជំរុញដល់កម្លាំងក្រោមឱវាទក្នុងការអនុវត្តន៍តាមអនុសាសន៍ដឹកនាំដ៏ខ្ពង់ខ្ពស់របស់ឯកឧត្តមនាយឧត្តមសេនិយ៍ជួន សុវណ្ណ កម្លាំងជំនាញខណ្ឌ ប៉ុស្តិ៍បន្តធ្វើការស្រាវជ្រាវដើម្បីបើកការបង្ក្រាបជាប់ជាប្រចាំ ៕ លីហេង                       

• បង្ក្រា
• មុខសញ្ញា
• ថ្នាំញៀន
• ឬស្សីកែវ