ខេត្តកណ្តាល៖ លោក កែវ សុភា មេបញ្ជាការរងយោធាខេត្តកំពត និងត្រូវជាបងបង្កើតរបស់លោក កែវ សុផល មេបញ្ជាការអាវុធហត្ថខេត្តកំពត បានស្លាប់នាយប់មិញ ទី២១ ខែឧសភា ឆ្នាំ២០១៦ បន្ទាប់ពីលោក បើកថយន្តទៅបុកគល់ដើមខ្វិត សង្ស័យងងុយដេកជ្រុល។

គ្រោះថ្នាក់ចរាចរណ៍ខាងលើនេះ បានកើតឡើងនៅវេលាម៉ោង២៣ និង៣៥នាទីថ្ងៃទី២១ខែ៥ឆ្នាំ២០១៦នៅត្រង់ចំណុចភូមិអូអណ្ដូង ឃុំបាគូ ស្រុកកណ្ដាលស្ទឹង ខេត្តកណ្ដាល។

សមត្ថកិច្ចមូលដ្ឋានបានឲ្យដឹងថា នៅមុនពេលកើតហេតុរថយន្តខាងលើម៉ាកToyota Tacoma ពណ៌ទឹកប្រាក់ពាក់ស្លាកលេខ ភ្នំពេញ2A.2489 បើកបរដោយឈ្មោះកែវ  សុភា ភេទប្រុស អាយុ៣៤ឆ្នាំ មានទីលំនៅភូមិ១ឧសភា សង្កាត់កំពង់កណ្ដាល ក្រុងកំពត បានបើកបរក្នុងទិសដៅពី តាខ្មៅទៅខេត្តកំពត(ពីកើតមកត្បូង)ក៏ជ្រុលចង្កូតទៅបុកគល់ខ្វិតនៅក្បែរផ្លូវតែម្ដង។

ករណីនេះបណ្ដាលឲ្យ អ្នកបើកបរស្លាប់នៅកន្លែងកើតហេតុដោយជនរងគ្រោះបើកបរតែម្នាក់ឯង។ចំណែករថយន្តត្រូវបានកម្លាំង ជំនាញយកមករក្សាទុកនៅអធិការដ្ឋានរង់ចាំសាច់ញាតិមកទទួល៕

• មេបញ្ជាការ
• លោក កែវ សុភា