រាជធានីភ្នំពេញ៖ សាលាដំបូងរាជធានីភ្នំពេញ នៅព្រឹកថ្ងៃទី៣១ ខែតុលា ឆ្នាំ២០១៦បានធ្វើការជំនុំជម្រះសំណុំរឿងជនជាប់ចោទឈ្មោះសម សេរី ជាប្រធានរណសិរ្សរំដោះជាតិខ្មែរ ជាប់ចោទពីបទផ្តើមគំនិតក្នុងអំពើគំនិតក្បត់ និងសមាជិក១០នាក់ជាប់ពាក់ព័ន្ធនឹងករណីចែកចាយសេចក្តីអំពាវនាវរបស់រណសិរ្សរំដោះជាតិខ្មែរ លិខិតអញ្ជើញចូលរួមធ្វើបាតុកម្មប្រឆាំងនឹងវៀតណាម និងការចែក ចាយមួកស្លឹកត្នោតដែលមានស្លាក«រណសិរ្សរំដោះជាតិខ្មែរ» នៅក្នុងរាជធានីភ្នំពេញ ។

ក្នុងពេលសវនាការនេះដែរជនជាប់ចោទទាំង១០និយាយថាពួកគាត់គ្រោអនឹងរៀបចំដាក់ប្តឹង លោកសម រង្សី និងលោកសម សេរី ទាមទារសំណងជម្ងឺចិត្ត ១លានដុល្លារ។ដោយសារតែពួកគាត់បានចាញ់បោកជនទាំងពីរនាក់នេះ។

ជនជាប់ចោទទាំង១០នាក់ទៀត ជាបក្សពួកនិងជាសមាជិកកំពុងជាប់ឃុំខ្លួនមាន១ឈ្មោះ ឈុន ណាគង់ អាយុ២៨ឆ្នាំ មុខរបរគ្រូបង្រៀន ២.ឈ្មោះ លីវ យី អាយុ២៩ឆ្នាំ មុខរបរកសិករ ៣.ឈ្មោះ ឈុន ឆាត អាយុ២៩ឆ្នាំ មុខ របរកម្មករនៅប្រទេសថៃ ៤.ឈ្មោះ ច្រាញ់ ម៉ុច អាយុ២៤ឆ្នាំ មុខរបរនិស្សិតឆ្នាំទី៣ ផ្នែករដ្ឋបាល ។

៥.ឈ្មោះ ឡាត់ លីហេង អាយុ២២ឆ្នាំ មុខរបរកសិករ ៦.ឈ្មោះ ឆាយ វ៉ិច អាយុ៤០ឆ្នាំ មុខរបរគ្រូបង្រៀន ៧.ឈ្មោះ ឈឹម ស្ម័គ្រ អាយុ៥៧ឆ្នាំ មុខរបរកសិករ ៨.ឈ្មោះ ចាន់ រ៉ា អាយុ២៣ឆ្នាំ មុខរបរកសិករ ៩.ឈ្មោះ អាន ចាន់ អាយុ៣៥ឆ្នាំ មុខរបរកសិករ និង១០.ឈ្មោះ ចាន់ ស្នា  អាយុ២៧ឆ្នាំ មុខរបរកសិករ អ្នកទាំង១០ ត្រូវជាប់ចោទពីបទ រួមគំនិតក្បត់ តាមមាត្រា៤៥៣នៃក្រមព្រហ្មទណ្ឌ។

ក្នុងពេលសវនាការ ជនជាប់ចោទទាំង១០រូប បានលើកឡើងថា ប្រសិនតុលាការ រួមនិងមេធាវីថ្មីអាចជួយពួកគេបានចេញពីពន្ធនាគារ ពួកគេនិងចូលរួមបម្រើប្រទេសជាតិ ក្រោមការដឹកនាំរបស់សម្តេចតេជោ ហ៊ុន សែន។ ជនជាប់ចោទទាំង១០នាក់បានលើកឡើងបន្តថា ពួកគេបានយល់ច្រឡំនិងចាញ់បោកពីសំណាក់អ្នកនយោបាយមួយចំនួន ហើយស្តាយក្រោយចំពោះទង្វើរបស់ពួកគេនាពេលកន្លងមក។

ក្រោយបញ្ចប់ការសាកសួរលើជនជាប់ចោទរួច លោកវង្ស ប៊ុនវិសុទ្ធ បានធ្វើសេចក្ដីសន្និដ្ឋានប្តឹងសុំតម្កល់បទចោទផ្តើមគំនិតក្នុងអំពើគំនិតក្បត់លើលោកសម សេរី និងបទ រួមគំនិតក្បត់ លើ ជនជាប់ចោទទាំង១០ខាងលើ ទុកជាបានការដដែល និងស្នើឲ្យតុលាការផ្តន្ទាទោសទៅតាមច្បាប់។

សូមបញ្ជាក់ថា សមាជិករណសិរ្សរំដោះជាតិខ្មែរ ដែលបានបង្កើត និងដឹកនាំដោយឈ្មោះ សម សេរី ជាប្រធានកំពុងរត់គេចខ្លួននៅក្រៅប្រទេសហើយក៏ត្រូវសមត្ថកិច្ចប្រកាសឃាត់ខ្លួនផងដែរ។ចំណែកឯជនជាប់ចោទទាំង១០នាក់ ដែលកំពុងជាប់ឃុំ ពួកគេត្រូវបានចាប់ខ្លួនជាបន្តបន្ទាប់ កាលពីយប់ថ្ងៃទី២២ និងព្រឹកថ្ងៃទី២៣ ខែតុលា ឆ្នាំ២០១៤ ក្នុងរាជធានីភ្នំពេញ។ ក្រោយការឃាត់ខ្លួននគរបាលរឹបអូសបានវត្ថុតាងជាក់ស្តែងមានដូចជា សេចក្តីអំពាវនាវឲ្យចូលរួមធ្វើបាតុកម្ម លិខិតអញ្ជើញ នៃអង្គភាពរបស់រណសិរ្សរំដោះជាតិខ្មែរ និងមួកសម្រាប់ពាក់ធ្វើបាតុកម្មមួយចំនួន៕                               

• តុលាការ
• រណសិរ្ស
• សាលក្រម