រាជធានីភ្នំពេញ ៖  របាំងថ្មពុះចែកទ្រូងផ្លូវចំនួន ៥កង់ ត្រូវបានបាក់រប៉ាត់រប៉ាយចេញពីគ្នា រងការ ខូចខាត បន្ទាប់ពីមានបុរសម្នាក់បើករថយន្តដឹកចំណីសត្វមួយគ្រឿង ប្រភេទមួយបាំងកន្លះ ក្នុងល្បឿន លឿនមិនប្រយ័ត្ន បណ្តាលអោយរេចង្កូតបុកផ្ទប់របាំងថ្មចំពីមុខទាំងកំរោល ។ ហេតុការណ៍គ្រោះថ្នាក់ ចរាចរណ៍នេះកើតឡើងកាលពីវេលាម៉ោង ៦ និង ៣០នាទីព្រឹកថ្ងៃទី ១៣ ខែមិនា ឆ្នាំ២០១៦ នៅតាម បណ្តោយផ្លូវជាតិលេខ ២ ទល់មុខអគ្គីសនីកម្ពុជា  ស្ថិតក្នុងភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។

តាមប្រភពព័ត៌មានពីសាក្សីដែលបានឃើញហេតុការណ៍ បានប្រាប់អោយដឹងថា ដំបូងឡើយ គេសង្គេត ឃើញបុរសម្នាក់ បើករថយន្តបង្កខាងលើ ជាប្រភេទរថយន្តនីសាន់ ១បាំងកន្លះ ដឹកចំណីសត្វ ពណ៌ស ពាក់ស្លាកលេខ ឃ ២១៣៣ ភព២ បើកបរធ្វើដំណើរតាមបណ្តោយផ្លូវជាតិលេខ២ ក្នុងទិសដៅពីជើង ទៅត្បូង ក្នុងល្បឿនយ៉ាងលឿន លុះមកដល់ចំណុចកើតហេតុ ក៏បានរេចង្កូតជ្រុលបុកផ្ទប់នឹងក្បាលនាគ ពុះចែកទ្រូងផ្លូវពេញទំហឹង បណ្តាលអោយរបាំងថ្មចំនួន ៣កង់ ត្រូវរងការខូចខាតដាច់ចេញពីគ្នា ចំណែក រថយន្តបង្កត្រូវដាច់ក្រឡេកង់ខាងមុខផ្នែកខាងឆ្វេងមិនអាចបន្តដំណើរទៅមុខទៀតបាន ។ ភ្លាមៗ បុរសជាម្ចាស់រថយន្តបង្កបានបើកទ្វារចេញមកខាងក្រៅ រួចរត់គេចខ្លួនបាត់ស្រមោលសូន្យ ។

ក្រោយពេលកើតហេតុ សមត្ថកិច្ចមូលដ្ឋាន បានសហការជាមួយជំនាញ ចុះអន្តរាគមន៍ធ្វើការវាស់វែង ស្ទូចយករថយន្តបង្កទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានី ភ្នំពេញ រងចាំដោះស្រាយទៅតាមផ្លូវច្បាប់នៅពេលក្រោយ ។

សូមបញ្ជាក់ថា ក្នុងហេតុការណ៍គ្រោះថ្នាក់ចរាចរណ៍ខាងលើនេះ គឺមិនបានបណ្តាលអោយមានមនុស្ស ណាម្នាក់ត្រូវរងរបួសឡើយ គឺគ្រាន់តែម្ចាស់រថយន្តបង្កបើកបរក្នុងល្បឿនលឿន ខ្វះការប្រុងប្រយ័ត្នខ្ពស់ តែប៉ុណ្ណោះ ទើបបង្កអោយមានរឿងហេតុបែបនេះកើតឡើងតែម្តងទៅ ៕

• រថយន្ត
• បើកលឿន