រាជធានីភ្នំពេញ៖ ចៅក្រមជំនុំជម្រះក្តីតុលាការកំពូល នៅព្រឹកថ្ងៃទី២៣ខែធ្នូឆ្នាំ២០១៦បានលើកយកសំណុំរឿងបណ្តឹងសាទុក្ខរបស់អតីតនិស្សិតឈ្មោះ គង់ រ៉ៃយ៉ា ភេទប្រុសអាយុ២៦ឆ្នាំបានប្រកាសធ្វើបដិវត្តន៍ពណ៌មកសវនាការ។ ជនជាប់ចោទពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមមាត្រា៤៩៤ និង ៤៩៥ នៃក្រមព្រហ្មទណ្ឌ ។

សវនាការនេះធ្វើឡើងជាសាធារណៈចំពោះមុខជនជាប់ចោទនិងដឹកនាំដោយលោកចៅក្រម ឃឹម ប៉ុន ប្រធានក្រុមប្រឹក្សាជំនុំជំរះ និងលោកអគ្គព្រះរាជអាជ្ញា ជុំ សំបាន ជាតំណាងមហាអយ្យការ។តែបន្ទាន់ពីសាកសួរដេញដោលតុលាការបានលើកពេលប្រកាសសាលដីកាដែលនឹងត្រូវធ្វើឡើងនៅថ្ងៃទី២៩ធ្នូ ឆ្នាំ២០១៦ខាងមុខវិញ។

ជនជាប់ចោទឈ្មោះ គង់ រ៉ៃយ៉ា អតីតនិស្សិតឆ្នាំទី១ផ្នែកវិទ្យាសាស្ត្រនយោបាយនៃសាកលវិទ្យាល័យខេមរៈពេលចេញពីបន្ទុប់សវនាការបានស្រែកថាតុលាការអយុត្តិធម៌ណាស់។ទោះជាយ៉ាងណានោះលោកចៅក្រម ឃឹម ប៉ុន ប្រធានក្រុមប្រឹក្សាជំនុំជំរះ បានសំរេចលើកពេលប្រកាសសាលដីកានៅព្រឹកថ្ងៃទី២៩ខែធ្នូឆ្នាំ២០១៦ខាងមុខនេះ។

សូមបញ្ជាក់ថាកាលពីថ្ងៃទី២១ខែកក្កដា ឆ្នាំ២០១៦ថ្មីៗនេះសាលាឧទ្ធរណ៍ បានសំរេចតម្កល់សាលក្រមសាលាដំបូងរាជធានីភ្នំពេញទុកជាបានការដដែលគឺផ្តន្ទាទោសជនជាប់ចោទឈ្មោះ គង់ រ៉ៃយ៉ា ដាក់ពន្ធនាគារកំណត់រយៈពេល១ឆ្នាំ៦ខែ ក្រោមការចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋ ជាអាទិ៍ តាមមាត្រា៤៩៤ និង ៤៩៥ នៃក្រមព្រហ្មទណ្ឌ ។

ជនជាប់ចោទ ឈ្មោះ  គង់ រ៉ៃយ៉ា អាយុ២៦ឆ្នាំ រហស្សនាមនៅក្នុងហ្វេសប៊ុក soriya koko បានសរសេរលើបណ្ដាញទំនាក់ទំនងសង្គមហ្វេសប៊ុកថា "តើមានអ្នក ណាហ៊ានធ្វើ បដិវត្ត ពណ៌ ជាមួយខ្ញុំទេ? ថ្ងៃណាមួយនៅពេលខាងមុខនេះ ខ្ញុំនឹងធ្វើបដិវត្ត ពណ៌ដើម្បីផ្លាស់ប្តូររបបមួយនេះចេញពីសង្គមខ្មែរ ទោះបីជាត្រូវជាប់គុក ឬស្លាប់ ក៏ដោយ ក៏ខ្ញុំត្រូវតែធ្វើដែរ " ។ ក្រោយការប្រកាសនេះ សមត្ថកិច្ចអគ្គស្នងការនគរបាលជាតិ បានឃាត់ខ្លួនយុវជនរូបនេះ ដោយចាត់ទុក ការប្រកាសនេះ ធ្វើឱ្យមានភាពអសន្តិសុខក្នុងសង្គម ៕

• តុលាការ
• សវនាការ
• និស្សិត
• បដិវត្តន៍ពណ៌