រាជធានីភ្នំពេញ៖  ព្រះករុណា ព្រះបាទសម្តេចព្រះ នរោត្តម សីហមុនី ព្រះមហាក្សត្រនៃកម្ពុជា នៅល្ងាចថ្ងៃទី៧ខែធ្នូឆ្នាំ២០១៦ បានចេញព្រះរាជក្រឹត្យលើកលែងទោសលោកស៊ាងចែតមេឃុំស្រកស្រុកកំពង់សៀមខេត្តកំពង់ចាមហើយ តាមសំណើរសម្តេចនាយករដ្ឋមន្រ្តី ហ៊ុន សែន នៅល្ងាចថ្ងៃទី០៧ ខែធ្នូ ឆ្នាំ២០១៦នេះ។

តុលាការបានឃុំខ្លួនលោក ស៊ាង ចែត មេឃុំគណបក្ស សម រង្ស៊ី ដែលត្រូវបានសាលាដំបូងរាជធានីភ្នំពេញនៅក្នុងពន្ធនាគារព្រៃស ពាក់ព័ន្ធនឹងករណីបទចោទ សូកប៉ាន់សាក្សី ក្នុងរឿងអាស្រូវផ្លូវភេទរបស់លោក កឹម សុខា និងកញ្ញា ខុម ចាន់តារ៉ាទី ហៅស្រីមុំនោះ ។

ការចេញព្រះរាជក្រឹត្យលើកលែងទោស ដល់មេឃុំលោក ស៊ាង ចែត នាពេលនេះ បានធ្វើឡើងបន្ទាប់ពីលោក កឹម សុខា ដែលទើបទទួលបានព្រះរាជទាន ការលើកលែងទោសពីព្រះមហាក្សត្រ ចូលប្រជុំសភាពេញអង្គ និងបានជួបចរចាពិភាក្សាជាមួយ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងសម្តេចក្រឡាហោម ស ខេង នៅវិមានរដ្ឋសភា នាព្រឹកថ្ងៃទី៧ ខែធ្នូ ឆ្នាំ២០១៦នេះ។

សូមរំលឹកថា លោក ស៊ាង ចែត មេឃុំស្រក ស្រុកកំពង់សៀម ខេត្តកំពង់ចាម កូ គណបក្ស សម រង្ស៊ី នោះ ត្រូវបានសមត្ថកិច្ចអង្គភាពប្រឆាំងអំពើពុករលួយឃាត់ខ្លួន កាលពីខែមេសា ឆ្នាំ២០១៦ តាមចម្លើយដែលអះអាងនៅក្នុងលិខិតចំហររបស់កញ្ញា ខុម ចាន់តារ៉ាទី ហៅ ស្រីមុំ។ ក្នុងលិខិតស្រីមុំ បានចោទលោក ស៊ាង ចែត ថាបានយក លុយ៥០០ដុល្លារទៅឱ្យម្តាយរបស់នាង ដើម្បីឱ្យគាត់ជួយប្រាប់រូបនាង កុំឱ្យនិយាយការពិត ប្រាប់សមត្ថកិច្ច អំពីទំនាក់ទំនងរវាងនាង និងលោក កឹម សុខា ដែលសមត្ថកិច្ចសង្ស័យថា ជារឿងសញ្ចារកម្ម។

គេចាំថាកាលពីថ្ងៃទី០៥ ខែធ្នូ ឆ្នាំ២០១៦ថ្មីៗនេះ សាលាដំបូងរាជធានីភ្នំពេញ បានប្រកាសសាល ក្រមផ្តន្ទាទោស លោក ស៊ាង ចែត ដាក់ពន្ធនាគាររយៈពេល៥ឆ្នាំ ពីបទសូកប៉ាន់សាក្សី តាម មាត្រា៥៤៨នៃក្រមព្រហ្មទណ្ឌ៕

• ព្រះមហាក្សត្រ
• សម រង្ស៊ី
• ស៊ាង ចែត
• តុលាការ