រាជធានីភ្នំពេញ៖   នៅព្រឹកថ្ងៃទី១៥ខែធ្នូឆ្នាំ២០១៦ ចៅក្រមសាលាដំបូងរាជធានីភ្នំពេញលោក រស់ ពិសិដ្ឋ បាន សំរេចប្រកាសសាលក្រមក្នុង សំណុំរឿង ជួញដូរដោយខុសច្បាប់នូវសារធាតុញៀន និងបទៈ ចូលរួមក្នុងក្រុមឧក្រិដ្ឋជន ដោយមាន ជនជាប់ចោទ១.ឈ្មោះ លី វីរៈ ភេទប្រុសអាយុ៣៧ឆ្នាំ ២. ទី អៀង ភេទប្រុសអាយុ៤៦ឆ្នាំ និង៣. ស៊ុន ដារ៉ូ ហៅឈិត ភេទប្រុសអាយុ២៣ឆ្នាំ ដាក់ពន្ធនាគារកំណត់រយៈពេល៥ឆ្នាំពីបទៈ ជួញដូរដោយខុសច្បាប់នូវសារធាតុញៀន និងបទៈ ចូលរួមក្នុងក្រុមឧក្រិដ្ឋជន។

ចំណែក៤.ឈ្មោះ លី កុកហ៊ុយ ហៅប៉ា ហ្គិច ភេទប្រុសអាយុ៦៤ឆ្នាំ និង៥. ត្រាវ រិទ្ធារ៉ា ភេទប្រុសអាយុ១៨ឆ្នាំ ដាក់ពន្ធនាគារកំណត់រយៈពេល៤ឆ្នាំ ពីបទៈ ជួញដូរដោយខុសច្បាប់នូវសារធាតុញៀន។

កាលពីរសៀលថ្ងៃទី២៥ខែវិច្ឆិកាឆ្នាំ២០១៦ចៅក្រមសាលាដំបូងរាជធានីភ្នំពេញលោក រស់ ពិសិដ្ឋ បានបញ្ចប់សវនាការក្នុងសំណុំរឿង ជួញដូរដោយខុសច្បាប់នូវសារធាតុញៀន និងបទៈ ចូលរួមក្នុងក្រុមឧក្រិដ្ឋជន និងកាន់កាប់អាវុធដោយគ្មានការអនុញ្ញាត។ 

ជនជាប់ចោទ១.ឈ្មោះ លី វីរៈ ភេទប្រុសអាយុ៣៧ឆ្នាំ បានឆ្លើយនាពេលសវនាការថា ខ្លួនបានស្គាល់ឈ្មោះ លឹម តេង (ស្លាប់) ការនៅជាប់ពន្ធនាគារជាមួយគ្នាក្រោមពេលចេញពន្ធនាគារក៏បានជួបគ្នាដោយចៃដន ពេលនោះក៏បានសូមលេខទូរស័ព្ទគ្នាទៅវិញទៅមក ហើយគាត់ក៏បានតេមកខ្ញុំឲ្យយក់ថ្នាំញៀនទៅឲ្យគេបានបីដង។២.ឈ្មោះ លី កុកហ៊ុយ ហៅប៉ា ហ្គិច ភេទប្រុសអាយុ៦៤ឆ្នាំ បានឆ្លើយបដិសេធថាខ្លួនមិនដឹងរឿងនេះទេ។៣.ឈ្មោះ ទី អៀង ភេទប្រុសអាយុ៤៦ឆ្នាំ បានឆ្លើយបដិសេធដែល ។

នៅពេលសវនាការរសៀលនេះជនជាប់ចោទ៤ឈ្មោះ ស៊ុន ដារ៉ូ ហៅឈិត ភេទប្រុសអាយុ២៣ឆ្នាំ ក៏បានឆ្លើយបដិសេធថាខ្លួនមិនដឹងរឿងនេះទេ និង ៥ឈ្មោះ ត្រាវ រិទ្ធារ៉ា ភេទប្រុសអាយុ១៨ឆ្នាំ បានឆ្លើយថាថ្ងៃកើតហេតុនោះគឺពូ រស់ ឧស្សាហ៍ បានឲ្យខ្ញុំមកថតកាត់គ្រីឡានពីឈ្មោះ លឹម តេង ហើយពេលនោះក៏ត្រូវសមត្ថកិច្ចឃាតខ្លួនតែម្តង។

លោកវីរៈសេនីយ៍ត្រី ប៉ាន់ សុភាព ប្រធានការិយាល័យមន្ទីរប្រឆាំងគ្រឿងញៀននៃកងរាជអាវុធហត្ថរាជធានីភ្នំពេញ បាននិយាយនាពេលសវនាការថា កាលពីថ្ងៃទី២៧ខែមេសាឆ្នាំ២០១៦កម្លាំងខ្ញុំបានឃាតខ្លួនឈ្មោះ លី វីរៈ នៅបឹងឈូក ហើយក៏បានសួរចម្លើយទៅលើជនសង្ស័យគេក៏បានប្រាប់ទីតាំងដែលគេយកគ្រឿងញៀន ពេលនោះខ្ញុំក៏បានតេសូមគោលការពីលោកព្រះរាជអាជ្ញា មាស ច័ន្ទពិសិដ្ឋ ហើយក៏បានចូលទៅឆែកឆេរក៏បានឃាតខ្លួនមនុស្សមួយចំនួន ហើយឈ្មោះ លឹម តេង ក៏បានរត់ឡើងទៅលើផ្ទះ ពេលនោះកម្លាំងរបស់ខ្ញុំក៏បានរត់ទៅតាមក្រោយក៏ត្រូវបាន លឹម តេង បាញ់ត្រូវមួយគ្រាប់ ពេលនោះក៏មានការផ្ទុះអាវុធជាច្រើនគ្រាប់ដើមបាញ់រំដោះកងកម្លាំង ពេលបញ្ជូនទៅមន្ទីពេទ្យកាល់ម៉ែតក៏បានស្លាប់។

តំណាងអយ្យការលោក សៀង សុខ ធ្វើសេចក្តីសដ្ឋានបើយោងទៅតាមការសួរដេញដោល ជនជាប់ចោទទាំងអស់មិនមានផុសតាងដើម្បីដោះបន្ទុកទេ ចឹងតំណាង អយ្យការនៅ តែតម្កល់ បទចោទប្រកាន់នៅដដែល។

គួររំឮកផងដែលថាកាលពីថ្ងៃទី២៧ខែមេសាឆ្នាំ២០១៦នៅចំណុចផ្ទះលេខ៣៧ ផ្លូវលេខ៣៥១ សង្កាត់បឹងកក់ ខណ្ឌទួលគោក រាជធានីភ្នំពេញ មានការចុះបង្ក្រាបករណីជួញដូរគ្រឿងញៀនដោយមានការផ្ទុះអាវុធជាច្រើនគ្រាប់បណ្តាលឲ្យកងកម្លាំងអាវុធហត្ថមួយរូបឈ្មោះ ទៀ ករុណា បានស្លាប់នៅពេលដែលចុះបង្ក្រាប់។ហើយជនដៃដល់ក្នុងអំពើជួញដូរគ្រឿងញៀននេះឈ្មោះ លឹម តេង មេក្លោងក៏បានត្រូវកងកម្លាំងបាញ់ ស្លាប់កន្លែងកើតហេតុដែល៕                                                                    

• តុលាការ
• គ្រឿងញៀន
• បាញ់សម្លាប់
• ពន្ធនាគារ