រាជធានីភ្នំពេញ៖  ក្នុងថ្ងៃតែមួយទី០៤ ខែមេសា ឆ្នាំ២០១៧ សម្ដេចអគ្គ មហាសេបតីតេជោហ៊ុន សែននាយករដ្ឋមន្ត្រីព្រះរាជាណាចក្រកម្ពុជានឹងជួបអត្តពលិក៣,២០០នាក់ ក្នុងពិធីបាយសាមគ្គីនៃមហាគ្រួសារកីឡា នៅអាគារកោះពេជ្រ ពេលល្ងាច និង ពេលព្រឹក ដាក់ សម្ពោធ អាគារស្នាក់នៅ និង ទីលានកីឡាក្នុង ពហុកីឡាដ្ឋាន មរតកតេជោ ចំនួន៤ កន្លែង ដែលសាងរួចរាល់នៃដំណាក់កាលទី១ ។

លោកបណ្ឌិត ថោង ខុន រដ្ឋមន្ត្រី ក្រសួងទេសចរណ៍ និង ជាប្រធានគណៈកម្មាធិការជាតិអូឡាំពិកកម្ពុជា និង លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានដឹកនាំ បណ្ដាលសហព័ន្ធកីឡាជាតិទាំងអស់ កាលពីព្រឹកថ្ងៃទី៣១ ខែមីនា ឆ្នំា២០១៧ មកទស្សនា កីឡាដ្ឋានមរតកតេជោ ដែលបានសាងសង់រួចរាល់ នៅដំណាក់កាលទី១ នៃពហុកីឡដ្ឋានដ៏ធំលើផ្ទៃដីប្រមាណ ៨៣ហិចតា ស្ថិតក្នុងសង្កាត់ព្រែកតាសេក ខណ្ឌឫស្សីកែវ ដែលគ្រោងនឹង ដាក់សម្ភោធឱ្យ ប្រើប្រាស់ នាថ្ងៃទី៤ ខែ មិនា ខាងមុខនេះ។

លោកបណ្ឌិត ថោង ខុន  បានបញ្ជាក់ថា សមិទ្ធផលគ្រោងសម្ពោធដាក់ឲ្យប្រើប្រាស់មុនគេ រួមមានមជ្ឈមណ្ឌលអាងហែលទឹក, មជ្ឈមណ្ឌលកីឡាក្នុងសាល, ទីលានបាល់បោះ, ទីលានបាល់ទះ និងអគារស្នាក់នៅរបស់អត្តពលិក។

ប្រធានគណៈកម្មាធិការជាតិអូឡាំពិកកម្ពុជា បានថ្លែងថា ជាមួយគ្នានោះ សម្ដេចតេជោ ហ៊ុន សែន ក៏មានកម្មវិធីសំខាន់ចំនួន ២ចំណុចផ្សេងទៀតដែរ ពោលគឺការរៀបចំពិធីបុកគ្រឹះសាងសង់ពហុកីឡដ្ឋានមរតកតេជោ ដំណាក់កាលទី២ ផ្ដោតលើកីឡដ្ឋានបាល់ទាត់ និងមួយទៀត គឺការទទួលទានអាហារជួបជុំជាមួយមហាគ្រួសារកីឡាកម្ពុជា ៕ ដោយ បូរិន

• ហ៊ុន សែន
• អត្តពលិក
• ហុកីឡាដ្ឋាន