ខេត្តសៀមរាប៖ ជនសង្ស័យជាប់ពាក់ព័ន្ធគ្រឿងញៀនចំនួន ០៣នាក់ ត្រូវបានកម្លាំងការិយាល័យនគរបាលការពារអន្តរាគមន៍ខេត្ត និងកម្លាំងនគរបាលប៉ុស្តិ៍រដ្ឋបាលសង្កាត់ស្លក្រាម ធ្វើការចាប់ឃាត់ខ្លួន ដោយមានវត្ថុតាងគ្រឿងញៀនជាប់ខ្លួន។

ករណីនេះធ្វើឡើងកាលពីវេលាម៉ោង ២៣ និង៣០នាទី ឈានចូល ថ្ងៃទី២៦ ខែតុលា ឆ្នាំ២០១៦ នៅភូមិចុងកៅស៊ូ សង្កាត់ស្លក្រាម ក្រុង-ខេត្តសៀមរាប ហើយបានប្រគល់ទៅកម្លាំងការិយាល័យនគរបាលប្រឆាំងគ្រឿងញៀន ធ្វើការសាកសួរបន្ត។

តាមប្រភពពីកម្លាំងនគរបាលប្រឆាំងគ្រឿងញៀន បានឲ្យដឹងថាជនសង្ស័យដែលសមត្ថកិច្ចនគរបាលឃាត់ខ្លួនខាងលើនេះមាន៖

1. ឈ្មោះ ញឹក ប៊ុនហាក់ ហៅសោម ភេទប្រុស អាយុ ២៦ឆ្នាំ មុខរបរលក់ចាប់ហួយ ស្នាក់នៅភូមិចុងកៅស៊ូ សង្កាត់ស្លក្រាម ក្រុង-ខេត្តសៀមរាប (ជួញដូរ)
2. ឈ្មោះយ៉ាន់ បូរី ភេទប្រុស អាយុ ២៨ឆ្នាំ មុខរបរគ្មាន រស់នៅភូមិលាងដៃ ឃុំលាងដៃ ស្រុកអង្គរធំ ខេត្តសៀមរាប (ប្រើប្រាស់)
3. ឈ្មោះ ហៃ សុវណ្ណារិទ្ធ ភេទប្រុស អាយុ ២៤ឆ្នាំ មុខរបរជាងជួសជុលម៉ូតូ ស្នាក់នៅភូមិចុងកៅស៊ូ សង្កាត់ស្លក្រាម ក្រុង-ខេត្តសៀមរាប (ប្រើប្រាស់)

វត្ថុតាងដែលសមត្ថកិច្ចនគរបាលដកហូតបានមានថ្នាំញៀនប្រភេទម៉្សៅក្រាមពណ៌សរម៉ាទឹកកកចំនួន០១កញ្ចប់ មានទម្ងន់២.៥ក្រាម, ទូរស័ព្ទដៃ ០៣គ្រឿង និងម៉ូតូ០១គ្រឿងដែលជនសង្ស័យជិះធ្វើសកម្មភាពប្រព្រឹត្តបទល្មើស។

ជនសង្ស័យនៅពេលដែលសមត្ថកិច្ចនគរបាលជំនាញធ្វើការសាកសួរបានឆ្លើយសារភាពថាពួកគេពិតជាបានប្រើប្រាស់ និងជួញដូរពិតប្រាកដមែន។

ជនសង្ស័យទាំង០៣នាក់និងវត្ថុតាងកម្លាំងសមត្ថកិច្ចនគរបាលកំពុងធ្វើការសាកសួរបន្ថែមនិងកសាងសំណុំរឿងបញ្ជូនទៅសាលាដំបូងខេត្តសៀមរាបនៅព្រឹកថ្ងៃទី២៧ ខែតុលា ឆ្នាំ២០១៦ស្អែកនេះ។

• ជួញដូរគ្រឿងញៀន
• គ្រឿងញៀន
• បញ្ជូនទៅតុលាការ