រាជធានីភ្នំពេញ៖ លោកស្រី Lee Myung-Ja អភិបាលរងក្រុង Guwangju ដែលដឹកនាំក្រុមប៉ារ៉ាកូរ៉េមកកម្ពុជាដើម្បីបណ្តុះបណ្តាលកីឡាករកម្ពុជានោះ បានធ្វើការកោតសរសើរចំពោះអត្តពលិកពិការដែលមាន ភាពអត់ធ្មត់និងការតស៊ូតព្យាយាម រៀនសូត្ររយៈពេល៦ថ្ងៃ។
អភិបាលរងក្រុង Guwangju រូបនេះបានថ្លែងក្នុងបិទវគ្គបុណ្តុះបណ្តាល “ Korea-Cambodia Para Sports Camp” កាលពីល្ងាចថ្ងៃទី៣១ ខែមីនា ឆ្នាំ២០១៧ក្នុងវិមានពហុកីឡដ្ឋាជាតិថា ក្រោយពីសិក្សាអស់រយៈពេលជាច្រើនថ្ងៃមក លោកស្រីសង្កេតឃើញ អត្តពលិកប៉ារ៉ាកម្ពុជា មានសមត្ថភាពខ្លាំង ហើយជាពិសេសមានអត់ធ្មត់ និង ព្យាយាម ចងចាំនូវបង្ហាត់បង្រៀនពីគ្រូជំនាញ។
លោកស្រីក៏សំណូមពរផងដែរថា អត្តពលិកប៉ារ៉ាកម្ពុជា ទាំងអស់ត្រូវតែព្យាយាមហ្វឹកហាត់បន្ថែមទៀត ដើម្បីដណ្ដើមមេដាយសម្រាប់ការប្រកួតកីឡាអាស៊ានប៉ារ៉ាហ្គេមលើកទី៩នៅប្រទេស ម៉ាឡេស៊ីនាពេលខាងមុខនេះ។
លោក យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជាបានឲ្យដឹងថាវគ្គនេះមានអត្ត ពលិកចូលរួមចំនួន៧៤រូបមន្ត្រីគណៈកម្មាធិការជាតិប៉ារ៉ាឡាំពិកកម្ពុជា ចំនួន៤៩ រូបក្រោមការបង្ហាត់បង្រៀនពីសំណាក់គ្រូឯកទេសមកពីកូរេចំនួន៨០រូប ។ វគ្គនេះឧបត្ថម្ភដោយគណៈកម្មាធិការជាតិប៉ារ៉ាឡាំពិកសាធារណរដ្ឋកូរេពិសេសខេត្តGuangjudy ចំណាយថវិកាអស់ចំនួន២០ម៉ឺន ដុល្លារសហរដ្ឋអាមេរិក ។ កីឡាទាំង ៨ប្រភេទនោះមាន បាញ់ធ្នូ បាញ់កាំភ្លើង ហែលទឹក អត្តពលកម្ម Boccia កីឡា វាយកូនឃ្លីលើតុ បាល់ទះអង្គុយ និង ប៊ូលីង ។
អគ្គលេខាធិការរូបនេះបានបញ្ជាក់ថា វគ្គបណ្ដុះបណ្ដាលកីឡាជនពិការចំនួន៨ប្រភេទកីឡាដែលចាប់ផ្ដើមពីថ្ងៃទី២៦មកនោះបានបញ្ចប់ ហើយនៅល្ងាចថ្ងៃទី៣១មីនា ។វគ្គបណ្ដុះបណ្ដាលនេះត្រូវបានគេប្រសិទ្ធិនាមថា Korea-Cambodia Para Sports Camp ។ វគ្គនេះ ត្រូវបានប៉ារ៉ាឡាំពិកសាធារណរដ្ឋកូរេបានផ្ដល់ដល់ប៉ារ៉ាឡាំពិកកម្ពុជានូវសម្ភារៈកីឡា ព្រមទាំងសម្ភារៈសម្រាប់ហ្វឹកហាត់មួយចំនួនផង៕ ដោយ បូរិន