រាជធានីភ្នំពេញ៖  នៅព្រឹកថ្ងៃទី១៧ខែឧសភាឆ្នាំ២០១៧នេះគណៈកម្មាធិការជាតិរៀបចំការបោះឆ្នោត (គ.ជ.ប) បានរៀបធ្វើសន្និសីទសារព័ត៌មាន ស្តីពីការបង្ហាញនិងធ្វើការសាកសល្បង គុណភាពទឹកខ្មៅលុបមិនជ្រះ សម្រាប់ប្រើប្រាស់ក្នុងការបោះឆ្នោត ជ្រើសរើសក្រុមប្រឹក្សា ឃុំ-សង្កាត់អាណត្តិទី៤ ឆ្នាំ២០១៧ នាថ្ងៃទី០៤ ខែមិថុនា ឆ្នាំ២០១៧ខាងមុខនេះ។សន្និសីទនេះប្រព្រឹត្តទៅក្រោមអធិបតីលោកស៊ិក ប៊ុនហុកប្រធានគ.ជ.បដែលកម្មវិធីនេះធ្វើឡើងនៅក្រសួងមហាផ្ទៃ។

សូមបញ្ជាក់ថា ការធ្វើសន្និសីទកាសែតរបស់ប្រធាន គ.ជ.ប នាពេលនេះបានកើតមានឡើងបន្ទាប់ពីមានអង្គការសង្គមស៊ីវិលមួយចំនួនបានសម្តែងការព្រួយបារម្ភយ៉ាងខ្លាំងលើបញ្ហាទឹកខ្មៅលុបជ្រះក្រោយមានការពិសោធន៍របស់ គ.ជ.ប កាលពីពេលថ្មីៗនេះ។

មន្រ្តីគណៈកម្មាធិការជាតិរៀបចំការបោះឆ្នោត (គ.ជ.ប) ធ្លាប់បានបញ្ជាក់ថា ទឹកខ្មៅយកមកពីប្រទេសឥណ្ឌា ដែលពិសោធន៍ឃើញលុបជ្រះ បានដោះស្រាយរួចរាល់អស់ហើយ គ្មានបញ្ហាចោទនោះទេ។ ទោះបីជាយ៉ាងណាក៏ដោយ ទឹកខ្មៅលុបជ្រះ គ្មានឥទ្ធិពលដល់ការបោះឆ្នោតទេ គ.ជ.ប នៅតែមានយន្តការជាច្រើនទៀត ដែលអាចធានាការ បោះឆ្នោតដោយសេរី និងយុត្តិធម៌បាន។

លោក ហង្ស ពុទ្ធាអ្នកនាំពាក្យ(គជប) បានថា ប្រាប់អ្នកកាសែតថា ទឹកខ្មៅយកមកពីប្រទេសឥណ្ឌា ដែល គ.ជ.ប ពិសោធន៍ឃើញថា លុបជ្រះ បានយកទៅឲ្យក្រុមហ៊ុន ធ្វើទឹកថ្នាំនោះ ពិសោធន៍ជាថ្មី ចំនួនហ្នឹងគឺតិចតួចទេ ដែលពិសោធន៍ឃើញថា លុបជ្រះ ក្រោយពីបញ្ចូនទៅឲ្យក្រុមហ៊ុន វិញយើងបានពិសោធន៍ទឹកខ្មៅដែលឥណ្ឌា បញ្ចូនមកកម្ពុជាអាចំនួនច្រើនហ្នឹងមកវិញគឺបានពិសោធន៍ឃើញថា មិនអាចលុបជ្រះបានទេ។

គួរបញ្ជាក់ថា ទឹកខ្មៅសម្រាប់ជ្រលក់ដៃពលរដ្ឋនៅពេលបោះឆ្នោតនោះ គ.ជ.ប បានបញ្ជាទិញពីប្រទេសឥណ្ឌា និងបានបញ្ចូនមកដល់ប្រទេសកម្ពុជា រួចរាល់ហើយចំនួន៤៦៥០០ដប ក្នុងទំហំទឹកប្រាក់៧៩៣២៤០ដុល្លារអាមេរិក។ គំរូទឹកថ្នាំពណ៌ខ្មៅ ដែល គ.ជ.ប គ្រោងនឹងប្រើប្រាស់សម្រាប់ការបោះឆ្នោត ឃុំ-សង្កាត់ ខាងមុខនេះ។ គ.ជ.ប មានគម្រោងនឹងបញ្ជាទិញទឹកខ្មៅនេះ ពីបណ្តាប្រទេសមួយចំនួនរួមមាន ប្រទេសឥណ្ឌា ប្រទេសដាណឺម៉ាក និងប្រទេសចិនជាដើម៕

• គ. ជ.ប
• សន្និសីទ
• បោះឆ្នោត