ស្ថានទូតអាមេរិក និងមជ្ឈមណ្ឌល EducationUSA នឹងរៀបចំ តាំងពិព័រណ៍ប្រចាំឆ្នាំ ឆ្នាំ២០១៦

ព័ត៌មានជាតិ | ថ្ងៃព្រហស្បតិ៍ ទី១៨ កុម្ភៈ ២០១៦, ១៣:១១ | ៦០២ ដង | ចុចបញ្ចេញមតិ (០)

រាជធានីភ្នំពេញ៖ យោងតាមស្ថានទូតអាមេរិកនៅរាជធានីភ្នំពេញនិងមជ្ឈមណ្ឌល អាមេរិក សំរាប់ ការសិក្សាអប់រំនៅសហរដ្ឋអាមេរិក (EducationUSA)បានរួមគ្នារៀបចំពិព័រណ៍ ឆ្នាំ ២០១៦ស្តីពីការសិក្សាអប់រំនៅសហរដ្ឋអាមេរិកនៅថ្ងៃទី១៨ខែកុម្ភៈឆ្នាំ ២០១៦ ពីម៉ោង ៣ រសៀល ដល់ម៉ោង ៧ យប់ នៅសណ្ឋាគារអាំងទែកុងទីណង់តាល់ ក្នុងរាជ ធានីភ្នំពេញ។

តំណាងចំនួន ១៦ រូបមកពីមហាវិទ្យាល័យ និងសាកលវិទ្យាល័យក្នុងសហរដ្ឋអាមេរិកងជំរាបដល់សិស្សនិស្សិតកម្ពុជា ស្តីអំពីកម្មវិធីសិក្សានៅថ្នាក់ឧត្តមសិក្សា លក្ខខ័ណ្ឌទាមទារក្នុងការចុះឈ្មោះចូលរៀន និងឱកាសអាហារូបករណ៍នៅសហរដ្ឋអាមេរិក។

ស្ថាប័ចូលរួមដទៃទៀតនៅក្នុងពិព័រណ៍នេះនឹងផ្តល់ព័ត៌មានស្តីពីទិដ្ឋាការសំរាប់សិស្សនិស្សិតកម្មវិធីផ្លាស់ប្តូរគ្នារបស់រដ្ឋាភិបាលសហរដ្ឋអាមេរិក និងសេវាផ្តល់ប្រឹក្សាស្តីពីការសិក្សាអប់រំរបស់មជ្ឈមណ្ឌល EducationUSA .ពិព័រណ៍នេះមានបំណងបង្ហាញអោយឃើញពីការគាំទ្ររបស់រដ្ឋាភិបាលអាមេរិក ចំពោះការខិតខំដើម្បីលើកកំពស់គុណភាពនៃការអប់រំ និងពង្រីកឱកាសក្នុងការសិក្សា និងក្នុងអាជីព សំរាប់ប្រជាជនកម្ពុជា។

ពិព័រណ៏នេះក៏ផ្តល់ជាមធ្យោបាយពិសេសមួយសំរាប់អោយប្រជាជនកម្ពុជាភ្ជាប់ទំនាក់ទំនងជាមួយស្ថាប័ន ឧត្តមសិក្សានៅសហរដ្ឋអាមេរិក ហើយស្វែងយល់ពីអត្ថប្រយោជន៍នៃការទទួលបានការសិក្សានៅក្នុង សាកលវិទ្យាល័យរបស់សហរដ្ឋអាមេរិក។

លោកស្រី Julie Chung អនុប្រធានបេសកកម្មការទូតសហរដ្ឋអាមេរិក និងឯកឧត្តម ឡៅ ឈីអ៊ាវអនុរដ្ឋលេខាធិការ ក្រសួងអប់រំយុវជននិងកីឡា នឹងដើរមើលការតាំងពិព័រណ៍នៅវេលាម៉ោងប្រហែល ៥ ល្ងាច។

អ្នកសារព័ត៌មានដែលចង់ចូលយកព័ត៌មាននៅក្នុងពិព័រណ៍នេះគួរទៅដល់កន្លែងតាំងពិព័រណ៍នៃសណ្ឋាគារ អាំងទែកុងទីណង់តាល់ត្រឹមម៉ោង ៤:៣០ ល្ងាច។ចំពោះព័ត៌មានបន្ថែម សូមចូលមើលគេហទំព័រ http://cambodia.usembassy.gov/educationusa_fair.html ឬទាក់ទងមកមជ្ឈមណ្ឌល EducationUSA តាមលេខទូរស័ព្ទ ០១២ ៨៧៦ ៧៤៩ ។

ស្ថានទូតអាមេរិអះអាងថាការសិក្សាថ្នាក់មហាវិទ្យាល័យនៅក្នុងសហរដ្ឋអាមេរិកមានច្រើនលក្ខណៈនិងមានភាពវិមជ្ឈការ ។វាមានលក្ខណៈជាស្ថាប័នឧត្ដមសិក្សាដែលមានការប្រកួតប្រជែងនិងស្វ័យភាព ។

នៅពេលបច្ចុប្បន្ននេះមានមហាវិទ្យាល័យនិងសកលវិទ្យាល័យប្រហែល ៤ ១៨០នៅក្នុងសហរដ្ឋអាមេរិក ។ ក្នុងចំណោមនេះមាន១៧០០ គឺជាអ្វីដែលគេហៅថា "ស្ថាប័នសំរាប់រយៈពេល២ឆ្នាំ" ហើយមាន ២ ៤៥០ គឺជា "ស្ថាប័នសំរាប់រយៈពេល ៤ ឆ្នាំ" ។

ជាបន្ថែមលើស្ថាប័នសាធារណៈចំនួនប្រហែល ១ ៧០០(ដែលគ្រប់គ្រងដោយរដ្ឋ ក្រុង ឬសង្កាត់ ដែលស្ថាប័នទាំងនោះស្ថិតនៅ) មានមហាវិទ្យាល័យនិងសាកលវិទ្យាល័យឯកជនចំនួនជាង២ ៤៨០ទៀត ។ "មហាវិទ្យាល័យសហគមន៍"មានចំនួនច្រើនជាងគេក្នុងចំណោមស្ថាប័នរយៈពេល ២ ឆ្នាំ របស់អាមេរិកហើយវាល្អសំរាប់និស្សិតដំបូងៗដែលចង់ចាប់ផ្ដើមវគ្គដំបូងៗឬវគ្គទូទៅផ្នែកភាសា ។

នៅពេលនេះ មាននិស្សិតចំនួន ១៤លាននាក់ដែលកំពុងរៀននៅក្នុងស្ថាប័នមហាវិទ្យាល័យនៅក្នុងសហរដ្ឋអាមេរិក ហើយភាគច្រើនលើសលុបនៃនិស្សិតទាំងនេះ – ប្រហែល ១១ លាននាក់ -រៀននៅមហាវិទ្យាល័យនិងសាកលវិទ្យាល័យសាធារណៈ ។ និស្សិតស្រីមានចំនួនភាគច្រើន (ជាង ៥៦% នៃនិស្សិតសាកលវិទ្យាល័យអាមេរិក ។

ប្រការដែលគួរអោយចាប់អារម្មណ៍ផងដែរគឺថាចំនួនភាគរយខ្ពស់-ជិតដល់ ៤០% - គឺជានិស្សិតដែល រៀនមិនពេញពេល ពោលគឺអ្នករៀននៅក្នុងសាកលវិទ្យាល័យ ក្នុងពេលដែលគេធ្វើការពេញពេល) ។

សញ្ញាប័ត្របរិញ្ញាដែលនិស្សិតអាមេរិកាំងទទួលបានគឺបរិញ្ញាប័ត្រ ។ គេទទួលបានសញ្ញាប័ត្រនេះ បន្ទាប់ពីសិក្សាចប់សព្វគ្រប់រយៈពេល ៤ ឆ្នាំ ។ នៅក្នុងរយៈពេល២ឆ្នាំដំបូង និស្សិតអាមេរិករៀនមុខវិជ្ជាទូទៅមួយចំនួនដែលចាំបាច់ ។

បន្ទាប់ពីរយៈពេល ២ ឆ្នាំនេះចប់ទៅ គេចាប់រៀនមុខវិជ្ជាសំខាន់មួយ (ឬពីរ) ហើយក្នុងរយៈពេល២ ឆ្នាំបន្ទាប់ទៀតនេះ គេរៀនផ្ដោតទៅលើមុខវិជ្ជានេះ (តែគេអាចនឹងចាប់រៀនមុខវិជ្ជា ផ្សេងទៀតជាមួយគ្នានោះក៏បានដែរ) ។ ក្រោយពីទទួលបានបរិញ្ញប័ត្រហើយ ជនជាតិអាមេរិកភាគច្រើនបញ្ចប់ "ការសិក្សា" របស់គេ ហើយស្វែងរកការងារធ្វើ ។

ការសិក្សារយៈពេលបួនឆ្នាំនេះមានឈ្មោះថា "ការសិក្សាដើម្បីយកសញ្ញាប័ត្រមហាវិទ្យាល័យលើកដំបូង" (Undergraduate Studies) ។ អ្នកដែលបន្ដការសិក្សាបន្ថែមទៀត នឹងទទួលបានសញ្ញាប័ត្រអនុបណ្ឌិត (Master of Arts ឬ Master of Science)បន្ទាប់ពី សិក្សាបន្ដរយៈពេលមួយឆ្នាំឬពីរឆ្នាំមក ។

សញ្ញាប័ត្រអនុបណ្ឌិតមានផ្ដល់តែនៅសាកលវិទ្យាល័យទេ ហើយ គ្មានផ្ដល់អោយនៅតាមមហាវិទ្យាល័យទេ ។ សាកលវិទ្យាល័យផ្ដល់សញ្ញាប័ត្រជំនាញអាជីព ដូចជាបណ្ឌិត ច្បាប់ វេជ្ជ បណ្ឌិត និង អនុបណ្ឌិតគ្រប់គ្រងក្រុមហ៊ុន (MBA) ។ ដើម្បីទទួលបានសញ្ញាប័ត្រជំនាញអាជីព ទាំងនេះ គេត្រូវសិក្សាពី២ ទៅ ៤ ឆ្នាំទៀត ។

នៅសហរដ្ឋអាមេរិក ដើម្បីទទួលបានសញ្ញាប័ត្របណ្ឌិត គេត្រូវរៀនពីបួនទៅប្រាំមួយឆ្នាំ ។ដំណាក់កាលដំបូងនៃការសិក្សាយកសញ្ញាប័ត្របណ្ឌិត តាមធម្មតា មានរយៈពេលពីរឆ្នាំហើយគេត្រូវឆ្លងកាត់ការប្រឡងយ៉ាងច្រើននៅក្នុងគ្រប់មុខវិជ្ជាទាំងអស់ ។គេហៅការប្រឡងនេះថា "ការប្រឡងជាបឋម" ។

ក្រោយពីប្រឡងជាប់ហើយ គេអាចចាប់ផ្ដើមសរសេរនិក្ខេបបទថ្នាក់បណ្ឌិត (Doctoral Dissertation) របស់គេ ។ការសិក្សាជាប់មិនដាច់ដែលនាំអោយគេអាចទទួលបានសញ្ញាប័ត្រអនុបណ្ឌិត ឬបណ្ឌិតគេហៅថា "ការសិក្សាថ្នាក់ក្រោយឧត្តម" (Graduate studies) ។