រាជធានីភ្នំពេញ៖ ប្រភពព័ត៌មានទម្លាយចេញពីមាត់មន្ត្រីជាច្រើនដែលបម្រើការងារនៅក្នុង សាលាខណ្ឌមានជ័យ បានត្អួញត្អែរប្រាប់មកកាន់VOKC ថា បច្ចុប្បន្ននេះសម្ព័ន្ធភាពការងារផ្ទៃ ក្នុង របស់មន្ត្រីសាលាខណ្ឌមានជ័យ គ្រប់ចំណុះជំនាញការិយាល័យ ហាក់មានភាពរញ៉េរញ៉ៃខ្លាំង ពោលគឺ វល់ៗតែម្តងបន្ទាប់ពីការធ្វើការគ្មានអ្នកណាគោរពអ្នកណាធ្វើអ្វីស្រេចតែអំពើរចិត្ត និងចេះតែប្រើមុខយក្សដាក់គ្នារាល់ថ្ងៃជាហេតុធ្វើអោយកិច្ចការងាររដ្ឋបាលមួយចំនួនធំ ក្នុងការបម្រើជូនប្រជាពលដ្ឋគ្រប់ច្រកល្ហក ហាក់នៅមានភាពយឺតយ៉ាវខ្លាំងនិងគ្មានរបៀបរៀបរយនៃកិច្ចការងាររដ្ឋបាលច្បាស់លាស់ត្រឹមត្រូវ ។

ប្រភពព័ត៌មានបន្តអោយដឹងថា ការធ្វើកិច្ចការងារពីសំណាក់មន្ត្រីក្នុងសាលាខណ្ឌមានជ័យ ទាំងទឹកមុខ និងកាយវិការហាក់មិនចុះសម្រុងគ្នានេះគឺកើតឡើងដោយសារការដឹកនាំក៏ដូចជាការរៀបចំនូវរចនាសម្ព័ន្ធការងារនិងតួនាទីការងារផ្សេងៗមួយចំនួនពីថ្នាក់លើពុំបានល្អត្រឹមត្រូវធ្វើអោយមន្ត្រីមួយចំនួនធំ កើតមានសតិអារម្មណ៍ក្នុងចិត្តរហូតកើតជាចិត្តស្អប់កុំកួនគ្នា ឈានដល់ការធ្វើកិច្ចការងារបម្រើប្រជាពលដ្ឋរប្រចាំថ្ងៃហាក់មានភាពរញ៉េរញ៉ៃច្រើន ។

បើយើងក្រឡេកមកមើលឡើងវិញចំពោះមន្ត្រីនាពេលបច្ចុប្បន្ន នៃសាលាខណ្ឌមានជ័យយើងអាចនិយាយបានថា ជាការដាក់តែក្រុមគ្រួសារនិយមមកបម្រើការងារពីសំណាក់ថ្នាក់លើនៃសាលាខណ្ឌ ដែលដាក់មកជាហេតុធ្វើអោយមន្ត្រីចាស់ៗ ដែលមានស្នាដៃច្រើនក្នុងការបម្រើកិច្ចការងារត្រូវអក់អន់ស្រពោនចិត្ត ហើយសង្វាក់ការងារក៏ចេះតែលែងដំណើរការដោយគ្មាននណារស្តាប់នណារឡើយ ។

ជាក់ស្តែងមួយរយះពេលក្រោយមកនេះលោកនាយករដ្ឋបាលថ្មីថ្មោងលោកហ៊ុយ វិរៈ អតីតអ្នកដើរទាត់កូនកញ្ច្រែងតាមផ្សារ ត្រូវបានរងការរិះគន់ជាខ្លាំងៗពីសំណាក់ក្រុមមន្ត្រីជាច្រើនតាមបណ្តាសង្កាត់នាៗ ក៏ដូចជាសាលាខណ្ឌ ពុំមានភាពជាអ្នកដឹកនាំត្រឹមត្រូវពោលគឺរាល់ថ្ងៃលោកតែងធ្វើកិច្ចការងារ រំលោភលើកាតព្វកិច្ចពិតរបស់ខ្លួន។ ប្រភពបន្តថា បច្ចុប្បន្ននាយករដ្ឋបាលរូបនេះបានដើរកាងនូវសំណង់នានាអនុញ្ញាត្តិអោយសាង់សង់នូវសំណង់មួយចំនួនដែលមិនទាន់មានភាពប្រក្រតី ។

មន្ត្រីនៃសាលាខណ្ឌមានជ័យមួយរូបសុំមិនបញ្ចេញឈ្មោះ បានថ្លែងប្រាប់VOKC ថា បច្ចុប្បន្ននេះសំណង់គ្មានច្បាប់មួយចំនួននៅក្នុងខណ្ឌមានជ័យ កំពុងតែសាងសង់យ៉ាងត្រហើងអើងកងដោយការ សាងសង់នោះគឺសង់ឡើងមុនពេលដែលច្បាប់សាងសង់ពុំទាន់ត្រូវបានអនុញ្ញាត្តិមកត្រឹមត្រូវពីថ្នាក់ខណ្ឌ ឬ រាជធានី។ ដែលកត្តាទាំងនេះគឺផ្តើមឡើងពីការបើកភ្លើងខៀវពីសំណាក់អាជ្ញាធរថ្នាក់ ខណ្ឌតែម្តង ។

គួរបញ្ជាក់ថា មួយរយៈក្រោយមកនេះបន្ទាប់ពីមានការឡើងកាន់តំណែងថ្មី ពីសំណាក់លោកពេជ្រ កែវមុនី អតីតអភិបាលរងខណ្ឌទួលគោកនិងបច្ចុប្បន្នជាអភិបាលខណ្ឌមានជ័យ សង្វាក់កិច្ចការងាររដ្ឋ បាលជាច្រើនក្នុងខណ្ឌរួមទាំងកិច្ចការងារផ្សេងៗមួយចំនួនធំហាក់មានភាពរញ៉េរញ៉ៃមន្ត្រីក្រោមឱវាទ ឈ្លោះប្រកែកគ្នាបែកផ្សែងហាក់គ្មានអ្នកណាយល់អ្នកណា ដោយម្នាក់ៗសុទ្ធតែអាងខ្នងក្រាស់រៀងៗខ្លួនជាហេតុធ្វើអោយផ្ទុយប្រាសចាកពីគោលការណ៍របស់រាជរដ្ឋាភិបាលដែលបានចាត់តាំងមន្ត្រីអោយមកសហការគ្នាដើម្បីធ្វើការងារបម្រើប្រជាពលដ្ឋរប៉ុន្តែសម្រាប់សាលាខណ្ឌមានជ័យគឺផ្ទុយស្រលះ៕ លីហេង                                                 

• សម្ព័ន្ធភាព
• ខណ្ឌមានជ័យ
• មន្ត្រី