ខេត្តកណ្តាល៖   នគរបាលសេដ្ឋកិច្ចនិងតុលាការកាលពីថ្ងៃទី៩ធ្នូឆ្នាំ២០១៦ចុះឆែកឆេរផ្ទះលក់ភេសជ្ជៈគ្រប់មុខ យីហោ ប៉ូឡូរកឃើញបារី៥៥៥ក្លែងក្លាយចំនួន៣៦សុង និង០៦កញ្ចប់ រួចអប់រំអោយធ្វើកិច្ចសន្យាបញ្ឈប់ការលក់ដូរទំនិញក្លែងក្លាយ។

លោកឧត្តមសេនីយ៍ត្រី ឈឿន សុចិត្ត ស្នងការរងទទួលផែនប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តកណ្តាល បានអោយដឹងថា ប្រតិបត្តិការណ៍នេះ គឺធ្វើឡើងតាមដិកាបង្គាប់អោយឆែកឆេរ របស់ប្រធានសាលាដំបូងខេត្ត លេខ១៥០២(ដ ក ឆ ឆ)ចុះថ្ងៃទី៩ធ្នូ២០១៦ ក្រោយពីទទួលពាក្យបណ្តឹងរបស់ក្រុមហ៊ុនថ្នាំជក់British American Tobacco ។

លោកស្នងការរង បានបញ្ជាក់ថា ជនសង្ស័យ២នាក់ប្តីប្រពន្ធ័ជាម្ចាស់ផ្ទះ រួមមាន ឈ្មោះ ថុង ប៊ុនថន ភេទប្រុស អាយុ៤៦ឆ្នាំនិងប្រពន្ធ័ឈ្មោះ សុខ ហួរ អាយុ៤៤ឆ្នាំ មានរបរលក់ដូរ រស់នៅផ្ទះកើតហេតុខាងលើ។

លោក ឧត្តមសេនីយន៍ បានប្រាប់អោយដឹងទៀតថា ដោយទទួលបានបទបញ្ជាពីឯកឧត្តម ឧត្តមសេនីយ៍ទោ អ៊ាវ ចំរើន ស្នងការនគរបាលខេត្ត និងមានការដឹកនាំសម្របសម្រួលនីតិវិធីពីលោក សេង រិទ្ធី ព្រះរាជអាជ្ញារង អមសាលាដំបូងខេត្តកណ្តាល កម្លាំងការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តកណ្តាល និងមានការចូលរួមពីលោកមេធាវី ចាប កែវ តំណាងឲ្យក្រុមហ៊ុន BAT (ម្ចាស់ដើមបណ្តឹង) កម្លាំងចំរុះចុះធ្វើការត្រួតពិនិត្យឆែកឆេរទីតាំងខាងលើ ចាប់យកបារី៥៥៥ក្លែងក្លាយ ដូចខាងលើ ។

សមត្ថកិច្ចបានរកឃើញជនសង្ស័យ រួមជាមួយវត្ថុតាង នាំមកកាន់ការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តកណ្តាល ដើម្បីសាកសួរបន្ត និងចាត់ការតាមនីតិវិធីច្បាប់។ក្រោយសារសួរដោយម្ចាស់ផ្ទះខាងលើ បានសហការណ៍ល្អជាមួយសមត្ថកិច្ច និងយល់ថា បានទិញពីម៉ូយដែលធ្លាប់យកមកលក់អោយ មិនដឹងថាជាផលិតផលក្លែងក្លាយ និងជាជនរងគ្រោះដែរនោះ សមត្ថកិច្ចគ្រាន់តែរឹបអូសវត្ថុតាងបារី៥៥៥ចំនួន៣៦សុង និ០៦កញ្ចប់ ព្រមទាំងអោយធ្វើកិច្ចសន្យាបញ្ឈប់តែប៉ុណ្ណោះ៕                                      

• នគរបាល
• អាជីវករ
• សេដ្ឋកិច្ច