អត្ថបទ និងរូបភាព ៖ ម៉ម វ៉ាន

រាជធានីភ្នំពេញ៖ ជនសង្ស័យ២នាក់ ម្នាក់ជាមុខសញ្ញាកាច់.កម៉ូតូយ៉ាងសកម្មនៅក្នុងភូមិសាស្ត្រខណ្ឌមានជ័យ និងម្នាក់ទៀតជាអ្នកទទួលចោរកម្ម រួមទាំងជួញដូរគ្រឿងញៀន ត្រូវបានកម្លាំងសមត្ថកិច្ច នៃអធិការដ្ឋាននគរបាលខណ្ឌមានជ័យ ដឹកនាំដោយលោកហួរ ម៉េងវ៉ាង អធិការរងទទួលជំនាញព្រហ្មទណ្ឌ សហការជាមួយនគរបាលប៉ុស្តិ៍បឹងទំពុន ធ្វើការបង្ក្រាបបាននៅចំណុចទីតាំង ២ផ្សេងគ្នា ដោយដកហូតម៉ូតូ ៣គ្រឿង រួមជាមួយថ្នាំញៀនក្រាមសថ្លា មួយកូនកញ្ចប់ធំល្មមផងដែរ ។

ជនសង្ស័យទាំង២នាក់ខាងលើ ទី១មានឈ្មោះ ម៉ម បញ្ជនីប៉ា ហៅ ទូ ហៅ ស្នា ភេទប្រុស អាយុ៣០ ឆ្នាំមុខរបរ មិនប្រាកដ ស្នាក់នៅផ្ទះជួល ផ្លូវលំ ភូមិព្រែកទាល់ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។

ជនសង្ស័យទី២ឈ្មោះ ហ៊ា សៀមម៉េង ភេទប្រុស អាយុ៣៩ឆ្នាំ មុខរបរបញ្ចូលបទភ្លេង ស្នាក់នៅផ្ទះលេខ១០ ផ្លូវលេខ១៨២ សង្កាត់ បឹងព្រលឹត ខណ្ឌ៧មករា រាជធានីភ្នំពេញ ។

លោកអនុសេនីយ៍ឯក ហួរ ម៉េងវ៉ាង បានអោយដឹងថា ដំណើររឿងមុនឈានដល់ការឃាត់ខ្លួន ដំបូងឡើយ កាលពីថ្ងៃទី២៤ ខែតុលា ឆ្នាំ២០១៦ វេលាម៉ោង០៩ម៉០០នាទីព្រឹក កម្លាំងនគរបាលចរាចរណ៍ផ្លូវគោករាជធានីភ្នំពេញបានធ្វើការអនុវត្តច្បាប់ចរាចរណ៍ផ្លូវគោកនៅចំណុចគល់ស្ពានអាកាសស្ទឹងមានជ័យ ក្នុងសង្កាត់ បឹងសាឡាង ខណ្ឌទួលគោក ពេលនោះជនសង្ស័យឈ្មោះ ម៉ម បញ្ជនីប៉ា ហៅ ទូ ហៅ ស្នា បានជិះម៉ូតូ០១គ្រឿងម៉ាកហុងដាសេ ១១០ ពណ៍ក្រហម គ្មានស្លាកលេខ ម្នាក់ឯងមកដល់ក៏ឃាត់ត្រួតពិនិត្យសាកសួរជនសង្ស័យ ម៉ម បញ្ជនីប៉ា បានឆ្លើយភូតកុហក់ថា ម៉ូតូម៉ាកហុងដាសេ ១១០ ពណ៍ក្រហម គ្មានស្លាកលេខ ដែលជិះនេះបានលួចយកនៅភូមិ ចំរើន ផល សង្កាត់ បឹងទំពុន ពេលនោះនគរបាលចរាចរណ៍ក៏បានប្រគល់ជនសង្ស័យឈ្មោះ ម៉ម បញ្ជនីប៉ា និងម៉ូតូ ឲ្យមកនគរបាលប៉ុស្តិ៍បឹងទំពុនធ្វើការសាកសួរនៅស្នាក់ការប៉ុស្តិ៍ទើបជនសង្ស័យព្រមឆ្លើយសារភាពថា ម៉ូតូម៉ាកហុងដាសេ ១១០ ពណ៍ក្រហម គឺរូបគេ និង បក្សពួកម្នាក់ទៀតមិលស្គាល់ឈ្មោះបានលួចយកនៅម្តុំសាលាបឋមសិក្សាវត្តទួលទំពូង ខណ្ឌចំការមន កាលពីថ្ងៃទី២៤ ខែតុលា ឆ្នាំ២០១៦ វេលាម៉ោង២៤ម៉១៥នាទី ។ 

ជនសង្ស័យដដែលនេះ បានឆ្លើយបន្តថា កាលពីថ្ងៃទី ២២-១០-២០១៦ វេលាម៉ោង២៣ និង ០០នាទី រូបគេនិងបក្សពួកម្នាក់ឈ្មោះញ៉ា កំពុងរត់គេចខ្លួន បានកាច់.កម៉ូតូមួយគ្រឿងទៀតមាក ហុងដាឃ្លី ពណ៌ស មិនចាំស្លាកលេខ  នៅភូមិចំរើនផល សង្កាត់ បឹងទំពុន ។ ក្រោយកាច់បានសម្រេចហើយរូបគេ បានយកម៉ូតូនេះទៅលក់អោយឈ្មោះ ហ៊ា សៀមម៉េង ដែលជាអ្នកទទួលផលចោរកម្ម នៅភូមិត្រពាំងឈូក សង្កាត់ទឹកថ្លា ។ ដោយមានចម្លើយឆ្លើយសារភាព និងការចង្អុលបង្ហាញពីឈ្មោះ ម៉ម បញ្ជនីប៉ា ជាជនសង្ស័យ កម្លាំងនគរបាល នាវេលាល្ងាចថ្ងៃទី ២៤ ខែតុលា ឆ្នាំ២០១៦បានបន្ត ទៅចាប់ខ្លួនឈ្មោះហ៊ាង សៀមម៉េង នៅចំណុចភូមិត្រពាំងឈូក សង្កាត់ទឹកថ្លាបានជាក់ស្តែង ដោយដកហូតម៉ូតូដែលជនល្មើសកាច.ក និងវត្ថុតាងបទល្មើសមួយចំនួន ។ 

លោកហួរ ម៉េងវ៉ាង បន្តថា ក្នុងការបង្ក្រាបពួកគេទាំង២នាក់ សរុបជារួមសមត្ថកិច្ចបានធ្វើការដកហូតបាន វត្ថុតាងមួយចំនួនរួមមាន ៖ ម៉ូតូ០១គ្រឿងម៉ាកហុងដាឃ្លីក ពណ៍ស គ្មានស្លាកលេខ និង ក្រាមពណ៍សថ្លាចំនួន ០២កញ្ចប់ថង់ (កញ្ចប់ធំ ០១,កញ្ចប់តូច០១),ជញ្ជីងអេឡិចត្រូនិច០១គ្រឿង និង ឧបករណ៍សម្រាប់ជក់ថ្នាំញៀនមួយចំនួន ។ បច្ចុប្បន្នជនសង្ស័យ និងវត្ថុតាងត្រូវបានឃុំខ្លួនបណ្តោះអាសន្ននៅប៉ុស្តិ៍រដ្ឋបាលនគរបាលបឹងទំពុន រងចាំកសាងសំណុំរឿងបញ្ចូនទៅសាលាដំបូងរាជធានីភ្នំពេញ ដើម្បីចាត់ការទៅតាមផ្លូវច្បាប់  ៕

• មុខសញ្ញា
• កាច់ក.ម៉ូតូ
• ទទួលផលចោរកម្ម
• ខណ្ឌមានជ័យ
• ថ្នាំញៀន