រាជធានីភ្នំពេញ៖ កីឡាករកាយសម្ព័ន្ធលោកសំ រីម នឹងចេញទៅហ្វឹកហាត់នៅប្រទេសចិន រយៈពេលមួយខែដើម្បីត្រៀមទៅប្រកួត SEA GAME 2017 នៅម៉ាឡេស៊ីខាងមុខនេះ។
លោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធ បានបញ្ជាក់ថា កីឡាករ សំ រីម នឹងទទួលបានការហ្វឹកហាត់ នៅទីក្រុង Shantou ខេត្តGuangdong ជាមួយគ្រូរបស់ចិន និង កីឡាករចិននៅទីនោះ ។សម្រាប់ការហ្វឹកហាត់នេះទទួលបានជួយឧបត្ថម្ភរបស់លោក Gordon Taing ដែលជាអនុប្រធានគណៈកម្មាធិការជាតិអូឡាំពិកកម្ពុជា និង ក្រោមការជួយឧបត្ថម្ភពីក្រសួងអប់រំយុវជន និង កីឡា ។
អគ្គលេខារូបនេះ បានប្រាប់ថា លោកនឹងជូនដំណើរកីឡាកររូបនេះទៅដល់ចិនហើយត្រឡប់មកវិញ។ ការដែលលោកជូនដំណើរលើកនេះព្រោះ លោកចង់មើលពីបច្ចេកទេសរបស់កីឡាករចិន និង មើលកន្លែងហ្វឹកហាត់នៅទីនោះ ។ ឆ្នាំ២០១៨ សហព័ន្ធកីឡាកាយសម្ព័ន្ធកម្ពុជា នឹងមានគម្រោងអញ្ជើញគ្រូចិនមកជួយបង្ហាត់នៅស្រុកខ្មែរ ជាល្អប្រើសជាងការបញ្ជូនកីឡាករទៅហាត់នៅចិន ខណៈទាំងកីឡាករនិងក្មេងៗមានភារៈកិច្ចសិក្សាដែលគេមិនអាចចេញទៅហាត់ចោលការរៀនសូត្របានឡើយ។ ចិន បានគេយល់ព្រមតាមសំណើររបស់កម្ពុជាហើយ នៅតែការសម្រេចចុងក្រោយបន្ទាប់មានការប្រជុំសមាជិកកណៈកម្មាធិការប្រតិបត្តិរបស់សហព័ន្ធ ។
សូមបញ្ជាក់ថា កីឡាករ សំ រីម មានអាយុ២២ឆ្នាំ ជាកីឡាករលេចធ្លោជាងគេក្នុង កីឡាកាយសម្ព័ន្ធArtistic ហើយ ធ្លាប់បានហ្វឹកហាត់នៅប្រទេសជប៉ុន និង ធ្លាប់ចូលរួមប្រកួតជាលក្ខណៈអន្តរជាតិជាច្រើនលើកផងដែរ៕ដោយ បូរិន