រាជធានីភ្នំពេញ៖ នៅវេលាព្រឹកថ្ងៃទី២៨ ខែតុលា ឆ្នាំ២០១៦នេះ ក្រុមអតីតអ្នកបើកបររថយន្តរបស់ក្រុមហ៊ុនកាពីតូលចំនួន១២នាក់ បានមកប្រមូលផ្តុំគ្នាលើកប៉ាដ៉ានិងដាក់មេក្រូស្រែកតវ៉ាទៅមុខទីតាំងក្រុមហ៊ុន ផ្ទះលេខ១២ ផ្លូវ១៨២ សង្កាត់បឹងព្រលឹត ខណ្ឌ៧មករា រាជធានីភ្នំពេញ ដើម្បីទាមទារ អោយក្រុមហ៊ុនទទួលយកបុគ្គលិកចំនួន៤៥នាក់ ដែលត្រូវបានបញ្ឈប់កាលពីពេលកន្លងទៅអោយចូលធ្វើការវិញធម្មតា ។

ការប្រមូលផ្តុំតវ៉ាខាងលើនេះដឹកនាំដោយអតីតអ្នកបរឈ្មោះអៀង គឹមហ៊ុន ។ សូមបញ្ជាក់ថា បាតុភាពតវ៉ាបែបនេះគឺតែងតែកើតឡើងជារឿយកន្លងមកហើយបន្ទាប់ពីបុគ្គលិកនិងតៃកុងរថយន្តមួយចំនួនធំត្រូវបានក្រុមហ៊ុនសម្រេចបញ្ឈប់ការងារ ។

យ៉ាងណាមិញក្នុងការតវ៉ានាព្រឹកនេះ គេសង្គេតឃើញមានកម្លាំងសមត្ថកិច្ចមួយចំនួនត្រៀមនៅទីតាំងខាងលើ ក្រែងកើតមានបាតុភាពហិង្សាឬភាពអាណាធិបតេយ្យណាមួយដោយយថាហេតុ ។

ប្រជាពលរដ្ឋនិងអ្នកដែលបានឃើញហេតុការណ៍បាននិយាយពីមាត់មួយទៅកាន់មាត់មួយស្នើរអោយមន្ទីរនិងក្រសួងពាក់ព័ន្ធធ្វើយ៉ាងណាមេត្តាធ្វើការសម្របសម្រួលភាគីទាំង២តាមដំណោះស្រាយល្អណាមួយដើម្បីបញ្ចប់បាតុភាពខាងលើ៕

• អតីត
• រថយន្ត
• កាពីតូល
• បញ្ឈប់