រាជធានីភ្នំពេញ៖  ភូមិគ្រឹះមេកន្ទុយលេខម្នាក់ដ៍ល្បីត្រូវបានកម្លាំងនគរបាលជំនាញខណ្ឌពោធិ៍សែនជ័យ ចុះប្រតិបត្តិការបង្ក្រាបចាប់ឃាត់ខ្លួន បានកាលពីវេលាម៉ោង៣និង៥០នាទីរសៀលថ្ងៃទី២៩ ខែតុលា ឆ្នាំ២០១៦ ស្ថិតនៅផ្ទះមួយកន្លែង ក្នុងភូមិត្រពាំងក្រសាំង ខណ្ឌពោធិ៍សែនជ័យ ។

តាមនគរបាលខណ្ឌពោធិសែនជ័យបានឲ្យដឹងថា បន្ទាប់ពីមានសេចក្តីរាយការណ៍ពីប្រជាពលរដ្ឋក្នុងមូលដ្ឋានជុំវិញការបើកល្បែងស៊ីសងខុសច្បាប់ កើតមានតាមបណ្តាមូលដ្ឋាន ដែលបង្កឲ្យអសន្តិសុខ ឈានទៅដល់ប្រព្រឹត្តបទល្មើសផ្សេងៗ ។

ការចុះបង្រ្កាបនេះដោយមានបញ្ជា ពីអគ្គស្នងការនគរបាលជាតិ និងក្រោមការបញ្ជាពីលោក វរសេនីយ៍ឯក យឹម សារ៉ាន់ អធិការខណ្ឌពោធិ៍សែនជ័យ ដើម្បីទប់ស្កាត់ បង្ក្រាបរាល់បទល្មើសផ្សេងៗ ដើម្បីរក្សាសន្តិសុខជូនប្រជាពលរដ្ឋ និងសង្គម ទើបកម្លាំងនគរបាលជំនាញ ខណ្ឌពោធិ៍សែនជ័យ សម្របសម្រួលដោយលោក គុជ គឹមឡុង ព្រះរាជអាជ្ញារង សាលាដំបូងរាជធានីភ្នំពេញ ។

សមត្ថកិច្ចចុះប្រតិបត្តិការបង្ក្រាបដល់ទីតាំងផ្ទះកត់កន្ទុយលេខ ត្រង់ចំណុចភូមិខាងលើ ឃាត់ខ្លួនមេកន្ទុយលេខបានម្នាក់ រឹមអូសវត្ថុតាង ក្រដាសកត់ឆ្នោត តារាងកន្ទុយលេខ សម្ភារៈប្រើក្នុង កត់ឆ្នោតមួយចំនួនធំ និងលុយមួយចំនួនទៀត ។

ជនសង្ស័យជាមេកន្ទុយលេខ មានឈ្មោះ អាង សារុំ ភេទប្រុស អាយុ៣១ឆ្នាំ ជាម្ចាស់ទីតាំង ផ្ទះកើតហេតុខាងលើ ។ក្រោយពីឃាត់ខ្លួនបានជនសង្ស័យ ត្រូវបាននាំខ្លួនទៅកាន់ផ្នែកជំនាញអធិការដ្ឋានខណ្ឌពោធិ៍សែនជ័យ ដើម្បីសាកសួរ និងចាត់ការទៅតាមនីតិវិធី ៕                                               

• នគរបាល
• ពោធិ៍សែនជ័យ
• មេកន្ទុយលេខ