ខេត្តប៉ៃលិន៖  បើតាមប្រភពពីប្រជាពលរដ្ឋ និងមន្ត្រីអនុរក្ស បានប្រាប់ខ្សឹបប្រាប់ថា មួយរយៈពេលចុងក្រោយថ្មីៗនេះព្រៃឈើនៅក្នុងដែនតំបន់អភិរក្សជាច្រើនកន្លែងជាប់នឹងស្រុកសំឡូត ខេត្តបាត់ដំបង ត្រង់ចំនុចភ្នំដំបង និងអូរស្លេវ ដែលស្ថិតនៅក្នុងភូមិភ្នំដំបង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ត្រូវបានប្រជាពលរដ្ឋនិងមន្ត្រីខិលខូចមួយចំនួនបាននាំគ្នាយកម៉ាស៊ីនត្រង់ស៊ីន័រ ទៅលួចកាប់ផ្តួលរំលំ ដើម្បីយកដីធ្វើជាកម្មសិទ្ធផ្ទាល់ខ្លួន ហើយមន្រ្តីអភិរក្សសត្វព្រៃ និងព្រៃឈើតំបន់ប្រើប្រាស់ច្រើនយ៉ាងសំឡូត-ប៉ៃលិន ហៅកាត់ថា MJP និងមន្ត្រីអនុរក្សរបស់មន្ទីរបរិស្ថានខេត្តប៉ៃលិនមិនអាចទប់ស្កាត់បានឡើយ ដោយលើកយកហេតុផលដោះសារយករួចខ្លួនរៀងៗខ្លួន។

បើតាមប្រភពព័ត៌មានពីលោក ចាន់ សុជាតិ អនុប្រធានផ្នែកអនុវត្តន៍ច្បាប់ នៃមន្រ្តីអភិរក្សសត្វព្រៃនិងព្រៃឈើនៅតំបន់ប្រើប្រាស់ច្រើនយ៉ាងសំឡូតបានឱ្យដឹងថា រហូតមកដល់ពេលនេះ ដើមឈើតូចធំជាច្រើនដើមនៅក្នុងដែនអភិរក្សសត្វព្រៃនិងព្រៃឈើតំបន់ប្រើប្រាស់ច្រើនយ៉ាងសំឡូត-ប៉ៃលិន ដែលក្រុមការងាររបស់លោកសហការជាមួកម្លាំងសមត្ថកិច្ចពាក់ព័ន្ធ តែងតែខិតខំប្រឹងប្រែងយកចិត្តទុកដាក់ដើរល្បាតនិងថែរក្សាកន្លងមកនោះត្រូវបានប្រជាពលរដ្ឋនិងមន្ត្រីខិលខូចមួយចំនួន រស់នៅតំបន់ស្លេវស្រុកសំឡូត ខេត្តបាត់ដំបង និងពលរដ្ឋរស់នៅក្នុងភូមិភ្នំដំបង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន បាននាំគ្នាលួចយកម៉ាស៊ីនទៅកាប់រលំដីព្រៃរាប់សិបហិកតា ឈ្លៀតពេលដែលមន្ត្រីរបស់លោក សម្រាកថ្ងៃបុណ្យ ឬថ្ងៃឈប់សម្រាកពីការងារ។

លោកបានបន្តថាក្រុមការងាររបស់លោក កំពុងស៊ើបរកមេខ្លោងដែលបំផុសបំផុលនាំប្រជាប្រជាពលរដ្ឋមកកាប់ទន្ទ្រានដីព្រៃអភិរក្សនេះដើម្បីកសាងសំណុំរឿងបញ្ជូនមកតុលាការ។

ចំណែកលោក គឹម សុខា ប្រធានមន្ទីរបរិស្ថានខេត្តប៉ៃលិន បានឱ្យដឹងថា៖ លោក បានទទួលព័ត៌មាននេះហើយ កាលពីប៉ុន្មានថ្ងៃកន្លងមកនេះ ពាក់ព័ន្ធនឹងពលរដ្ឋមួយចំនួន បានលួចកាប់ព្រៃឈើនៅក្នុងតំបន់អភិរក្សប្រើប្រាស់ច្រើនយ៉ាងសំឡូត-ប៉ៃលិន។លោកបានបន្តថា៖ ដោយសារក្រុមមន្ត្រីអភិរក្សរបស់មន្ទីរបរិស្ថានខេត្ត មានគ្នាតិច គឺប្រមាណជា ២០នាក់ ប៉ុណ្ណោះ ហើយមិនមានកញ្ចប់ថវិកាបេសកកម្មមិនគ្រប់គ្រាន់ ក្នុងការចុះល្បាតជាប្រចាំនោះទេ ដោយដីព្រៃអភិរក្សមានទំហំធំ គឺខាងលោកចុះល្បាតបានត្រឹមតែម្តង រឺ២ដង ក្នុង១ខែ ដូច្នេះហើយបានជាក្រុមជនខិលខូចអាចលួច ចូលកាប់ទន្ទ្រានដីព្រៃនេះ ដើម្បីយកមកធ្វើជាកម្មសិទ្ធបាន។

លោកបានបញ្ជាក់ថា៖ នៅពេលខាងមុខ លោកនឹងរៀបកម្លាំងឱ្យឈរជើងជាប្រចាំនៅតាមគោលដៅ ឬតំបន់ដែលមានការលួចកាប់បំផ្លាញតែម្តង ជាពិសេសគឺដាក់កម្លាំងត្រួតពិនិត្យតាមច្រកចេញចូលក្នុងតំបន់នោះតែម្តង។

គួរបញ្ជាក់ថា៖ បើតាមរបាយការណ៍របស់អង្គភាព អភិរក្សសត្វព្រៃ និងព្រៃ ឈើ តំបន់ ប្រើប្រាស់ច្រើនយ៉ាងសំឡូត-ប៉ៃលិន ហៅកាត់ថា MJP ដែលឧបត្ថម្ភដោយថវិកា ដោយ លោកស្រី អែនជូលីណា ចូលី ជូលីភីត បានឱ្យដឹងថា៖ តាមអនុក្រឹត្តឆ្នាំ១៩៩៣ ផ្ទៃដីអភិរក្ស តំបន់ប្រើប្រាស់ច្រើនយ៉ាងសំឡូត-ប៉ៃលិន មានផ្ទៃដីប្រមាណជា ៦ម៉ឺនហិចតា ហើយនៅ ពេលបច្ចុប្ចន្ន នៅសល់តែប្រមាណជាង ៤ម៉ឺនហិចតាតែប៉ុណ្ណោះ ដោយសារក្រសួងបរិស្ថាន បានកាត់ ចេញខ្លះនៅឆ្នាំ២០១៣ និងនៅសល់ខ្លះទៀតប្រជាពលរដ្ឋ បានកាប់ទន្ទ្រាន យកដីដើម្បីមកធ្វើការងារកសិកម្ម។                                         

• ព្រៃឈើ
• ប៉ៃលិន
• អភិរក្ស
• ហិនហោច