រាជធានីភ្នំពេញ៖ ​ រថយន្តតូយូតា ១បាំងកន្លះ មួយគ្រេឿងបានក្រឡាប់ផ្ញារជើងច្រងាង នៅចំណុចគល់ស្ពានព្រះមុន្នីវង្សថ្មី បងនកការកកស្ទះជិត១ម៉ោង បន្ទាប់ពីម្ចាស់រថយន្តបើករថយន្តចុះពីស្ពានលេឿន ដាច់ហ្វ្រាំងរេចង្កូតទៅបុកផ្ទប់នឹងរបាំងថ្មសួនច្បារពេញទំហឹងបណ្តាលអោយក្រឡាប់តែម្តង តែសំណាងល្អ មិនមានបង្កគ្រោះថ្នាក់ដល់អ្នកដទៃ ។ ហេតុគ្រោះថ្នាក់នេះកើតឡើងកាលពីវេលាម៉ោង ១៣ និង ៣០នាទីរសៀលថ្ងៃទី ៩ ខែវិច្ឆិកា ឆ្នាំ២០១៦ នៅចំណុចគល់ស្ពានព្រះមុន្នីវង្សថ្មី ស្ថិតក្នុងសង្កាត់ច្បារអំពៅទី១ ខណ្ឌច្បារអំពៅ ។

តាមប្រភពព័ត៌មាននៅកន្លែងកើតហេតុ អោយដឹងថា ដំបូងឡើយនៅចំណុចលើស្ពានព្រះមុន្នីវង្សថ្មី គិតចាប់ពីស្ពានអាកាសក្បាលថ្នល់ មកដល់ចំណុចខាងលើគឺមានការកកស្ទះជាខ្លាំង ដោយសារមានម៉ូតូ និងយានយន្តធ្វើដំណើរឆ្លងកាត់ច្រើន ។ នៅវេលាខាងលើ មានរថយន្តមួយគ្រេឿងម៉ាកតូយ៉ូតា១បាំងកន្លះ ពណ៌ខ្មៅ ពាក់ស្លាកលេខ កណ្តាល 2A-4188 បើកបរដោយបុរសម្នាក់ ដោយសារមានការខឹងនឹងស្ថានភាពផ្លូវស្ទះខ្លាំងពេក ខណះធ្វើដំណើរមកដល់គល់សភាពផ្លូវមានលក្ខណះទូលាយ ក៏បានចុះពីស្ពានមកទាំងកំរោល ពេលនោះរថយន្តស្រាប់តែត្រូវដាច់ហ្វ្រាំងជាន់ស៊ី ដោយខ្លាចមានការប៉ះពាល់ដល់អ្នកដទៃម្ចាស់រថយន្តសម្រេចបួងចង្កូតរថយន្តទៅបុកផ្ទប់នឹងរបាំងថ្មសួនច្បារពុះចែកទ្រូងផ្លូវពេញទំហឹងតែម្តង បណ្តាលអោយរថយន្ត ត្រូវក្រឡាប់ផ្ញារជើងឡើងលើម្ខាង ។ ភ្លាមៗម្ចាស់រថយន្តបានបើកទ្វារចេញមកក្រៅ ទំនាក់ទំនងគ្នីគ្នាអោយមកទទួលយកទៅបាត់ស្រមោល ។

សូមបញ្ជាក់ពេលកើតហេតុ នៅចំណុចស្ពានព្រះមុន្នីវង្សថ្មី នៅមានការកកស្ទះជាខ្លាំងដដែល ព្រោះស្ថានភាពចរាចរណ៍ពីសំណាក់បងប្អូនប្រជាពលរដ្ឋមានលំហូរចូលមកច្រើន ។ ដោយឡែករថយន្តដែលក្រឡាប់ ពុំបានប៉ះពាល់ធ្ងន់ធ្ងរដល់ការធ្វើដំណើររបស់ពលរដ្ឋ នោះឡើយ។ សូមបញ្ជាក់បន្ថែមថា ក្នុងករណីខាងលើនេះ គឺពុំបានបង្កគ្រោះថ្នាក់ ឬរងរបួសដល់អ្នកដទៃផ្សេងឡើយ គ្រាន់តែជាការធ្វេសប្រហែសរបស់អ្នកបើកបររថយន្តប៉ុណ្ណោះ ។

ក្រោយពេលកើតហេតុ សមត្ថកិច្ចមូលដ្ឋានសហការជាមួយជំនាញចុះអន្តរាគមន៍វាស់វែង ស្ទូចយករថយន្តខាងលើទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ រងចាំម្ចាស់ចូលខ្លួនមកដោះស្រាយតាមច្បាប់នៅពេលក្រោយ ៕                                                                        

• បើកលឿន
• ដាច់ហ្វ្រាំង
• ក្រឡាប់ផ្ញារជើង
• ព្រះមុនីវង្សថ្មី