រាជធានីភ្នំពេញ៖  នាវេលាព្រឹកថ្ងៃទី២៦ ខែវិច្ឆិកា ឆ្នាំ២០១៦នេះ គណបញ្ជាការឯកភាពខណ្ឌមានជ័យដឹកនាំដោយលោកឌី រ័ត្នខេមរុណ អភិបាលរងខណ្ឌមានជ័យដោយមានការឯកភាពពីព្រះរាជអាជ្ញារងអមសាលាដំបូងរាជធានីភ្នំពេញ លោកសេង ហៀង និងមានការចូលរួមពីសំណាក់អធិការរងទទួលជំនាញព្រហ្មទណ្ឌខណ្ឌ២រូប គឺលោកអនុសេនីយ៍ឯកហួរ ម៉េងវ៉ា និងលោកវរសេនីយ៍ត្រី ម៉េង វិមានតារា បានបើកការចុះបង្ក្រាបទីតាំងបញ្ចល់មាន់មួយកន្លែង ស្ថិតនៅចំណុចដីឡូតិ៍គ្មានលេខ ក្នុងក្រុមទី១៧ ភូមិឬស្សី សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។

ជាលទ្ធិផល ក្នុងការចុះបង្ក្រាបកម្លាំងចម្រុះ បានធ្វើការឃាត់ខ្លួនអ្នកបញ្ជល់ ( អ្នកលេង ) ចំនួន ៧នាក់ក្នុងនោះមានម្នាក់ជាម្ចាស់ទីតាំង មាន់ជល់ចំនួន៤ក្បាល ទ្រុង២ និងម៉ូតូចំនួន៥គ្រឿង។ ក្រោយការឃាត់ខ្លួនពួកគេនឹងវត្ថុតាងត្រូវបញ្ចូនទៅកាន់ប៉ុស្តិ៍រដ្ឋបាលនគរបាលស្ទឹងមានជ័យរងចាំបន្តនីតិវិធីទៅតាមផ្លូវច្បាប់ ។

សូមបញ្ជាក់ថា ជនទាំង៧នាក់ដែលត្រូវឃាត់ខ្លួនមានឈ្មោះ ទី១ឈ្មោះប៊ុត រីម ទី២ឈ្មោះកឹម កាន ទី៣ឈ្មោះឈួន ម៉េងហ៊ង ទី៤ឈ្មោះលីម លៃលិច ទី៥ឈ្មោះនេត រតនះ ទី៦ឈ្មោះឯម នាង និងទី៧ឈ្មោះសែ សុភក្ត្រ។

លោកឌី រ័ត្នខេមរុណ អភិបាលរងខណ្ឌមានជ័យដែលដឹកនាំកម្លាំងចុះបង្ក្រាបផ្ទាល់បានបញ្ជាក់អោយដឹងថា មុនឈានដល់ការបង្ក្រាប កម្លាំងអាជ្ញាធរបានស្រាវជ្រាវរហូតកំណត់ពីទីតាំងដែលក្រុមអ្នកលេងណាត់គ្នាបញ្ជល់មាន់ ទើបនៅវេលាថ្ងៃខែឆ្នាំខាងលើ លោកបានអោយកម្លាំងសម្ងាត់ចូលមកលបលួចមើលឃើញថា ពិតជាមានការជល់ពិតប្រាកដមែន ទើបសម្រេចសុំគោលការណ៍ពីព្រះរាជអាជ្ញារងអមសាលាដំបូងរាជធានីភ្នំពេញ រួមទាំងមានការសហការចូលរួមពីកម្លាំងនគរបាលមូលដ្ឋានទាំងថ្នាក់ប៉ុស្តិ៍និងខណ្ឌបើកការចុះបង្ក្រាបបានជាក់ស្តែងតែម្តងទៅខណះពួកគេកំពុងបញ្ជល់ ៕

• បង្ក្រាប
• ឃាត់ខ្លួន
• បញ្ជល់មាន់