រាជធានីភ្នំពេញ៖  រដ្ឋសភានៃប្រទេសកម្ពុជានៅវេលាម៉ោង៨ៈ០០ព្រឹកថ្ងៃទី២០ ខែកុម្ភៈ ឆ្នាំ២០១៧នេះ បើកកិច្ចប្រជុំវិសាមញ្ញ ដើម្បីពិភាក្សា ពិនិត្យនិងអនុម័តលើសេចក្តីស្នើច្បាប់ ស្តីពីគណបក្សនយោបាយដែលកិច្ចប្រជុំនេះធ្វើឡើងក្រោមអធិបតីភាព សម្តេច ហេង សំរិន ប្រធានរដ្ឋសភា។

តែយ៉ាងណាក៏ដោយ កាលពីថ្ងៃទី១៩ខែកុម្ភៈឆ្នាំ២០១៧ ក្រុមតំណាងរាស្រ្តគណបក្សសង្រ្គោះជាតិសរុប៥៥រូប បានចេញសេចក្តីថ្លែងការណ៍មួយ ដោយប្រកាសថា ខ្លួននឹងមិនចូលរួមកិច្ចប្រជុំនេះទេ។ព្រោះគណបក្សសង្រ្គោះជាតិទាមទារឲ្យមានការពន្យាពេលក្នុងការអនុម័តនិងចង់ឲ្យមានបើកសិក្ខាពិនិត្យដេញដោលសិនមុនដាក់ចូលរដ្ឋសភាសុំសេចក្តីអនុម័ត។

សូមបញ្ជាក់ថា សំណើសុំធ្វើវិសោធនកម្មលើច្បាប់ ស្តីពីគណបក្សនយោបាយ ត្រូវបានរៀបចំដោយក្រុមតំណាងរាស្រ្តគណបក្សប្រជាជនកម្ពុជាចំនួន៦០រូប ហើយបានចូលមកដល់រដ្ឋសភា កាលពីថ្ងៃទី១០ ខែកុម្ភៈ ឆ្នាំ២០១៧។ ការរៀបចំសំណើសុំធ្វើវិសោធនកម្មច្បាប់នេះ បានធ្វើបន្ទាប់ពីមានការលើកឡើង ដោយសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅក្នុងកិច្ចប្រជុំសភាវិសាមញ្ញ កាលពីថ្ងៃទី៣១ ខែមករា ឆ្នាំ២០១៧។

កាលពីថ្ងៃទី៣១មករាឆ្នាំ២០១៧សម្តេចតេជោ ហ៊ុន សែន បានស្នើឱ្យកំណត់លក្ខខ័ណ្ឌតឹងរឹងជាងមុន សម្រាប់ច្បាប់ស្តី ពី គណបក្សនយោបាយ ក្នុងនោះច្បាប់ថ្មីនេះ នឹងមិនអនុញ្ញាតឲ្យអ្នកមានទោស ឬទណ្ឌិត ធ្វើជាប្រធាន ឬអនុប្រធានបក្សនយោបាយឡើយ ហើយបើទោសធ្ងន់ធ្ងរទៀតនោះ អាចឈានដល់ការរំលាយបក្ស និងហាមឃាត់ថ្នាក់ដឹកនាំបក្ស មិនឲ្យធ្វើសកម្មភាព នយោបាយ ថែមទៀត។

ឯកឧត្តមហូរ វ៉ាន់ តំណាងរាស្រ្តគណបក្សសង្រ្គោះជាតិបានថ្លែងប្រាប់កាសែតនៅរដ្ឋសភាកាលពីពេលថ្មីៗនេះថាគណបក្សសង្រ្គោះជាតិបានស្នើសុំពន្យាពេលក្នុងការពិនិត្យនិងពិភាក្សាលើសេចក្តីស្នើច្បាប់នេះសិន។ព្រោះច្បាប់នេះគួរត្រូវបានដាក់ចូលទៅក្នុងសិក្ខាសាលាដើម្បីជជែកវែកញែកដេញដោលគ្នាសិន។

ចំពោះបញ្ហសេចក្តីស្នើច្បាប់នេះគណបក្សប្រឆាំងបានើលើកឡើងថាគណបក្សកាន់អំណាចមានបំណងគាបសង្កត់មកលើគណបក្សសង្គ្រោះជាតិនិងចង់រំលាយគណបក្សសង្រ្គោះជាតិដោយសំអាងលើឯកឧត្តមសម រង្ស៊ីដែលត្រូវបានតុលាការផ្តន្ទាទោសនិងបានលាលែងជាពីគណបក្សសង្រ្គោះជាតិដើម្បីការពារគណបក្សសង្រ្គោះជាតិប្រឆាំងនឹងការរំលាយបក្សសង្រ្គោះជាតិ៕                                                                                 

• រដ្ឋសភា
• ពិនិត្យ
• គណបក្ស
• នយោបាយ