មន្រ្តីជាន់ខ្ពស់នៃក្រសួងការពារជាតិថ្លែងថា ការគិតខុសមួយជំហ៊ាន ប្រទេសជាតិនឹងអន្តរាយ

ព័ត៌មានជាតិ | ថ្ងៃសៅរ៍ ទី១៣ កុម្ភៈ ២០១៦, ០៨:៥៨ | ៨៦៧ ដង | ចុចបញ្ចេញមតិ (០)

ភ្នំពេញ៖ មន្រ្តីជាន់ខ្ពស់ក្រសួងការពារជាតិបានថ្លែងថា ការគិតខុសមួយជំហ៊ាន ប្រទេសជាតិនឹងអន្តរាយ ខ.ភ.ម មិនត្រូវបណ្តែតបណ្តោយឲ្យកើតមានបដិវត្តព៌ណនៅកម្ពុជានោះឡើយ។នេះបើយោងតាមព័ត៌មានរបស់ក្រសួងការពារជាតិ ដែលបានដកស្រង់ប្រសាសន៍លោកនាយ ឧត្តមសេនីយ៍ មាស សាវ៉ន អគ្គនាយកអគ្គនាយកដ្ឋានយោធសេវា ក្រសួងការពារជាតិនៅក្នុងឱកាសផ្សព្វផ្សាយការងារអប់រំចិត្តសាស្ត្រនិងសភាពការណ៍ថ្មីៗ សម្រាប់ឆមាសទី១ ឆ្នាំ២០១៦ នៅសាលានាយទាហានសកម្ម (ត្មាតពង ស្ថិតក្នុងស្រុកសំរោងទង ខេត្តកំពង់ស្ពឺ)នាព្រឹកថ្ងៃទី១២ខែកុម្ភៈឆ្នាំ២០១៦។

ក្រសួងការពារជាតិបានលើកឡើងថាក្នុងសន្ទរកថាស្វាគមន៍របស់លោកឧត្តមសេនីយ៍ឯក ផុន សាវ៉ាត នាយកសាលានាយទាហានសកម្ម បានឲ្យដឹងថា បច្ចុប្បន្នសាលាកំពុងហ្វឹកហ្វឺននិស្សិតនាយទាហានសកម្ម ៤ ជំនាន់ ក្នុងនោះមានជំនាន់ទី១៧សិក្សាឆ្នាំទី៤បច្ចុប្បន្នកពុងសិក្សាជំនាញឆត្រយោង ហើយគ្រោងនឹងបញ្ចប់វគ្គសិក្សារយៈពេល៤ ឆ្នាំ ខែកុម្ភៈ ឆ្នាំ២០១៧។ជំនាន់ទី១៨ សិក្សាឆ្នាំទី៣, ជំនាន់ទី១៩ សិក្សាឆ្នាំទី២និងជំនាន់ទី២០គ្រោងនឹងមកដល់សាលានាព្រឹកថ្ងៃទី១៦ខែកុម្ភៈ ឆ្នាំ២០១៦ខាងមុខ។ដោយឡែកការអប់រំចិត្តសាស្ត្ររៀបរយបានចំនួន១០លើកផងដែរ។

លោកនាយឧត្តមសេនីយ៍មាស សាវ៉ន បានថ្លែងនូវការកោតសរសើរនិងវាយតម្លៃខ្ពស់ចំពោះស្មាដៃ និងសមទ្ធិផលនានារបស់សាលានាយទាហានសកម្ម ដែលខិតខំសម្រេចបាននាពេលកន្លងមក ជាពិសេសនៅលើការបណ្តុះបណ្តាល សិស្សនាយទាហានសកម្មនៃកងយោធពលខេមរភូមិន្ទ(ខ.ភ.ម)។

លោកនាយឧត្តមសេនីយ៍បានលើកឡើងពីសភាពការណ៍ជាតិអន្តរជាតិពិភពលោកនិងនៅក្នុងតំបន់ ព្រមទាំងបានរំលឹក និងលើកឡើងផងដែរអំពីការវិវត្តន៍រីកចម្រើននៃការកែទម្រង់ ខ.ភ.ម នៅគ្រប់ដំណាក់កាល គិតពីថ្ងៃចាប់ បដិសន្ធិចេញពីកងទ័ពបារាំង ខ្មែរនាឆ្នាំ១៩៥៣ រហូតមកដល់បច្ចុប្បន្ន និងសមិទ្ធផលនានារបស់ខ.ភ.ម សម្រេចបាន លើកិច្ចការពារជាតិមាតុភូមិ ប្រជាជន និងកសាងអភិវឌ្ឍន៍ជាតិ។

លោកនាយឧត្តមសេនីយ៍បានបញ្ជាក់ថា ចាប់តាំងពី ឆ្នាំ១៩៩៣ មក ខ.ភ.ម បានធ្វើការកំណែទម្រង់ធំៗមានចំនួន៤ដំណាក់កាលផងដែរ ដើម្បីឲ្យសមស្របទៅ នឹងសភាពការណ៍ និងការពង្រឹងគុណភាពកងទ័ព ។ក្នុងនោះបានធ្វើការកាត់ រំសាយកម្លាំងទ័ព ៧០% នៅគ្រប់ភាគី ធ្វើការកាត់ឋានន្តរសក្តិចំនួនពីរសក្តិ ថ្នាក់ ឧត្តមសេនីយ៍ចំនួន ២០០០ នាក់មកនៅត្រឹមចំនួន ២០០នាក់និងការធ្វើសមាហរណកម្ម កម្លាំងកងទ័ពអតីតខ្មែរក្រហមចូលមកក្នុងជួរខ.ភ.ម នៅក្នុងតំបន់អន្លុងវែង ប៉ៃលិន និងតំបន់ម៉ាឡៃ ។

លោកនាយឧត្តមសេនីយ៍បានលើកឡើងថាក្រោមនយោបាយឈ្នះៗរបស់សម្តេចតេជោហ៊ុនសែន ដោយរក្សាតួនាទីមុខតំណែង និងអត្ថប្រយោជន៍របស់ពួកគេ។ លោកបានគូសបញ្ជាក់ថា សន្តិភាព ស្ថេរភាពនយោបាយ និងការអភិវឌ្ឍន៍ដែល ទទួលបានរហូតមកដល់ សព្វថ្ងៃនេះ គឺបានមកពីការធ្វើពលីកម្មដ៏ធំធេងរបស់ នាយទាហាននាយទាហានរង និង ពលទាហាន នៃខ.ភ.ម ជាពិសេសនាយទាហានសកម្ម ដែលជាអ្នកបន្តវេន ជាទំពាំងស្នងឬស្សី ជាស្នូលនិង ជាឆ្អឹងខ្នងរបស់ប្រទេសជាតិដ៏រឹងមាំទៅថ្ងៃអនាគត ត្រូវមានឆន្ទៈ និង មនសិកាស្នេហាជាតិ ការពារបូរណៈភាពទឹកដី ការពារសន្តិសុខជូនប្រជាជន ការពារព្រះមហាក្សត្រ រដ្ឋធម្មនុញ្ញ និង ការពាររាជរដ្ឋាភិបាល ដែលបានកើតចេញពីការបោះឆ្នោតស្របច្បាប់របស់ប្រជាពលរដ្ឋ។