រាជធានីភ្នំពេញ៖ តារាចម្រៀងយូរឆ្នាំនៅតែជាប់ឈ្មោះជាមួយតារាចម្រៀងរបស់មហាជនដដែល។ដោយសារតែយល់ថាខ្លួននៅមានការគាំទ្រខ្លាំងពីសំណាក់បងប្អូនលោកសាន ផានិតបានរៀបចំយុទ្ឋវិធីថ្មីដោយយកបទដែលធ្លាប់ល្បីរបស់ខ្លួនមកប្រែសម្រួលឡើងវិញទាញទីផ្សារម្តងទៀតជាមួយជំនឿខ្ពស់នៃការចាប់អារម្មណ៍។
ចម្រៀងលោក សាន ផានិត ត្រៀមនឹងបទចម្រៀងល្បីក្នុងទសវត្ស ៩០គឺបទ "ទូរសព្ទប្រាប់ផង" មកច្រៀងឡើងវិញជាថ្មីម្ដងទៀត។ ការយកបទនេះមកច្រៀងជាថ្មីបន្ទាប់ពីបទ "ជាប់រវល់" ដែលជាបទចាស់ និងច្រៀងឡើងវិញទទួលបានការចាប់អារម្មណ៍ជាខ្លាំងពីទស្សនិកជន ហើយការធ្វើដូចននេះខណៈទីផ្សារចម្រៀងរបស់លោកកំពុងទទួលបានការគាំទ្រច្រើនឡើងវិញ។
លោកបានបញ្ជាក់ថា "នេះជាការស្នើសុំរបស់អ្នកគាំទ្រខ្ញុំចំពោះបទចម្រៀងនេះ ហើយបទល្បីក្នុងទសវត្សទី៩០ហ្នឹង នឹងចេញជា MV ក្នុងពេលឆាប់"។
តារាចម្រៀងរូបនេះ បានបង្ហាញក្ដីសប្បាយរីករាយនៅពេលទីផ្សារចម្រៀងទទួលការចាប់អារម្មណ៍ឡើងវិញ ទាំងមិននឹកស្មានដល់។ ជាពិសេសបទដែលលោកយកមកច្រៀង និងធ្វើឡើងវិញដូចជាបទ "ជាប់រវល់” ជាដើម។
ទន្ទឹមនឹងការសបប្បាយរីករាយនឹងទីផ្សារចម្រៀងត្រឡប់មកវិញ តារាចម្រៀងធ្លាប់សាងឈ្មោះល្បីលោក សាន ផានិត កំពុងរៀបចំចម្រៀងថ្មីៗជាច្រើនទៀត ដែលលោកជឿជាក់ថា នឹងទទួលបានការចាប់អារម្មណ៍ពីទស្សនិកជនគ្រប់ស្រទាប់វណ្ណៈ។ ក្នុងនោះមានដូចជា "ភ្លេងការ" និងបទ "ទូរសព្ទប្រាប់ផង" ដែលលោកយកមកច្រៀងឡើងវិញដូចគ្នា។
លោក សាន ផានិត បន្តថា ក្រៅតែពីបទចម្រៀងទាំង២បទនេះ ដែលត្រៀមចេញលក់លើទីផ្សារក្នុងពេលដ៏ខ្លីខាងមុខ លោកកំពុងតែត្រៀមរៀបចំស្ទិលថ្មីជាច្រើនទៀតក្នុងន័យវាយលុកទីផ្សារចម្រៀងនាពេលខាងមុខ។
តារាចម្រៀងលោក សាន ផានិត គឺជាអតីតតារាចម្រៀងល្បីឈ្មោះក្នុងអំឡុងទសវត្ស៩០ ដែលបទចម្រៀងជាច្រើនរបស់លោកទទួលបានការចាប់អារម្មណ៍ពីអ្នកគាំទ្រទាំងទីក្រុង និងជនបទ តួយ៉ាងដូចជាបទ ជាប់រវល់ និងបទ ទូរសព្ទប្រាប់ផង ដែលលោកយកមកច្រៀងឡើងវិញនាពេលបច្ចុប្បន្ន។ យ៉ាងណាក៏ការស្ងប់ស្ងាត់ទីផ្សារចម្រៀងជិត ២០ឆ្នាំកន្លងមក តារាចម្រៀងរូបនេះប្រកាសវិលត្រឡប់មកវិញ ដោយលោកនៅតែគិតថាទីផ្សារចម្រៀងនៅតែមានភាពដូចដើមវិញ៕