ការបោះឆ្នោតជ្រើសរើសប្រធានាធិបតីនៅអាមេរិក បានផ្តើមជាបណ្តើៗហើយ

ព័ត៌មានអន្តរជាតិ | ថ្ងៃពុធ ទី០៥ តុលា ២០១៦, ១០:៤០ | ៣៧៨ ដង | ចុចបញ្ចេញមតិ (០)

ពលរដ្ឋអាមេរិករាប់សិបពាន់នាក់បានចាប់ផ្តើមទៅបោះឆ្នោតមុនពេល ជូនបេក្ខភាពដែលខ្លួនពេញចិត្ត។ ពលរដ្ឋប្រមាន ១៣០ពាន់នាក់ក្នុងចំណោម១៣០លាននាក់ដែលគ្រោងទៅបោះឆ្នោតមុនពេល បានចាប់ផ្តើមទៅបោះឆ្នោតជាបណ្តើៗនៅតាមការិយាយល័យបោះឆ្នោតមុនពេលដែលបានរៀបចំឡើងនៅទូទាំងអាមេរិក។ ការបោះឆ្នោតមុនពេលនឹងត្រូវបានរាប់សន្លឹកឆ្នោតនៅថ្ងៃទី៨ខែវិច្ឆិការ ជាថ្ងៃបោះឆ្នោតចុងក្រោយនៅអាមេរិក។

ប្រព័ន្ធបោះឆ្នោតអាមេរិកបានចាប់ផ្តើមដំណើរការ នៅក្នុងរដ្ឋចំនួន៥០ ហើយរដ្ឋនីមួយៗមានការរៀបចំបោះឆ្នោតនិងរាប់សន្លឹកឆ្នោតផ្សេងៗគ្នា។ ពលរដ្ឋអាមេរិកមានជម្រើសដពីរ គឺបោះឆ្នោតមុនពេលតាមអីម៉ែលឬទៅបោះឆ្នោតដល់កន្លែងតែម្តង។

ការបោះឆ្នោតមុនពេលវេលាជារឿងមួយដ៏ល្អប្រសើរបំផុតសម្រាប់ពលរដ្ឋអាមេរិកមានពេលវេលាច្រើនក្នុងការទៅបោះឆ្នោត។ ការបោះឆ្នោតមុនពេលកំណត់ចាប់ផ្តើមដំបូងនៅឆ្នាំ១៩៩៦ ដោយពេលនោះមានពលរដ្ឋអាមេរិក១០,៥ភាគរយទៅបោះឆ្នោតមុនពេលហើយតួលេខទាំងនោះត្រូវបានកើនឡើង៣៣ភាគរយនៅក្នុងឆ្នាំ២០១២។ ក្រុមអ្នករៀបចំរំពឹងថា ការបោះឆ្នោតឆ្នាំ២០១៦នេះនឹងមានការកើតឡើងជាងពេលមុន។

នៅពេលនេះលោកស្រីហ៊ីលឡារីគ្លីនតុនកំពុងតែទទួលបានការគាំទ្រខ្ពស់ពីប្រជាពលរដ្ឋអាមេរិក ក្នុងនោះមានក្រុមអន្តោបវេសស្ត្រីនិងយុវជន។ក្រោយពីទទួលជោគជ័យយកឈ្នះលោក Donald Trump នាវេទិការពិភាក្សាតទល់គ្នាកាលពីសប្តាហ៍មុនឥឡូវនេះ លោកស្រី Hillary Clinton កំពុងតែសកម្មចុះទៅជួបក្រុមយុវជន។ បើតាមការស្ទង់មតិនានា លោកស្រីហាក់ពុំសូវទទួលបានប្រជាប្រិយភាពខ្លាំងក្លាឡើយពីសំណាក់ ពលរដ្ឋអាមេរិកក្រោមអាយុ ៣០ ឆ្នាំ។ បើតាមអ្នកជំនាញបានឲ្យដឹងថា ប្រសិនបើគ្មានការគាំទ្រពីក្រុមយុវជនទេ លោកស្រី Hillary Clinton អាចចាញ់ឆ្នោតនៅតាមបណ្តារដ្ឋសំខាន់ៗមួយចំនួន។ ដើម្បីទទួលបានសម្លេងគាំទ្រពីក្រុមអ្នកបោះឆ្នោតវ័យក្មេងទាំងនោះ លោក Bernie Sanders ត្រូវបានអញ្ជើញឲ្យមកជួយឃោសនា។

អតីត គូបដិបក្ខ គឺលោកស្រី Hillary Clinton និងលោក Bernie Sanders ចុះឃោសនាជាមួយគ្នា។ ចាប់តាំងពីទទួលបានការតែងតាំងជាបេក្ខនារីផ្លូវការតំណាងឲ្យបក្ស នេះជាលើកទីពីរហើយ ដែលលោកស្រី Hillary Clinton បានចេញមុខជាសាធារណៈជាមួយលោក Bernie Sanders។ កាលពីសប្តាហ៍មុន អ្នកទាំងពីរបានថ្លែងសារនយោបាយទៅកាន់ក្រុមអ្នកគាំទ្រវ័យក្មេង ចំនួន ១ ២០០នាក់នាសាកលវិទ្យាល័យរដ្ឋ New Hampshire។

បរិយាកាស នៃជំនួបនេះហាក់ដូចជាអាប់អួបន្តិច។ ម៉្យាងដោយសារតែក្រុមយុវជនពុំសូវចូលចិត្តលោកស្រី Hillary Clinton។ ពួកគេតែងបន្ទោសថាលោកស្រីមិនចាប់អារម្មណ៍បញ្ហាយុវជន។ សំរាប់ពួកគេ លោកស្រីគ្រាន់តែជានិមិត្តរូបតំណាងផលប្រយោធន៍បក្សតែប៉ុណ្ណោះ។ ហើយលោកស្រីក៏មិនអាចផ្លាស់ប្តូរអ្វីឲ្យបានដុំកំភួនឡើយ។ ក្នុងអារម្មណ៍ក្រុមយុវជន លោក Bernie Sanders គឺជានិមិត្តរូបនៃការតស៊ូមតិ ដែលហ៊ានរិះគន់គម្លាតរវាងអ្នកមាន និងអ្នកក្រក្នុងសង្គមអាមេរិក។ ហើយលោកក៏ជាអ្នកហ៊ានចេញមុខរិះគន់ធនាគារ និងផ្សារហ៊ុនក្នុងសង្កាត់ Wall Street ដែលចំណេញប្រាក់កប់ក្តោងរាប់រយលានដុល្លារក្នុងមួយឆ្នាំ។