រាជធានីភ្នំពេញ៖  ស្របពេលពិធីបុណ្យប្រពៃណីជាតិខ្មែរដែលនៅសេសល់តែ២សប្តាហ៍ខាងមុនទៀតនឹងចូលមកដល់នោះ លោកឌី រ័ត្នខេមរុណ អភិបាលរងខណ្ឌ និងជាប្រធានអនុសាខាកាកកបាទកម្ពុជាប្រចាំខណ្ឌ នៅវេលាព្រឹកថ្ងៃទី ៣១ ខែមិនា ឆ្នាំ២០១៧នេះ បានបន្តនាំយកអំណោយមនុស្សធម៌របស់សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ចែកជូនដល់ពលរដ្ឋទីទ័លក្រ និងជួបការលំបាកចំនួន ៥០គ្រួសារ ដែលរស់នៅក្នុងសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។

អំណោយចែកជូនពលរដ្ឋ៥០គ្រួសាររួមមាន : អង្ករ១ប៉ាវ ៣០គីឡូក្រាម មី១កេស ទឹកសុទ្ធ១យួរ ទឹកត្រី១យួរ ត្រីខ១យួរ ឃីត១ឈុត ( មុង ភួយ ក្រមា ) និងថវិការក្នុង១គ្រួសារ ២ម៉ឺនរៀលផងដែរ ។

លោកឌី រ័ត្នខេមរុណ អភិបាលរងខណ្ឌមានជ័យ និងជាប្រធានអនុសាខាកាកកបាទក្រហមកម្ពុជាខណ្ឌមានជ័យ បានមានប្រសាសន៍អោយដឹងថា ថ្វីត្បិតតែអំណោយដែលបានចែកជូននៅពេលនេះវាតិចតួចក៏ពិតមែន ប៉ុន្តែក៏អាចជួយដោះទុក្ខលំបាករបស់បងប្អូនមួយកម្រិតផងដែរ ។ លោកប្រធានអនុសាខាបន្ថែមថា ជីវិតរស់នៅត្រូវតែមានការតស៊ូ និងព្យាយាម ចូលបងប្អូនកុំអស់សង្ឃឹម ចំពោះភាពក្រីក្រលំបាករបស់ខ្លួន ពិសេសបងប្អូនដែលជាពិការជន ព្រោះថា គ្មាននណារកើតមកមិនជួបការលំបាកឡើយ ប៉ុន្តែយើងត្រូវជំនះវាអោយបានដើម្បីបន្តជីវិតរស់ទៅមុខទៀត និងដើម្បីមានជីវិតនៅជាមួយក្រុមគ្រួសារ និងមនុស្សជាទីស្រលាញ់ ។

ឈ្លៀតក្នុងឱកាសដដែលនេះ លោកប្រធានអនុសាខា បានមានប្រសាសន៍ ផ្ញើរក្តីនឹករលឹកយ៉ាងក្រៃលែងផងដែរពីសំណាក់សម្តេចកិត្តិព្រឹទ្ធបណ្ឌិតប៊ុនរ៉ានី ហ៊ុនសែន ជូនចំពោះបងប្អូនប្រជាពលរដ្ឋទាំង ៥០គ្រួសារផងដែរ ។ ថ្វីត្បិតតែពេលនេះសម្តេចមិនមានវត្តមាននៅទីនេះពិតប្រាកដមែន ប៉ុន្តែចិត្តរបស់សម្តេចតែងឋិតនៅក្បែរបងប្អូនជានិច្ច ដែលលោកតែងតែក្រើនរំលឹកដល់មន្ត្រីក្រោមឱវាទអោយធ្វើយ៉ាងណា ត្រូវយកចិត្តទុកដាក់ខ្ពស់ទៅលើប្រជាពលរដ្ឋក្រីក្រលំបាក តោកយ៉ាក ចាស់ជរា អ្នកកើតជម្ងឺរុំារៃ និងជាពិសេសជនមានផ្ទុកមេរោគអេដស៍ គឺមិនត្រូវមើលរំលងជាដាច់ខាត ព្រោះសុខទុករបស់ពលរដ្ឋកម្ពុជា គឺជាសុខទុករបស់សម្តេចកត្តិព្រឹទ្ធិបណ្ឌិត ប៊ុនរ៉ានី ហ៊ុនសែន ដូចគ្នា ។

បន្ថែមពីនោះ នាឱកាសបុណ្យចូលឆ្នាំខ្មែរប្រពៃណីជាតិដែលខ្វះតែ២សប្តាហ៍ទៀតនឹងឃិតចូលមកដល់ លោកប្រធានអនុសាខា ក៏សូមធ្វើការអំពាវនាវដល់បងប្អូនទាំង៥០គ្រួសារនៅពេលនេះ ពិសេសបងប្អូននៅក្នុងមូលដ្ឋានខណ្ឌមានជ័យទាំងមូល ធ្វើយ៉ាណាសូមមេត្តាបង្កើនការប្រុងប្រយ័ត្នខ្ពស់បំផុតចំពោះភ្លើងទានធូប នៅតាមលំនៅឋាននីមួយរបស់ខ្លួន មុនចេញទៅណាមកណាសូមពន្លត់វាមុនសិន ពិសេសកុងតាក់អគ្គីសនី ត្រូវបិទវាអោយបានខ្ជាប់ខ្ជួនល្អ ជៀសវៀងកើតមានជាអណ្តាតភ្លើងបង្កអោយមានការឆាបឆេះបំផ្លាញលំនៅឋាន ឬទ្រព្យសម្បត្តិរបស់បងប្អូនដោយយថាហេតុណាមួយ ៕                                                                             

• ឌី រ័ត្នខេមរុណ
• មនុស្សធម៌
• ពលរដ្ឋ