រាជធានីភ្នំពេញ៖ ប្រតិបត្តិការចុះចាប់ទាំងព្រឹកព្រលឹម វេលាម៉ោង៦ស្រាងៗ ថ្ងៃទី៤ ខែមករា ឆ្នាំ២០១៧ កម្លាំងនគរបាល នៃអគ្គនាយកដ្ឋានអន្តោប្រវេសន៍បានបន្តចុះត្រួតពិនិត្រការរស់ និងធ្វើការដោយខុសច្បាប់ពីសំណាក់ជនជាតិវៀតណាម នៅចំណុចភូមិកណ្តាលទី១ សង្កាត់ច្បារអំពៅទី២ ខណ្ឌច្បារអំពៅ ។

ការចុះត្រួតពិនិត្យខាងលើ ដឹកនាំដោយលោកឧត្តមសេនីយ៍ទោអ៊ុក ហៃសីឡា ប្រធាននាយកដ្ឋានស៊ើបអង្គេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ និងមានការសម្របសម្រួលឯកភាពពីព្រះរាជអាជ្ញាររងអមសាលាដំបូងរាជធានីភ្នំពេញលោកសៀងសុខ ។

ជាលទ្ធិផលចំពោះមុខសមត្ថកិច្ចបានធ្វើការត្រួតពិនិត្រលើេជនជាតិវៀតណាមចំនួន ៤៣នាក់ ក្នុងនោះស្រី១៩នាក់ ប៉ុន្តែក្នុងចំណោមនោះមាន១៨នាក់ ស្រី៩នាក់ ពុំុមានលិខិតឆ្លងដែន និងឯកសារពាក់ព័ន្ធមួយចំនួនត្រឹមត្រូវ ដូច្នេះហើយពួកគេទាំង១៨នាក់ ត្រូវឃាត់ខ្លួនភ្លាមៗបញ្ចូនទៅកាន់អគ្គនាយកដ្ឋានអន្តោប្រវេសន៍ដើម្បីចាត់ការតាមនីតិវិធី ។

ឧត្តមសេនីយ៍ទោអ៊ុក ហៃសីឡា ប្រធាននាយកដ្ឋានស៊ើបអង្គេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ អោយដឹងថា ចំពោះជនបរទេសណា ដែលចូលមករស់នៅ និងធ្វើការដោយខុសច្បាប់ ដោយគ្មានភ្ជាប់ជាមួយលិខិតឆ្លងដែន ឬឯកសារពាក់ព័ន្ធផ្សេងនោះ ពួកគេនឹងត្រូវឃាត់ខ្លួនបញ្ចូនទៅកាន់អគ្គនាយកដ្ឋានអន្តោប្រវេសន៍ ដើម្បីកសាងសំណុំបែបបទស្នើរទៅក្រសួងមហាផ្ទៃសុំធ្វើការបណ្តេញចេញពីកម្ពុជា ទៅកាន់ប្រទេសដើមខ្លួនវិញ នៅពេលខាងមុខ ៕ លីហេង

• ឃាត់ខ្លួន
• ជនជាតិវៀតណាម
• ខុសច្បាប់