|
 |
MENU
|
|
|
|
MENU
|
តាមការព្យាករណ៍របស់មូលនិធិរូបិយវត្ថុអន្តរជាតិបានឲ្យដឹងថាប្រទេសមហាអំណាចសេដ្ឋកិច្ចទាំងពីររបស់អាស៊ី គឺចិននិងជប៉ុន និងមានកំណើនសេដ្ឋកិច្ចធ្លាក់ចុះទាបជាងឆ្នាំមុនៗ សម្រាប់ឆ្នាំ២០១៦និង ឆ្នាំ២០១៧ខាងមុខនេះ។
ចិនដែលជាកំលាំងចលករនៃសេដ្ឋកិច្ចអាស៊ី នឹងមានកំណើនសេដ្ឋកិច្ចស្មើនឹង ៦,៥%នៅឆ្នាំ២០១៦ និង៦,២%នៅឆ្នាំ២០១៧។ តួលេខនេះជាកម្រិតទៀបបំផុតសម្រាប់ចិន ដែលធ្លាប់តែស្គាល់កំណើនសេដ្ឋកិច្ចមួយឆ្នាំៗ ជាង១០%។ មូលនិធិរូបិយវត្ថុអន្តរជាតិ បានផ្តល់អនុសាស្ត្រឲ្យរដ្ឋាភិបាលចិន យកចិត្តទុកដាក់ធ្វើកំណែទម្រង់ស៊ីជំរៅ ដល់ហេដ្ឋារចនាសម្ព័ន្ធសេដ្ឋកិច្ច និងហិរញ្ញវត្ថុ ព្រមទាំងធ្វើអន្តរកាលសេដ្ឋកិច្ច ឲ្យស្របទៅតាមតម្រូវការទីផ្សារអន្តរជាតិ។
ចំណែកជប៉ុនវិញ របាយការណ៍បានព្យាករណ៍ថា នៅឆ្នាំ២០១៦ នឹងមានកំណើនសេដ្ឋកិច្ចតែ០,៥%តែប៉ុណ្ណោះ ហើយនៅឆ្នាំ២០១៧វិញ កំណើនសេដ្ឋកិច្ចនឹងធ្លាក់ចុះក្រោមសូន្យ ដោយសារកម្រិតពន្ធលើការប្រើប្រាស់ត្រូវកើនឡើង។ មូលហេតុចំបងនៃការថយចុះរបស់សេដ្ឋកិច្ចជប៉ុន គឺមកពីតម្លៃប្រាក់យេន បានឡើងខ្ពស់ ហើយធ្វើឲ្យការនាំចេញមានការលំបាក។ បន្ថែមពីនេះ ប្រជាជនជប៉ុនដែលមានវ័យចំណាស់ច្រើននេះ ក៏កំពុងតែបង្ករជាបន្ទុកធ្ងន់ដល់រដ្ឋាភិបាល និងការចំនាយរបស់រដ្ឋ ផងដែរ។
សម្រាប់ទ្វីបអាស៊ីជាទូទៅ របាយការណ៍បានប៉ាន់ស្មានថានឹងមានកំណើនសេដ្ឋកិច្ចប្រមាណជា៥,៣%នៅឆ្នាំ២០១៦ និង២០១៧។ យោងតាម មូលនិធិរូបិយវត្ថុអន្តរជាតិ ទ្វីបអាស៊ីជាទូទៅ នៅតែសកម្ម និងជាតំបន់ដែលចរន្តសេដ្ឋកិច្ចដើរល្អ ដោយសារតែតម្រូវការក្នុងស្រុកនៅតែកើនឡើង។ តែយ៉ាងណាក៏ដោយភាពផុយស្រួយនៃវិស័យសេដ្ឋកិច្ចអាស៊ី ត្រូវតែដោះស្រាយតាមរយៈការធ្វើកំណែទម្រង់ស៊ីជំរៅ ដូចជាលើវិស័យពន្ធដាជាដើម៕
