ខេត្តបាត់ដំបង៖    យ៉ាងហោចណាស់ក៏មានកម្មករប្រមាណ២០០នាក់ដែរ  ដែលកំពុងធ្វើការតវ៉ា និងទាមទាលើគោលការបញ្ចូលកម្មករអណ្តែត  អោយចូលជាកម្មករពេញសិទ្ធិដោយសារតែមានកម្មករខ្លះធ្វើការរហូតជិតមួយឆ្នាំទៅហើយ  នៅតែមិនទាន់បានពេញសិទ្ធិទៀត  ដើម្បីទទួលបាននូវរបបប្រាក់បន្ថែម៣មុខ លើប្រាក់បៀវត្សធម្មតា ។ គួរបញ្ជាក់ថា  រោងចក្រផលិតស្បែកជើងនេះគឺជាវិនិយោគរបស់ជនជាតិថៃ  ដែលមាន ទីតាំងស្ថិតក្នុងភូមិវាលវង់  ឃុំតាស្តា  ស្រុកសំពៅលូន  ខេត្តបាត់ដំបង  ដោយមានឈ្មោះ « អ៊ែរ៉ូសហ្វ សាំមីត ហ្វូតវែរ » ហើយក៏ធ្លាប់មានបញ្ហាជាច្រើនលើក ច្រើនសារមកដែរប៉ុន្តែគេមិនសូវឃើញមានការទទួលស្គាល់  ឬធ្វើការដោះស្រាយរាល់សំណូមពររបស់ កម្មករនោះទេ  ដែលជាបញ្ហាមួយពង្រីកអោយកនា់តែធំទៅៗ ។

លុះនៅវេលាម៉ោង ៨ និង២៥ នាទី  ព្រឹកថ្ងៃទី១  ខែកក្កដា  ឆ្នាំ២០១៦  មានការតវ៉ា ពីសំណាក់កម្មករប្រមាណ២០០នាក់នៅខាងមុខរោងចក្រ  ដោយម្នាក់ៗមិនព្រមចូល ទៅធ្វើការនៅក្នុងរោងចក្រឡើយ  ដោយការតវ៉ានេះ  គឺពួកគេបានផ្តោតទៅលើគោលការណ៍ តែម៉្យាងគត់គឺ  សំណូមពរដល់ភាគីរោងចក្រអោយបញ្ចូលកម្មករអណ្តែត ទៅជាកម្មករពេញសិទ្ធិត្រឹមតែរយៈពេល ៣ខែ ប៉ុណ្ណោះ  ព្រោះបើតាមសេចក្តីរាយការណ៍មកគឺ មានកម្មករជាច្រើននាក់ដែលខ្លះចូលធ្វើការជិតមួយឆ្នាំហើយ  នៅមិនទាន់បានពេញសិទ្ធិទៀតដូច្នេះពួកគេទាំងអស់គ្នាសុំសំណូមពរតែមួយប៉ុណ្ណោះ ។ជួបជាមួយកម្ពុជាថ្មី  កម្មការនីម្នាក់ឈ្មោះ សេង សុធា  អាយុ២៦ឆ្នាំ  រស់នៅភូមិចក្រីឃុំបារាំងធ្លាក់  ស្រុកភ្នំព្រឹក  ដែលបានមកធ្វើការនៅក្នុងរោងចក្រនេះទាំងពីរនាក់ប្តី ប្រពន្ធ បានរៀបរាប់ថា  ពួកគេគ្មានទាមទាអ្វីច្រើននោះទេ  គឺគ្រាន់តែសុំអោយរោងចក្របញ្ចូលឈ្មោះកម្មករអណ្តែត ទៅជាកម្មករពេញសិទ្ធិតែត្រឹមរយៈពេល៣ខែបានហើយ  ដើម្បីអោយពួកគេទទួលបាននូវរបបបន្ថែម ៣យ៉ាង ដូចជា ប្រាក់ព្រីម  ប្រាក់បុណ្យ  និងប្រាក់ធ្វើដំណើរ ។

កម្មការនីរូបនេះបានបន្តថា  បន្ទាប់ពីមានការទាមទាតវ៉ារួចមក  ស្វាមីរបស់នាងឈ្មោះអុល រ៉យ  អាយុ២៥ឆ្នាំ  ដែលរោងចក្រទើបបានបញ្ចូលទៅជាកម្មករពេញសិទ្ធិដែលមានចំនួន១១នាក់  ត្រូវគេទំលាក់ទៅជាកម្មករអណ្តែតវិញដោយស្វ័យប្រវត្តិ តែមួយប៉ព្រិចភ្នែកដែលើលទៅហាក់ដូចជាមានកំហឹងជាមួយនឹងកម្មករដែលមិនព្រមចូលធ្វើការអញ្ចឹងដែរហើយម៉្យាងទៀតក្នុងរោងចក្រផលិតស្បែកជើងនេះ  គឺគេមិនអនុញ្ញាតអោយបង្កើតជាសហជីពកម្មករ ដើម្បីដោះស្រាយរាល់ពេលមានបញ្ហាឡើយ ។

នៅក្នុងឱកាសនោះដែរលោកមេការ  ដែលជាជនជាតិខ្មែរនៅក្នុងរោងចក្របានបញ្ជាក់ប្រាប់កម្មករទាំងអស់ថា  បើមិនព្រមធ្វើការទេ  ទាំងអស់គ្នាត្រូវចូលទៅបំពេញលិខិតលាលែងពីការងារ  ដើម្បីគេមានឱកាសជ្រើសរើសកម្មករថ្មី  ដែលបញ្ហានេះខាងកម្មករបានលើកជាសំណួរថា  តើរោងចក្រចង់បញ្ឈប់កម្មករពីការងារ  ត្រូវបញ្ឈប់ភ្លាមៗមែនទេ?

នៅវេលាម៉ោង៩ និង៤៥នាទី  ព្រឹកថ្ងៃដដែលបានទំនាក់ទំនងទៅលោកមេការតាមរយៈទូរស័ព្ទចំនួនពីរលើក ដើម្បីចង់ដឹងថា តើក្រុមហ៊ុនមានវិធីដោះស្រាយបែបណាទៅលើសំណូមពររបស់កម្មករ តែត្រូវភាគីនោះមិនទទួលទូរស័ព្ទឡើយ៕

• កម្មករ
• ពេញសិទ្ធិ