សារព័ត៌មានជាតិកូរ៉េខាងជើងKCNA នៅថ្ងៃទី​៧ខែមីនាបានបានដកស្រងការប្រកាសរបស់ក្រសួងការពារជាតិដែលបានប្រកាសថា រដ្ឋាភិបាលកូរ៉េខាងជើងបានសម្រេច​ហាម ពលរដ្ឋ ម៉ាឡេស៊ី ទាំងអស់ចាកចេញពីពីកូរ៉េខាងជើង រហូតដល់មានការដោះស្រាយ លើបញ្ហាពលរដ្ឋកូរ៉េខាងជើងមួយរូបគឺ គីមជុងណាម ត្រូវគេធ្វើឃាតត្រូវបានដោះស្រាយឲ្យបានសមស្របបំផុត​។

កូរ៉េខាងជើងបញ្ចាក់ថា ការហាមប្រាមខាងលើ​ គឺបណ្តោះអាសន្នតែប៉ុណ្ណោះ ដើម្បីធានាសុវត្ថភាព​ដល់បណ្តាមន្ត្រីការបរទេស និងពលរដ្ឋកូរ៉េខាងជើង​នៅម៉ាឡេស៊ី  មានសុវត្ថភាព​ ក្នុងពេលទំនាក់ទំនងប្រទេសទាំងពីរកំពុងតែតានតឹង។

សារព័ត៌មាន​ KCNA ​បានផ្សាយថា ច្បាប់ហាមប្រាមចាកចេញពីកូរ៉េខាងជើង សម្រាប់ពលរដ្ឋម៉ាឡេស៊ី  គឺទុកឲ្យមន្ត្រីការទូតនិងពលរដ្ឋ​រស់នៅធ្វើការធម្មតា​។ ទីក្រុងព្យុងយ៉ាងក៏បានបកស្រាយ​ពីហេតុការហាមពលរដ្ឋម៉ាឡេស៊ីចាកចេញពីកូរ៉េខាងជើង​ផងដែរ។

កន្លងមកម៉ាឡេស៊ីបានបណ្តេញអគ្គរដ្ឋទូតកូរ៉េខាងជើង​ចេញពីទីក្រុងកូឡាឡំពួរនៅថ្ងៃ ទី​៦ ខែមីនា ។ចំណែកកូរ៉េខាងជើងវិញក៏បានបណ្តេញអគ្គរដ្ឋទូតម៉ាឡេស៊ី​ចេញពីទីក្រុងព្យុងយ៉ាងមុនម៉ោង​១០ព្រឹកថ្ងៃ ទី៧ ខែ​មីនា។

ជាមួយនិងការហាមប្រាមពលរដ្ឋម៉ាឡេស៊ីចាកចេញពីកូរ៉េខាងជើង ត្រូវបានក្រុមអ្នកវិភាគលើកឡើងថា គឺជាការចាប់ជំរិត និងជាគំនៀបការទូត របស់កូរ៉េខាងជើង ក្នុងការចាប់យកពលរដ្ឋប្រទេសដទៃធ្វើជាចំណាប់ខ្មាំង​ក្នុងការចរចារ ទៅលើបញ្ហាអ្វីមួយនោះ។

សកម្មភាពបែបនេះបង្ករក្តីបារម្ភកាន់តែខ្លាំងឡើង​ថែមទៀត ដោយមិនដឹងថា​ពលរដ្ឋទាំងនោះអាចត្រូវកូរ៉េខាងជើងចាប់ខ្លួនដែរឬទេ? ពេលនេះ​មិនទាន់មានតួលេខស្តីពីពលរដ្ឋម៉ាឡេស៊ី ប៉ុន្មានអ្នកនៅលើទឹកដីកូរ៉េខាងជើងនោះដែរ។

ម៉ាឡេស៊ី​ហាមពលរដ្ឋកូរ៉េខាងជើង​ចាកចេញពីម៉ាឡេស៊ី ជាការសងសឹក

ឧប្បនាយករដ្ឋមន្ត្រីនិងជារដ្ឋមន្ត្រី ក្រសួងមហាផ្ទសម៉ាឡេស៊ី លោក​ Ahmad Zahid Hamidi ​នៅថ្ងៃទី​៧ ខែ មីនា បានប្រកាស ហាមប្រាំមន្ត្រីការបរទេស​និងពលរដ្ឋកូរ៉េខាងជើង ទាំងនោះដែលកំពុងស្នាក់នៅប្រទេសម៉ាឡេស៊ី ហាចចាកចេញពីប្រទេសនេះជាដាចខាត។

លោក Ahmad Zahid Hamidi បានបញ្ចាក់ថា​ នៅពេលនេះគេមិនទាន់ដឹងពីចំនួនពិតប្រាកដរបស់ពលរដ្ឋកូរ៉េខាងជើងនៅក្នុងប្រទេសម៉ាឡេស៊ីនៅឡើយ ។​តាមសារព័ត៌មាន​ AFP បានផ្សាយថា​ សហគមន៍ជនជាតិកូរ៉េខាងជើង នៅក្នុងប្រទេសម៉ាឡេស៊ីប្រមាណ​១ពាន់នាក់​។

ក្រោយពេលដែល កូរ៉េខាងជើង បានប្រកាសហាមពលរដ្ឋម៉ាឡេស៊ី​ចាកចេញពីប្រទេសកូរ៉េខាងជើង ។ក្នុងពេលដែលស្ថានភាពទំនាក់ទំនង​ប្រទេសទាំងពីកំពុងតែមានភាពតានតឹង មិនទាន់ដោះស្រាយរួចរាល់ ពាក់ព័ន្ធនិងការស្លាប់របស់លោកគីមជុងណាម។ កន្លងមកម៉ាឡេស៊ី​បានលុបចោលការផ្តល់ទិដ្ឋកា​ដល់ពលរដ្ឋកូរ៉េខាងជើងចូលទៅកាន់ប្រទេសម៉ាឡេស៊ី ៕

• កូរ៉េខាងជើង
• ពលរដ្ឋ
• ម៉ាឡេស៊ី
• ចំណាប់ខ្មាំង