រាជធានីភ្នំពេញ ៖ មុខសញ្ញាចែកចាយគ្រឿងញៀនប្រុសស្រីយ៉ាងសកម្ម២នាក់ ត្រូវបានកម្លាំងសមត្ថកិច្ច នៃអធិការដ្ឋាននគរបាលខណ្ឌច្បារអំពៅ សហការជាមួយកម្លាំងសមត្ថកិច្ចប៉ុស្តិ៍រដ្ឋបាលព្រែកប្រា ធ្វើការបង្ក្រាបនៅចំណុច ខ្ទមក្នុងដីឡូត៍គ្មានលេខ ភូមិអូរអណ្តូង១ សង្កាត់ព្រែកប្រា ខណ្ឌច្បារអំពៅ កាលពីវេលាម៉ោង ១០  និង ៤៥នាទីព្រឹកថ្ងៃទី២៦ ខែកុម្ភះ ឆ្នាំ២០១៦ ។

មុខសញ្ញាទាំង២នាក់ ទី១មានឈ្មោះសូ សឿត ភេទប្រុស អាយុ៣២ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅក្នុងខ្ទមដីឡូត៌គ្មានលេខ ភូមិអូរអណ្តូង1 សង្កាត់ព្រែកប្រា   ខណ្ឌច្បារអំពៅ ។ ទី២ មានឈ្មោះ ម៉ាត់ ហ្វារីតាស់ ភេទស្រី អាយុ២៤ឆ្នាំ ជនជាតិខ្មែរឥស្លាម មុខរបរ មិនពិត ប្រាកដ ស្នាក់នៅខ្ទមខាងលើជាមួយគ្នា ។

មន្ត្រីនគរបាលអោយដឹងថា មុន ឈានដល់ការចុះបង្ក្រាប គឺកម្លាំងនគរបាលផ្នែកព្រហ្មទណ្ឌ នៃអធិការដ្ឋានខណ្ឌច្បារអំពៅ បានបើកការស្រាវជ្រាវតាមដានមុខសញ្ញាខាងមកអស់រយះពេលជាយូរ ។ រហូតមកទល់នឹងវេលាកើតហេតុ ដោយទទួលបានប្រភពច្បាស់ការណ៍ពីទីតាំងលាក់ខ្លួនរបស់ជនសង្ស័យ ទើប ធ្វើការសហការជាមួយកម្លាំងនគរបាលមូលដ្ឋាន បើកប្រតិបត្តិការចុះមកធ្វើការបង្ក្រាបបានជាក់ស្តែងតែម្តងទៅ ដោយឃាត់ខ្លួនមុខសញ្ញាគ្រឿងញៀនចំនួន០២នាក់ ។

ក្នុងការឃាត់ខ្លួននោះ សមត្ថកិច្ចធ្វើដកហូតម្សៅក្រាមពណ៍សថ្លា ១០កញ្ចប់ថង់តូច ដែកកេះ៤ និងឧបករណ៍ ក៏ដូចជាសម្ភារះមួយចំនួនធំ ។ បច្ចុប្បន្ន ជនសង្ស័យ និងវត្ថុតាង ត្រូវបញ្ចូនទៅឃុំខ្លួនបណ្តោះអាសន្ន នៅអធិការដ្ឋាននគរបាលខណ្ឌច្បារអំពៅ រងចាំកសាងសំណុំរឿង បញ្ចូនទៅតុលាការ ចាត់ការទៅតាមនីតិវិធីច្បាប់ ៕

• បង្ក្រាបមុខសញ្ញា
• ថ្នាំញៀន