ក្រសួងបរិស្ថានមានកិត្តិយសសូមជម្រាបជូនសាធារណជន និងប្រព័ន្ធផ្សព្វផ្សាយព័ត៌មានឱ្យបានជ្រាបអំពីលទ្ធផលសិក្សាថ្មីៗបន្ថែមទៀត លើករណីទឹកសមុទ្រប្រែពណ៌ទៅជាបៃតងមួយរយៈពេលកន្លងមកនៅឆ្នេរសមុទ្រខេត្តកែប បន្ទាប់ពីក្រសួងបានបញ្ជូនមន្រ្តីជំនាញធ្វើសហការជាមួយអ្នកជំនាញអង្គការ ភាពជាដៃគូក្នុងការគ្រប់គ្រងបរិស្ថានសមុទ្រអាស៊ីបូព៌ា (PEMSEA) ដោយមានជំនួយផ្នែកបចេ្ចកទេសពីWestern Pacific ( WESTPAC) បានចុះពិនិត្យ និងអង្កេតតាមដានស្រាវជ្រាវយ៉ាងយកចិត្តទុកដាក់នៅតាមបណ្តាទីតាំងកើតហេតុ ព្រមទាំងយកទឹកសំណាក់សមុទ្រមកធ្វើការវិភាគរកអត្តសញ្ញាណពួកប្លង់តុង និងសារធាតុគីមីពុលផ្សេងៗ កាលពីថ្ងៃទី១៧ ខែឧសភា ឆ្នាំ ២០១៦។ លទ្ធផលនៃការសិក្សានេះបានបង្ហាញដូចលទ្ធផលដែលមន្ត្រីជំនាញនៃក្រសួងបរិស្ថានរកឃើញនាពេលកន្លងទៅផងដែរ គឺ៖

១-ពពួកប្លង់តុងដែលពិនិត្យឃើញនៅក្នុងទឹកសមុទ្រជាប្រភេទធម្មតានិងពុំមានវត្តមានប្រភេទប្លង់តុងដែលបង្កឱ្យមានផលប៉ះពាល់ដល់សុខភាពមនុស្ស និងសត្វឡើយ។

២-មិនមានសារធាតុគីមីពុលនៅក្នុងទឹកសមុទ្រទេ។

យោងទៅលើលទ្ធផលនៃការស្រាវជ្រាវខាងលើនេះ ក្រសួងបរិស្ថានសន្និដ្ឋានបានថា ការលេចឡើងបាតុភូតទឹកសមុទ្រប្រែព៌ណនេះ (Red tide) ជាបាតុភូតធម្មជាតិ ដែលកើតឡើងដោយសារការប្រែប្រួលអាកាសធាតុនៃការកើនឡើងកម្តៅទូទាំងព្រះរាជាណាចក្រកម្ពុជា និងនៅក្នុងតំបន់ដែលជាហេតុធ្វើឱ្យកើតឡើងពពួកប្លង់តុង (Plankton)  ហើយដែលវាបានវិវត្តបំបែកខ្លួន និងផ្តុំគ្នាទៅជាសារ៉ាយពណ៌បៃតង

ពាសពេញទឹកសមុទ្រ។ ប៉ុន្តែការងាប់វារីសមុទ្រមួយចំនួនតូចកន្លងមក បណ្តាលមកពីទឹកឡើងកម្តៅ ការបាត់បង់អុកស៊ីសែនក្នុងទឹក បង្កឡើងដោយការកើនឡើងនៃពពួកប្លង់តុងទាំងនោះ ដែលជាមូលហេតុធ្វើឱ្យវារីសមុទ្រមួយចំនួនតូចដែលនៅក្នុងទឹករាក់ងាយនឹងងាប់។

អាស្រ័យដូចនេះ ក្រសួងបរិស្ថានសូមជម្រាបជូនដល់សាធារណជនឈប់បារម្ភពីបញ្ហាគុណភាពទឹកសមុទ្រសម្រាប់ការងូតទឹកកម្សាន្ត និងការបរិភោគគ្រឿងសមុទ្រនៅខេត្តកែបចាប់ពីពេលនេះតទៅ។

ចំណែកបងប្អូនប្រជានេសាទក៏អាចបន្តមុខរបរតាមតំបន់គោលដៅនេសាទបានតាមធម្មតាវិញផងដែរ៕

• សេចក្តីប្រកាស
• ក្រសួងបរិស្ថាន