រាជធានីភ្នំពេញ៖  បុរសជនជាតិអង់គ្លេសម្នាក់ អនិកជនខ្មែរនៅអាមេរិក២នាក់ រួមនិងស្ត្រីខ្មែរម្នាក់ ត្រូវបានក្រុមប្រឹក្សាជំនុំជំរះសាលាដំបូងរាជធានីភ្នំពេញ ប្រកាសសាលក្រមនាព្រឹកថ្ងៃទី ២២ ខែធ្នូ ឆ្នាំ ២០១៦ ផ្ដន្ទាទោសដាក់ពន្ធនាគារក្នុងម្នាក់ពី២ឆ្នាំទៅ៥ឆ្នាំ ក្រោមការចោទប្រកាន់ពីបទរក្សាទុក និងជួញដូរដោយខុសច្បាប់នូវសារធាតុញៀន ។

សាលក្រមនេះបានប្រកាសជាសាធារណៈដោយលោកចៅក្រម លី សុខឡេង ប្រធានក្រុមប្រឹក្សាជំនុំជំរះសាលាដំបូងរាជធានីភ្នំពេញនិងលោក ខាំ សុផារីជាតំណាងអយ្យការ បានសម្រេចផ្ដន្ទាទោស១. លោកPeter Richard gold អាយុ៦៨ឆ្នាំ ជនជាតិអង់គ្លេស ទី២ឈ្មោះ ស៊ីម លី ភេទស្រី អាយុ២៣ឆ្នាំ  ជនជាប់ទាំង២នាក់ត្រូវផ្ដន្ទាទោសដាក់ពន្ធនាគារកំណត់ក្នុងម្នាក់ៗ៥ឆ្នាំ និងពិន័យជាប្រាក់ចូលថវិការដ្ឋ ក្នុងម្នាក់ៗ៦លានរៀល ក្រោមបទចោទរក្សាទុកនិងជួញដូរដោយខុសច្បាប់នូវសារធាតុញៀន តាមមាត្រា ៤០ និងមាត្រា៤៥នៃច្បាប់ស្ដីពីការត្រួតពិនិត្យគ្រឿងញៀនកម្ពុជា ។ជនជាប់ចោទចោទប្រព្រឹត្តកាលពីថ្ងៃទី១០ ខែមករា ឆ្នាំ ២០១៥ នៅក្នុងខណ្ឌដូនពេញ ។

ទី៣.ឈ្មោះ សុវណ្ណ ហូល ហៅឌីជេស៊ប់ អាយុ៥៩ឆ្នាំត្រូវផ្ដន្ទាទោសដាក់ពន្ធនាគារ២ឆ្នាំ និងពិន័យជាប្រាក់ចូលថវិការដ្ឋចំនួន៤លានរៀល ទី៤.ឈ្មោះ អែម សេង ភេទប្រុស ជាអនិកជនខ្មែរនៅអាមេរិក ត្រូវផ្ដន្ទាទោសដាក់ព្ធនាគារ៤ឆ្នាំ និងពិន័យជាប្រាក់ចំនួន៥លានរៀលចូលថវិការដ្ឋ សាលក្រមនេះបានបើកផ្លូវឲ្យជនជាប់ចោទប្ដឹងឧទ្ធរណ៍តាមកំណត់ច្បាប់ ។

សូមរំលឹកថាកាលពីថ្ងៃទី ១០ មករា ឆ្នាំ ២០១៥ សមត្ថកិច្ចខណដូនពេញបានបើកប្រតិបត្តិការបង្ក្រាបអំពើជួញដូរគ្រឿងញៀនមួយនៅក្នុខណដូនពេញ ដោយឃាត់ខ្លួនលោក Peter Richard gold និងសង្សាររបស់គាត់ឈ្មោះសុឹម លី ។ សមត្ថកិច្ចបានរឹបអូសគ្រឿងញៀនមេតំហ្វេតាមីនទំងន់ ៤,៦៩ក្រាមពីក្នុងផ្ទះរបស់គាត់ ។

តាមចម្លើយរបស់ជនសង្ស័យទាំង២នាក់ឆ្លើយថាគ្រឿងញៀនទាំងនេះពួកគេទិញពីឈ្មោះ សុ វណ្ណ ហូល ហៅឌីជាស៊ប់ និងឈ្មោះ អែម សេង សមត្ថកិច្ចបានទៅឆែកផ្ទះពួកគេក៏បានរកឃើញគ្រឿងញៀនទំងន់២, ៧២ក្រាមបន្ថែមទៀត ។

ក្នុងសវនាការកាលពីថ្ងៃទី ២៨ វិច្ឆិកា ឆ្នាំ ២០១៦ ជនជាប់ចោទបានសារភាពខ្លះនិងមិនសារភាពខ្លះនៅក្នុងសំណុំរឿងគ្រឿងញៀននេះ ប៉ុន្តែតំណាងអយ្យការបានតម្កល់បទចោទប្រកាន់លើក្រុមជនត្រូវចោទអោយនៅដដែល ហើយសំណូមពរអោយតុលាការផ្ដន្ឋាទោសតាមច្បាប់ ៕                                               

• តុលាការ
• ផ្ដន្ទាទោស
• ជនជាតិអង់គ្លេស
• អាមេរិក