រាជធានីភ្នំពេញ៖  កាលពីរសៀលថ្ងៃទី០៧ មិនា ២០១៧ កម្លាំងសមត្ថកិច្ចកងរាជអាវុធហត្ថរាជធានីភ្នំពេញ បានបញ្ជូនខ្លួនយុវជនម្នាក់ជាបុគ្គលិកក្រុមហ៊ុន ផាត ហ្វាញឌឺ ត្រាវែល ទៅតុលាការ ពាក់ព័ន្ធនបទរំលោភលើទំនុកចិត្ត រឿងស៊ីដាច់ប្រាក់ក្រុមហ៊ុន ៣៧៥០៤ (បីម៉ឺនប្រាំពីរពាន់ប្រាំរយបួនដុល្លារ) ។

យុវជនសង្ស័យរូបនោះឈ្មោះ សំ លីហេង អាយុ២៥ឆ្នាំ ស្នាក់នៅផ្ទះលេខ១៦៨ សង្កាត់ទួលស្វាយព្រៃ១ ខណ្ឌចំការមន រាជធានីភ្នំពេញ ។ ទាក់ទិនការឃាត់ខ្លួនយុវជនរូបនេះបញ្ជូនទៅសាលាដំបូងរាជធានីភ្នំពេញ ត្រូវបានមន្រ្តីកងរាជអាវុធហត្ថឲ្យដឹងថា ជាការធ្វើឡើងតាមពាក្យបណ្តឹងរបស់ឈ្មោះ ឈឺន ហ្វូជូវ  ភេទប្រុស ៤៦ឆ្នាំ ជនជាតិចិន មុខរបរពាណិជ្ជករ តំណាងឲ្យក្រុមហ៊ុន ផាត ហ្វាញឌឺ ត្រាវែល ។ 

ក្រោយពីឃាត់ខ្លួនយុវជនជាជនសង្ស័យឈ្មោះ សំ លីហេង បានសារភាពថា ខ្លួនបានចូលបំរើការងារនៅក្រុមហ៊ុនខាងលើនេះ ចំនួន៥ខែហើយ មានមុខងារជាផ្នែកលក់សំបុត្រ និងទទួលបានប្រាក់ខែ៦៥០ដុល្លារអាមេរិកក្នុង១ខែ ។

នៅក្នុងអំឡុងខែកុម្ភៈ ដល់ថ្ងៃទី៤ ខែមីនា ឆ្នាំ២០១៧ ខ្លួនបានលក់សំបុត្រយន្តហោះឲ្យអតិថិជនចំនួន ១៦សន្លឹក សរុបជាទឹកប្រាក់ចំនួន ៦៤១៤ ដុល្លារអាមេរិក តែខ្លួនពុំទាន់បានប្រមូល ប្រាក់ពីអតិថិជននោះយកទៅបង់ឲ្យក្រុមហ៊ុនទេ ខ្លួនបានយកលុយនេះដើរចាយវាយខ្លះ និងខ្លះនៅអតិថិជនមិនទាន់ទូទាត់ បានធ្វើឲ្យវ័នករជាមួយក្រុមហ៊ុន ។

មន្រ្តីកងរាជអាវុធហត្ថបន្តថា ភាគីខាងក្រុមហ៊ុនបានហៅឈ្មោះ សំ លីហេង ទៅនិយាយច្រើនលើកច្រើនសារហើយ ឲ្យដោះស្រាយបំណុលនោះជាមួយក្រុមហ៊ុន ប៉ុន្តែឈ្មោះ សំ លីហេង បានប្រងើយកន្តើយថែមទាំងគេចវេសមិនចូលខ្លួន ទើបក្រុមហ៊ុនដាក់ពាក្យបណ្តឹងទៅសមត្តកិច្ចឲ្យឃាត់ខ្លួន ។                                               

• សមត្ថកិច្ច
• សំបុត្រយន្តហោះ
• តុលការ