ក្រុងបាត់ដំបង៖ ករណីគ្រោះថ្នាក់ចរាចរណ៍នៅវេលាម៉ោង ១០:៣០ នាទី ថ្ងៃទី០៥ ខែមិថុនា ឆ្នាំ២០១៧ នៅតាមបណ្តោយផ្លូវជាតិលេខ ០៥ ត្រង់ចំណុចផ្លូវបំបែកប្រសព្វចូលតាំងណាំសែរ ស្ថិតក្នុងភូមិអូរចារ សង្កាត់អូរចារ ក្រុងបាត់ដំបង ខេត្តបាត់ដំបង ។

មានករណី គ្រោះថ្នាក់ចរាចរណ៍ មួយកើតឡើងបង្កដោយរថយន្ត១គ្រឿងម៉ាក ISUZU ពណ៌ស ពាក់ស្លាកលេខ បាត់ដំបង 3A-1118 អ្នកបើកបរ មានឈ្មោះ ធឿត សម័យ ភេទប្រុស អាយុ ៣៥ ឆ្នាំ មុខរបរ បើកបរឡានមានទីលំនៅភូមិតាព្រួច សង្កាត់ក្តុលដូនទាវ ក្រុងបាត់ដំបង ខេត្តបាត់ដំបង ធ្វើដំណើរបញ្ច្រាស់ទិសគ្នាពីត្បួងទៅជើង រហូតដល់ចំណុចខាងលើក៏ជ្រុលចង្កូតបុកប៉ះម៉ូតូ១គ្រឿងទៀតម៉ាកវីវ៉ា សូហ្គុន ពណ៌ទឹកប៊ិចស៊េរីឆ្នាំ ២០០៤ គ្មានស្លាកលេខ អ្នកបើកបរមិនស្គាល់សាវតា (ស្លាប់) ។

ជនសង្ស័យដែលជាអ្នកបើកបររថយន្តខាងលើ ត្រូវបានកម្លាំងការិយាល័យបទល្មើសព្រហ្មទណ្ឌ កងរាជអាវុធហត្ថខេត្តបាត់ដំបងបានធ្វើការបង្ក្រាបចាប់ខ្លួនភ្លាមៗនៅកន្លែងកើតហេតុ និងកំពុងត្រូវបានឃាត់នៅការិយាល័យផងដែរ ។ចំណែករថយន្តនិងម៉ូតូត្រូវបានកម្លាំងនគរបាលចរាចរណ៍ផ្លូវគោកយកទៅរក្សាទុកចាត់ការតាមនិតិវិធី ។                       

• គ្រោះថ្នាក់
• រថយន្ត
• ស្លាប់