ខេត្តក្រចេះ៖  ផ្ទះធ្វើពីឈើប្រក់ក្បឿងមានចំនួន៤ខ្នង ទំហំ២០ម៉ែត្រគុណ០៧ម៉ែត្រ ដែលគេស្គាល់ថា ជាកម្មសិទ្ធរបស់លោកគ្រូបង្រៀនម្នាក់មានតួនាទីជានាយកសាលាអនុវិទ្យាល័យសំបុកឈ្មោះ ទាវ បុរី អាយុ៤៨ឆ្នាំ ប្រពន្ធឈ្មោះ ស៊ាង អ៊ាមឆេង អាយុ៤៧ឆ្នាំមានទីលំនៅត្រង់ចំនុចកើតហេតុខាងលើ ត្រូវភ្លើងឆាបឆេះអស់គ្មានសល់ កាលពី វេលាម៉ោង៥នឹង៤៥នាទីព្រឹក ថ្ងៃទី១១ ខែកុម្ភៈ ឆ្នាំ២០១៧នេះ ។

ប្រភពពីប្រជាពលរដ្ឋដែលរស់នៅក្បែរនោះបានអោយដឹងថា មុនពេលភ្លើងឆាបឆេះ គឺពួកគាត់ បានឃើញលោកគ្រូបង្រៀនដែលជាម្ចាស់ផ្ទះរងគ្រោះបានឌុបប្រពន្ធមកពីក្រុងក្រចេះ ហើយដាក់ប្រពន្ធគាត់នៅខាងមុខផ្ទះ ដោយលោកគ្រូបានធ្វើដំណើរបន្តទៅចម្កា ។ មួយសន្ទុះក្រោយមកស្រាប់តែគេឃើញអណ្តាតភ្លើងឆាបឆេះចេញពីចង្ក្រានបាយយ៉ាងខ្លាំងហើយក៏ឆាបឆេះរាលដាលបន្តរហូតដល់ខាងមុខផ្ទះយ៉ាងលឿនជាហេតុមិនអាចជួយពន្លត់បានទាន់ពេលវេលាឡើយ បើទោះជាមានការជួយអន្តរាគមន៍ពីប្រជាពលរដ្ឋ នគរបាលប៉ុស្តិ៍រដ្ឋបាលសំបុក និងអាជ្ញាធរមូលដ្ឋានយ៉ាងណាក្តី ។

លោកអនុសេនីយ៍ឯក អ៊ុន ហយ នាយនគរបាលប៉ុស្តិ៍រដ្ឋបាលសំបុកបានបញ្ជាក់អោយដឹងថា មូលហេតុដែលបណ្តាលឲ្យមានអគ្គីភ័យនេះកើតឡើងគឺសមត្ថកិច្ចមិនទាន់សន្និដ្ឋានបាននៅឡើយទេ ម្យាងទៀតផ្ទះរងគ្រោះមួយនេះគឺមិនបានតចរន្តអគ្គិសនីប្រើប្រាស់ឡើយ ។

លោកនាយប៉ុស្តិ៍បានបន្តថា នៅក្នុងហេតុការនេះគឺមានរថយន្តពន្លត់អគ្គីភ័យរបស់ស្នងការដ្ឋាន នគរបាលខេត្តក្រចេះ ចំនួន០២គ្រឿង និងរថយន្តរបស់អធិការដ្ខាននគរបាលស្រុកចិត្របុរី០១គ្រឿងផងដែរមកជួយបាញ់ទឹកពន្លត់ ប៉ុន្តែគួរអោយ ស្តាយព្រោះមិនអាចសង្គ្រោះផ្ទះកើតហេតុបានឡើយ ដោយសារតែពេលភ្លើងកំពុងឆាបឆេះគឺមានខ្យល់បក់បោកមកយ៉ាងខ្លាំង បាញ់ទឹកពន្លត់ បាញ់ទឹកពន្លត់មិនទាន់ ប៉ុន្តែបានបាញ់ទឹកការពារមិនអោយភ្លើងឆាបឆេះរាលដាលឆ្លងដល់ផ្ទះអ្នកជិតខាងនៅជាប់គ្នានោះឡើយ ។

បើយោងតាមការអោយដឹងពីម្ចាស់ផ្ទះកើតហេតុគឺថា សម្ភារៈ ទ្រព្យសម្បត្តិដែលត្រូវភ្លើងឆេះនៅពេលនេះសរុបអស់ប្រមាណជា៥មឺុនដុល្លាអាមេរិច ៕

• អគ្គីភ័យ
• ប្រជាពលរដ្ឋ
• លេបត្របាក់