ខេត្តប៉ៃលិន៖  ព្រឹកថ្ងៃទី២៨ ខែមេសា ឆ្នាំ២០១៧ នៅសាលប្រជុំធំសាលាខេត្តប៉ៃលិន មានរៀបចំសន្តិបាតបូកសរុបការងាររបស់ក្រុមប្រឹក្សាឃុំ សង្កាត់អាណត្តិទី៣ ខេត្ត ក្រោមអធិបតីភាព លោក ឡី ចាន់ឆាយ ប្រធានក្រុមប្រឹក្សាខេត្ត លោក កើត សុធា អភិបាលនៃគណៈអភិបាលខេត្តប៉ៃលិន ព្រមទាំងមានការអញ្ជើញចូលរួមពីសមាជិកក្រុមប្រឹក្សាខេត្ត  លោក លោកស្រីអភិបាលរងខេត្ត ស្រុក ក្រុង រដ្ឋបាលខេត្ត ក្រុង ស្រុក លោកអភិបាលក្រុង ស្រុក កងកម្លាំងប្រដាប់អាវុធទាំងបីស្ថាប័ន លោក លោកស្រីប្រធាន អនុប្រធានមន្ទីរជុំវិញខេត្ត ក្រុមប្រឹក្សាឃុំ សង្កាត់ មេឃុំ ចៅសង្កាត់ ស្មៀនឃុំ សង្កាត់ និងតំណាងអង្គការសង្គមស៊ីវិល ព្រមទាំងវិស័យឯកជន សរុប១៩១នាក់ ។

ការបើកសន្តិបាតបូកសរុបការងាររបស់ក្រុមប្រឹក្សាឃុំ សង្កាត់នាពេលនេះ ក្នុងគោលបំណងបង្ហាញសមិទ្ធផលការងារសំខាន់ៗ សម្រេចបានដោយក្រុមប្រឹក្សាឃុំ សង្កាត់អាណត្តិទី៣ ,មេរៀន និងបទពិសោធន៍ការងារល្អៗ របស់ក្រុមប្រឹក្សាឃុំ សង្កាត់អាណត្តិទី៣ និងបញ្ហាប្រឈម ព្រមទាំងអនុសាសន៍នានារបស់ក្រុមប្រឹក្សាឃុំ សង្កាត់អាណត្តិទី៣ ដើម្បីដោះស្រាយនិងកែលម្អសម្រាប់ក្រុមប្រឹក្សាឃុំ សង្កាត់អាណត្តិទី៤ ។

ថ្លែងក្នុងការបើកសន្តិបាតបូកសរុបការងាររបស់ក្រុមប្រឹក្សាឃុំ សង្កាត់អាណត្តិទី៣ លោក កើត សុធា អភិបាលនៃគណៈអភិបាលខេត្តប៉ៃលិន មានប្រសាសន៍ថា ដោយអនុលោមតាមច្បាប់ស្តីពីការគ្រប់គ្រងរដ្ឋបាលឃុំ សង្កាត់ និងអនុក្រឹត្យលេខ២២អនក្រ.ប្រក ចុះថ្ងៃទី២៥ ខែមិនា ឆ្នាំ២០០២ ស្តីពីការធ្វើវិមជ្ឍការអំណាច តួនាទី និងភារកិច្ចឲ្យទៅក្រុមប្រឹក្សាឃុំ សង្កាត់ នោះ ដូច្នោះក្រុមប្រឹក្សាឃុំ សង្កាត់ត្រូវមានគណនេយ្យភាព ចំពោះប្រជាពលរដ្ឋទាំងអស់នៅក្នុងដែនសមត្ថកិច្ចរបស់ខ្លួន និងចំពោះរាជរដ្ឋាភិបាលផងដែរ ។ លោកមានប្រសាសន៍បន្តថា៖ យោងតាមបទបញ្ញតិនេះ ក្រុមប្រឹក្សាឃុំ សង្កាត់នៃអាណត្តិនិមួយៗ ត្រូវធ្វើសេចក្តីរាយការណ៍ អំពីសមិទ្ធផលទាំងអស់ ដែលសម្រេចបាននៅក្នុងអាណត្តិរបស់ខ្លួន ជួនប្រជាពលរដ្ឋនៅក្នុងដែនសមត្ថកិច្ច ដែលខ្លួនគ្រប់គ្រង និងរាជរដ្ឋាភិបាល ។ មានប្រសាសន៍បញ្ចប់ការបើកកម្មវិធីសន្តិបាត លោក កើត សុធា អភិបាលខេត្ត បានជំរុញឲ្យមន្ត្រីធ្វើអត្រានុគោលដ្ឋាន សៀវភៅគ្រួសារ ត្រូវពង្រឹងការងារ របស់ខ្លូនឲ្យបានល្អ ព្រោះកន្លងមក ប្រជាពលរដ្ឋមានបញ្ហាច្រើន ពាក់ព័ន្ធការយឺតយ៉ាវក្នុងការធ្វើសំបុត្របញ្ជាក់កំណើត សៀវភៅគ្រួសារ នៅក្នុងមូលដ្ឋានរបស់ខ្លួនផងដែរ ៕អត្ថបទ សេង សុវណ្ណារិទ្ធ

• សន្តិបាត
• ខេត្តប៉ៃលិន
• ក្រុមប្រឹក្សា