រាជធានីភ្នំពេញ៖  លោកគ្រីស្យង់ ហ្គោកឺឡាំង ដេប៉ាលីយ៉ែរ (  Christian GAUQUELIN des PALLIERES ) ដែលត្រូវបានគេស្គាល់ថាជាស្ថាបនឹក នៃអង្គការភាពញញឹមនៃកុមារ ដែលជាអង្គការមួយបានជួយកុមារកំព្រានិងគ្មានទីពឹងស្ទើររាប់ពាន់នាក់អោយមានការរៀនសូត្រ និងមានការងារល្អធ្វើក្នុងសង្គមនោះពេលនេះលោកមានទទួលមរណះភាពហើយក្នុងវ័យ៨២ឆ្នាំ ដោយសាររោគាពាធ កាលពីវេលាម៉ោង១៩ និង ០០នាទីយប់ថ្ងៃទី២៤ ខែកញ្ញា ឆ្នាំ២០១៦ នៅទីតាំងអង្គការភាពញញឹមនៃកុមារស្ថិតក្នុងផ្ទះលេខ៤០២ ភូមិទ្រា សង្កាត់ស្តឹងមានជ័យ ខណ្ឌមានជ័យ រាជធានីភ្នំពេញ ។

អង្គការភាពញញឹមនៃកុមារត្រូវបានបង្កើតឡើងតាំពីឆ្នាំ១៩៩៤មកម្លេះ។ អង្គការមួយបង្កើតឡើងដោយប្តីប្រពន្ធជាជនជាតិបារាំង២នាក់ គឺលោកគ្រីស្យង់ ហ្គោកឺឡាំង ដេប៉ាលីយ៉ែរ (  Christian GAUQUELIN des PALLIERES ) និងលោកស្រីម៉ារីហ្វ្រង់ដេប៉ាលីយ៉ែរ  ដែលបង្កើតឡើងក្នុងគោលដៅជួយសង្គ្រោះទៅដល់កុមាររើសសម្រាមកុមារក្រីក្រគ្មានទីពឹងគ្មានផ្ទះជម្រកស្នាក់ប្រាស្រ័យត្រឹមត្រូវឬបាត់បង់ឪពុកម្តាយជាដើមដោយបានយកពួកគេមកអប់រំណែនាំរៀនសូត្រតាមកម្រិតនៃសាលារដ្ឋឬចំណេះដឹងទូទៅនៃកម្រិតសិក្សាបង្ហាត់បង្រៀនទាំងចំណេះដឹងចំណេះធ្វើ និងជំនាញផ្សេងៗដល់ក្មេងនិងជួយរកការងារអោយធ្វើការបញ្ចប់ការសិក្សានៃអង្គការខាងលើ។ បន្ថែមពីនេះក៏មានផ្តល់នូវទីកន្លែងស្នាក់នៅដល់ក្មេងៗដែលភាគច្រើនមកពីជនបទ និងមួយចំនួនជាក្មេងកំព្រាឪពុកម្តាយដោយប្តីប្រពន្ធទាំង២នាក់ ដែលជាស្ថាបនឹកបានប្រើប្រាស់ថវិការផ្ទាល់ខ្លួនទិញដីដ៏ធំមួយតំហំជាង១ហិចតា នឹងបានសាងសង់ជាអាគារសិក្សាបណ្ណាល័យអានសៀវភៅបន្ទប់ហូបចុកស្នាក់នៅនិងអាគាររដ្ឋបាលទូទៅជាច្រើនទៀតដើម្បីសម្រាប់ផ្គត់ផ្គង់ដល់ការរៀនសូត្រ និងរស់នៅរបស់ក្មេងៗ ។

សូមបញ្ជាក់ថា ស្ថាបនឹកទាំង២នាក់ប្តីប្រពន្ធខាងលើនេះមានសញ្ជាតិដើមជាជនជាតិបារាំងពួកគាត់បានចូលមករស់នៅក្នុងទឹកដីនៃប្រទេសខ្មែរតាំងពីឆ្នាំ១៩៩០។ ហើយពួកគាត់បានស្នើរទៅដល់ព្រះមហាក្សត្រដើម្បីសុំចូលជាសញ្ជាតិខ្មែរក៏ត្រូវបានព្រះបរមរតនះកោដ្ឋនរោត្តមសីហនុ ឡាយព្រហស្ថឯកភាព តាំងពីឆ្នាំ២០០៤មកម្លេះ។

យ៉ាងណាមិញបច្ចុប្បន្នសពបានរៀបចំពិធីតម្គល់នៅក្នុងទីតាំងផ្ទាល់របស់អង្គការភាពញញឹមនៃកុមារដើម្បីអោយបងប្អូនញាតិជិតខាងមកគោរពវិញ្ញាណក្ខន្ធសពនិងត្រៀមដឹកយកទៅកាន់វត្តឬស្សីសាញ់នៅវេលារសៀលថ្ងៃច័ន្ធដើម្បីបូជាតាមប្រពៃណី។ សូមបញ្ជាក់ថានៅក្នុងនោះគេសង្គេតឃើញមានវត្តមានសិស្សនិងអតីតសិស្សជាច្រើនដែលធំធាត់នៅក្នុងអង្គការខាងលើបាននាំគ្នាមកគោរពវិញ្ញាណក្ខន្ធលោក ស្យង់ ហ្គោកឺឡាំង ដេប៉ាលីយ៉ែរ (  Christian GAUQUELIN des PALLIERES ) យ៉ាងកុះកុញផងដែរ៕. លីហេង                                             

• អង្គការ
• មរណៈភាព
• រោគាពាធ