រាជធានីភ្នំពេញ៖  រថយន្តយក្ស២គ្រឿងមួយគ្រឿងជារថយន្តស្ទូចនិងមួយគ្រឿងជារថយន្តដឹកដី បានបើកលឿនគៀរគ្នាបណ្តាលអោយរថយន្តមួយគ្រឿងជ្រុលចង្កូតរេទៅបុកម៉ូតូមួយគ្រឿងបណ្តាលអោយបុរសម្នាក់រងរបួសធ្ងន់ហើយរថយន្តនៅមិនទាន់អស់ល្បឿនជ្រុលបុកធ្លាយចូលផ្ទះពលរដ្ឋបណ្តាលអោយធ្លាយជញ្ចាំងចូលទៅក្នុងប៉ះរថយន្តកូរ៉េឡាមួយគ្រឿងរងការខូចខាតផងដែរ។ ហេតុការណ៍គ្រោះថ្នាក់នេះកើតឡើងកាលពីវេលាម៉ោង៨ និង ០០នាទីព្រឹកថ្ងៃទី ១៥ ឧសភា ២០១៧ ស្ថិតតាមបណ្តោយផ្លូវបឹងតាមាត ក្នុងភូមិសំបួរ សង្កាត់ដង្កោរ ខណ្ឌដង្កោរ ។

ប្រភពព័ត៌មានអោយដឹងថា នៅមុនពេលកើតហេតុគេសង្គេតឃើញរថយន្តធុនធំ២គ្រឿង មួយគ្រឿងជារថយន្តស្ទូចនិងមួយគ្រឿងជារថយន្តដឹកដី បានបើកលឿនវ៉ា និងគៀរគ្នាតាមបណ្តោយផ្លូវខាងលើយ៉ាងលឿន លុះមកដល់ចំណុចកើតហេតុផ្លូវប្រសព្វ៤ រថយន្តស្ទូចក៏បានរេចង្កូតមកម្ខាងផ្លូវបុកចំម៉ូតូ ស៊ុយស៊ីគីនិចមួយគ្រឿងបណ្តាលអោយបុរសម្នាក់ត្រូវរងរបួស រួចរថយន្តមិនទាន់អស់ល្បឿន ក៏បានបុកជញ្ចាំដែកផ្ទះពលរដ្ឋធ្លាយចូលទៅខាងក្នុងទាំងកំរោល បុកនឹងរថយន្តកូរ៉ូឡាមួយគ្រៀងនៅខាងក្នុងបណ្តាលអោយរងការខូចខាតទាំងរថយន្តបង្កជញ្ចាំង និងរថយន្តដែលនៅក្នុងផ្ទះ ។

ក្រោយកើតហេតុសមត្ថកិច្ចចុះអន្តរាគមន៍វាស់វែងអូសយករថយន្តទាំងបង្ក និងរងគ្រោះទាំង៣គ្រឿងរួមទាំងម៉ូតូជនរងគ្រោះ ទៅរក្សាទុកនៅអធិការដ្ឋាននគរបាលខណ្ឌដង្កោរដើម្បីបន្តនីវិធី ៕

• រថយន្ត
• បុកធ្លាយ
• ពលរដ្ឋ