រាជធានីភ្នំពេញ៖  សម្តេចហ៊ុនសែននាយករដ្ឋមន្រ្តីនៅព្រឹកថ្ងៃទី០៥ ខែមេសានេះ អញ្ជើញសម្ពោធដាក់ឱ្យប្រើប្រាស់ជាផ្លូវការនូវរោងចក្រប្រព្រឹត្តិកម្មទឹកស្អាតនិរោធជំហានទី២តម្លៃជាង ៦០លានដុល្លារ នៅក្នុងភូមិបឹងឈូក សង្កាត់និរោធ ខណ្ឌច្បារអពៅ រាជធានីភ្នំពេញ។ រោងចក្រប្រព្រឹត្តិកម្មទឹកស្អាតនិរោធជំហានទី២នេះ អាចផលិតទឹកស្អាតបាន ១៣០ពាន់ម៉ែត្រគូបក្នុងមួយថ្ងៃ ។

រោងចក្រប្រព្រឹត្តកម្មទឹកស្អាតនិរោធជំហានទី២ នេះ ត្រូវបានចាប់ផ្ដើមសាងសង់នៅដើមខែសីហា ឆ្នាំ២០១៤ ដោយប្រើរយៈពេលសាងសង់ ៣០ខែ ដោយប្រើថវិកាសរុបចំនួន ៦០,៩០លានដុល្លារអាមេរិក ក្នុងនោះមានថវិកាបដិភាគ របស់រដ្ឋាករទឹកស្វយ័តក្រុងភ្នំពេញចំនួន ២៤,៩០លានដុល្លារអាមេរិក និងថវិកាកម្ចីពីទីភ្នាក់ងារបារាំងសម្រាប់ការអភិវឌ្ឍន៏ចំនួន ៣៦លានដុល្លាអាមេរិក។ ការសាងសង់បានបញ្ចប់ជាស្ថាព នៅខែវិច្ឆិកា ឆ្នាំ២០១៦ ពោលគឺបញ្ចប់មុនផែនការចំនួន ៤ខែ។

ក្រោយពីរោងចក្រប្រព្រឹត្តកម្មទឹកស្អាតនិរោធជំហានទី២នេះ ដាក់ឱ្យដំណើរការ អង្គភាពរដ្ឋាករទឹកស្វយ័ត ក្រុងភ្នំពេញអាចផលិតទឹកបាន ៥៦០ពាន់ម៉ែត្រគូបក្នុងមួយថ្ងៃ និងអាចបម្រើសេចក្តីត្រូវការទឹកស្អាតជូនប្រជាពលរដ្ឋរស់នៅសង្កាត់ជាយរាជធានីភ្នំពេញ និងក្រុងតាខ្មៅ បានប្រមាណ ៣៣១ពាន់អតិថិជនក្នុងឆ្នាំ២០១៧នេះ។ ការផ្តល់សេវាជូនប្រជាពលរដ្ឋនឹងសម្រេចបានប្រមាណ៨៥ភាគរយ។

ដើម្បីឆ្លើយតបទៅនឹងសំណូមពរប្រើប្រាស់ទឹកនៅរាជធានីភ្នំពេញ ដែលចេះតែកើនឡើងយ៉ាងគំហុកនេះ រដ្ឋាករទឹកស្វយ័តក្រុងភ្នំពេញបានធ្វើការវិនិយោគលើការពង្រីកប្រព័ន្ធផ្គត់ផ្គង់ទឹកជាបន្តបន្ទាប់ ដូចជាសាងសង់រោងចក្រប្រព្រឹត្តកម្មទឹកស្អាត និងពង្រីកបណ្តាញចែកចាយទឹកសរុបជាទឹកប្រាក់វិនិយោគចំនួន ១១៥លានដុល្លាអាមេរិក ។

ក្នុងនោះអង្គភាពបានចំណាយថវិកាបដិភាគចំនួន ១៣លានដុល្លាអាមេរិក និងថវិកាកម្ចីពីដៃគូអភិវឌ្ឍចំនួន ១០២លានដុល្លាអាមេរិក មានដូចជា ទីភ្នាក់ងារបារាំងសម្រាប់ការអភិវឌ្ឍ(AFD), ធនាគារពិភពលោក(WB), និងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន(JICA)។

បន្ថែមលើការវិនិយោគដ៏ធំនេះ រាជរដ្ឋាភិបាលបានអនុញ្ញាតឱ្យរដ្ឋាករទឹកស្វយ័តក្រុងភ្នំពេញ ទទួលហិរញ្ញប្បទានផ្ទាល់លើកទី៣ ពីទីភ្នាក់ងារបារាំងសម្រាប់ការអភិវឌ្ឍ(AFD) ព្រមទាំងបានអនុញ្ញាតឱ្យរដ្ឋាករទឹកស្វយ័តក្រុងភ្នំពេញប្រើប្រាស់ថវិកាបដិភាគរបស់ខ្លួន ដើម្បីសាងសង់រោងចក្រប្រព្រឹត្តកម្មទឹកស្អាតនិរោធជំហានទី២ ដែលមានសមត្ថភាពផលិត ១៣០ពាន់ម៉ែត្រគូបក្នុងមួយថ្ងៃ បន្ថែមលើសមត្ថភាពផលិតដែលមានស្រាប់នៅជំហានទី១ ចំនួន ១៣០ពាន់ម៉ែត្រគូបក្នុងមួយថ្ងៃ៕   

• ពលរដ្ឋ
• រោងចក្រ
• ទឹកស្អាត