រាជធានីភ្នំពេញ៖   នារីរូបស្រស់វ័យ២៤ឆ្នាំ ត្រូវបានកម្លាំងសមត្ថកិច្ចខណ្ឌមានជ័យ ដឹកនាំដោយលោកម៉េង វិមានតារ៉ា ធ្វើការឃាត់ខ្លួននៅចំណុច សំណង់មិនរៀបរយ ស្ថិតតាមបណ្តោយផ្លូវ៦០ម៉ែត្រ ក្នុងសង្កាត់ចាក់អង្រែលើខណ្ឌមានជ័យ កាលពីវេលាម៉ោង២០ និង៥០នាទីយប់ថ្ងៃទី ១៨ ខែមេសា ឆ្នាំ២០១៧ ក្រោយឆែកឆេររកឃើញមានថ្នាំញៀនជាប់ខ្លួន ។

ជនសង្ស័យមានឈ្មោះ សាន ស្រីទូច ភេទស្រី  អាយុ២៤ ឆ្នាំ មុខរបរមិនពិតប្រាកដ ទីលំនៅផ្ទះគ្មានលេខ ផ្លូវលេខ២៧១ ភូមិ៧ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។

លោកវរសេនីយ៍ត្រី ម៉េង វិមានតារ៉ា អធិការរងនគរបាលខណ្ឌ ទទួលផែនគ្រឿងញៀនអោយដឹងថា មុនការចុះបង្ក្រាប ដំបូងឡើយកម្លាំងនគរបាលបានជិះម៉ូតូល្បាតពួនស្ទាក់ក្នុងមូលដ្ឋានដូចសពដងធម្មតា ដើម្បីការពារសន្តិសុខសុវត្ថិភាពជូនពលរដ្ឋ លុះល្បាតដល់ចំណុចខាងលើក៏ប្រទះឃើញនារីជាជនសង្ស័យកំពុងឈរអើតលើមៗតែម្នាក់ឯងដោយមានស្ពាយកូនកាបូបពីមុខ មើលទៅគួរអោយសង្ស័យ កម្លាំងនគរបាលបាននាំគ្នាសុំធ្វើការឆែកឆេរកាបូបស្ពាយ ក៏ប្រទះឃើញមានថ្នាំញៀនមួយចំនួន ទើបសម្រេចឃាត់ខ្លួនបញ្ចូនមកកាន់ប៉ុស្តិ៍រដ្ឋបាលនគរបាលភ្លាមៗតែម្តង ។

លោកអធិការងបន្តថា ក្នុងការឃាត់ខ្លួនសមត្ថកិច្ចដកហូតបាន ម្សៅក្រាមសថ្លា ហៅម៉ាទឹកកកចំនួន ១៧កូនកញ្ចប់តូច កាបូបស្ពាយពណ៍ខ្មៅ០១ និងទូរស័ព្ទដៃចាស់០១គ្រឿងផងដែរ ។

បច្ចុប្បន្នជនសង្ស័យ ត្រូវបញ្ចូនទៅកាន់អធិការដ្ឋាននគរបាលខណ្ឌមានជ័យ រងចាំកសាងសំណុំរឿងបញ្ចូនទៅតុលាការចាត់ការទៅតាមផ្លូវច្បាប់នៅពេលក្រោយ ៕

• សមត្ថកិច្ច
• ឃាត់ខ្លួន
• ថ្នាំនញៀន