ប្រទេសថៃ ៖ អាកាសយានិកម្នាក់  ដែលជាជនជាតិថៃ  បានរងរបួសយ៉ាងធ្ងន់ធ្ងរ នៅកណ្តាលព្រៃនៃចំការកៅស៊ូ  បន្ទាប់ពីបានខ្ទាតចេញពីយន្តហោះចំបាំងមួយគ្រឿងដែលកំពុងធ្វើការហោះហើរ ដោយរហូតមកទល់នឹងពេលនេះនៅមិនទាន់ដឹងអំពីមូលហេតុនៃការធ្លាក់នេះនៅឡើយទេ ។

បើតាមការផ្សាយរបស់កាសែតដឹលីវ  ដែលជាកាសែតក្នុងស្រុកបានអោយដឹងថានៅវេលាម៉ោង១០ និង៣០ នាទីព្រឹក  ថ្ងៃទី១៥  ខែកុម្ភៈ  ឆ្នាំ២០១៧  ត្រង់ចំណុចខាងជើងភូមិចំរើនសុខ  ក្នុងតំបន់ណាឌិនដាំ  ស្ថិតក្នុងស្រុកមឿង  ខេត្តអ៊ុដនថានីប្រទេសថៃ  មានហេតុការណ៍មួយបានកើតឡើងដោយសារតែមានមនុស្សធ្លាក់ចេញ ពីយន្តហោះ ។

បើតាមការអះអាងពីប្រជាពលរដ្ឋដែលរស់នៅក្នុងតំបន់ខាងលើ  បាននិយាយថានៅមុនពេលកើតហេតុគេបានឃើញយន្តហោះមួយគ្រឿងលេខ F១៦ ដែលជាយន្តហោះ របស់កងទ័ពអាកាស  បានធ្វើការហោះហើរឆ្លងកាត់តំបន់នេះ  ភ្លាមៗនោះដែរក៏ស្រាប់តែ មានអាកាសយានិកម្នាក់ដែលនៅក្នុងយន្តហោះ  បានបើុងខ្ទាតចេញមកខាងក្រៅយន្តហោះហើយក៏បានធ្លាក់មកដី  បើទោះបីជាអាកាសយានិករូបនោះខំប្រឹងបើកឆ័ត្រដើម្បីការពារខ្លួនយ៉ាងណាក៏ដោយក៏សឹងតែហួសពេលដែរ  ព្រោះគេបានធ្លាក់មកជិតដល់ដីទៅហើយដែលធ្វើអោយឆ័ត្រយោងបានទាក់នឹងមែកឈើចំណែកមនុស្សក៏បានធ្លាក់បោកទៅលើដី និងរងរបួសយ៉ាងធ្ងន់ធ្ងរ។ នៅពេលនោះដែរ  ទាំងកំលាំងសមត្ថកិច្ច  ក៏ដូចជាអាជ្ញាធរ  និងប្រជាពលរដ្ឋ  បាននាំគ្នាដឹកជនរងគ្រោះបញ្ជូនទៅកាន់មន្ទីរពេទ្យយ៉ាងប្រញ៉ាប់ប្រញ៉ាល់ដើម្បីសង្គ្រោះ  ព្រោះ សភាពអ្នករបួស កំពុងស្ថិតក្នុងសភាពធ្ងន់ធ្ងរដែលចាំបាច់ត្រូវសង្គ្រោះបន្ទាន់  នៅទីបំផុត ទើបគេស្គាល់ថា  ជនរងគ្រោះមានឈ្មោះ សុខូថៃ សុំសិរីសៃ  ភេទប្រុស  អាយុ៣៦ឆ្នាំជាកងទ័ពអាកាសលេខ២៣  និងជាអាកាសយានិកនៃយន្តហោះ F១៦ ក្នុងខេត្តអ៊ុដនថានីប្រទេសថៃ  ហើយបច្ចុប្បន្នគេនៅមិនទាន់ដឹងថា  តើមូលហេតុអ្វីដែលធ្វើអោយអាកាស យានិករូបនេះត្រូវខ្ទាតចេញពីយន្តហោះនោះឡើយ  ដែលនៅពេលនេះដែរ  ជនរងគ្រោះបានរួចផុតពីសេចក្តីស្លាប់ហើយ  ដោយសារការយកចិត្តទុកដាក់លើការព្យាបាលរបស់ក្រុមគ្រូពេទ្យ ៕

• អាកាសយានិក
• ថៃ
• យន្តហោះ
• ដឹងមូលហេតុ