រាជធានីភ្នំពេញ៖  ខ្សែរឿងបែបកំប្លែងថ្មីមួយទៀត របស់ផលិតកម្មកេសារា បានដាក់ពិធីសម្ពោធដាក់បញ្ចាំងរឿងមានចំណងជើងថា «រូហ្សា៥ Rosa5»  បែបកំប្លែងសើចចុកពោះជាអំណោយដល់មហាជន។ ការរៀបចំនេះកាលពីល្ងាចថ្ងៃទី៤ ឧសភា ឆ្នាំ២០១៧នារោងភាពយន្តមេជើស៊ីណើផ្លិចបាយសែលកាតក្នុងផ្សារអ៊ីអនរាជធានីភ្នំពេញដោយមានតារាជាច្រើនចូលរួម។

អ្នកស្រី សរ កេសរ៉ា ចាងហ្វាងផលិតកម្ម និងជាអតីតអ្នកសម្តែងតាំងពីជំនាន់ចាស់ និយាយថា រឿង «រូហ្សា៥» រៀបចំពិធីដាក់សម្ពោធជាផ្លូវការនៅថ្ងៃទី៤ ខែឧសភា ឆ្នាំ២០១៧នារោងភាពយន្តទំនើបស្ថិតក្នុងផ្សារអ៊ីអនម៉ល ដោយមានតារាល្បីៗជាច្រើនសម្តែងក្នុងផ្ទៃរឿង ព្រមជាមួយតារាកំប្លែងពេញនិយម ដូចជា ប៉ុបពី យេយេ ផេងខេក ជាដើម។ ស្នាដៃរឿងនេះ បានសម្រិតសម្រាំងយ៉ាងលម្អិតដើម្បីផ្តល់សំណើចដល់បងប្អូនមហាជនទាំងអស់ ដែលផលិតករបានពាំនាំមកដល់ក្នុងពេលឆាប់ៗនេះ រំពឹងថា ទស្សនិកជននឹងជួយគាំទ្រស្នាដៃរបស់កូនខ្មែរ ដើម្បីលើកស្ទួយវិស័យភាពយន្តខ្មែរ។

អ្នកស្រីបន្តថា ក្រោយដាក់សម្ពោធជាផ្លូវការ លោកស្រីរំពឹងមានបងប្អូននិងមិត្តយុវវ័យចូលរួមទស្សនាទាំងអស់គ្នា ដើម្បីជួយពិនិត្យទាំងចំនុចល្អ និងមិនល្អដើម្បីកែប្រែភាពចន្លោះប្រហោង និងរិះរកចំនុចល្អបន្តទៀតក្នុងវិស័យភាពយន្តខ្មែរ។ អ្នកស្រីប្ដេជ្ញាបញ្ចេញស្នាដៃរឿងថ្មីៗបន្តទៀត ដែលលោកស្រីថា កំពុងតែរៀបចំផលិតយកមកវាយឡុកនៅលើទីផ្សារភាពយន្តសព្វថ្ងៃនេះ ក្នុងន័យឆ្លើយតបនឹងការលើកតម្លៃកុនខ្មែរ៕

• ផលិតកម្ម
• កេសារាស
• រូហ្សា៥