រាជធានីភ្នំពេញ៖  តារាចម្រៀងឈិត សុវណ្ណបញ្ញាដែលលាឈប់ពីហង្សមាសងាកមកស្រវាការងារជាតារាចម្រៀងប្រចាំផលិតកម្មថោនសើមៗនេះហាក់សម្រេចគោលដៅលេចធ្លោសមតាមចិត្តប្រថ្នាព្រោះទៅដល់ទីនោះភ្លាមចេញបទចម្រៀងភ្លែតលែងស្កកដូចមុន។លើសពីនេះនាងថែមទាំងបានត្រូវផលិតកម្មថោនបើកមុខឲ្យឈិត សុវណ្ណបញ្ញាចាប់ឱកាសថតខ្សែភាពយន្តភាគប្រចាំស្ថានីយ៍ទូរទស្សន៍មួយទៀតផងកាលពីពេលថ្មីៗ។

សម្រាប់ឱកាសថតខ្សែភាពយន្តរបស់តារាចម្រៀងឈិត សុវណ្ណបញ្ញានេះជាលើកទី២ហើយដោយរឿងដំបូងនាងគ្រងតំណែងតួឯកស្រីក្នុងខ្សែរឿង«ទេសចរណ៍ឋាននរក»ជាខ្សែភាពយន្តដុំដាក់បញ្ចាំងនៅតាមបណ្តារោងកុននានានៃក្រុងភ្នំពេញ។ដោយឡែកកាលពីពេលថ្មីៗនេះឈិត សុវណ្ណបញ្ញាបានក្រុងពលីគ្រងតំណែងជាតួឯកស្រីជាមួយតារាប្រុសកំពុងពេញនិយមទីផ្សារសម្តែងលោកខាត់ វៃហាំងដោយចាប់ដៃគូគ្នាសម្តែងក្នុងរឿង«ពន្លកស្នេហ៍យុវវ័យ»ដែលនឹងចាក់បញ្ចាំងក្នុងស្ថានីយ៍ទូរទស្សន៍ប៉ុស្តី៍លេខ៨នាពេលខាងមុខ។នេះជាប្រភេទខ្សែភាពយន្តភាគលើកទី១ហើយដែលតារាចម្រៀងឈិត សុវណ្ណបញ្ញាក្រសោបបានបើទោះជានាងមានបទពិសោធន៍សម្តែងក្នុងពេលថតជាបទចម្រៀងបែបខារ៉ាអូខេអស់ជាច្រើនឈុតឆាកបែបណាក៍ដោយ។

តារាចម្រៀងដែលដុះពន្លឺក្នុងនាមជាតារាចម្រៀងសារជាថ្មីឈិត សុវណ្ណបញ្ញាបានឲ្យដឹងថានេះជាលើកទី២ហើយដែលនាងបានសម្តែងបែបលក្ខណៈខ្សែភាពយន្តដោយរឿងដំបូងជាជាដុំមានចំណងជើងថា«ទេសចរណ៍ឋាននរក»ដោយឡែកស្នាដៃទី២ជារឿងភាគដែលនាងពុំធ្លាប់សម្តែងពីមុនមកនោះទេពោលដូចរឿងដំបូងក្នុងការសម្តែងដែរ។តួឯកស្រីរូបនេះបន្តទៀតថារឿង«ពន្លកស្នេហ៍យុវវ័យ»នាងសម្តែងជានិស្សិតដែលមានចំណូលចិត្តជាអ្នកចម្រៀងហើយមើលទៅត្រូវនិងអាជីពច្រៀងរបស់នាងច្រើនទើបមិនគិតថាភ័យអ្វីច្រើនក្នុងការថត។នាងទទួលស្គាល់ថាការសម្តែងវាមិនមានលក្ខណៈងាយស្រួលនោះឡើយពិសេសការសម្តែងបែបលក្ខណៈជាខ្សែភាពយន្តរិតតែតម្រូវឲ្យយើងលេងទឹកមុខជាច្រើនទៅតាមឈុតឆាកសម្តែងបូករួមទាំងការចងចាំបារ៉ូលក្នុងសាច់រឿងឲ្យបានល្អទើបយើងមើលទៅសម្តែងបែបធម្មជាតិច្រើន។យ៉ាងណាមិញនាងមានតែការខិតខំធ្វើយ៉ាងណាឲ្យបានល្អព្រោះនេះជាបទពិសោធន៍ថ្មីមួយទៀតដ្បិតតែនាងមានភាពជោគជាំជាមួយការសម្តែងអស់ជាច្រើនលើកក៍ដោយតែភាគច្រើនជាការថតបែបខារ៉ាអូខេតែប៉ុណ្ណោះ។អ៊ីចឹងហើយមានតែការលើកទឹកចិត្តពីសំណាក់បងប្អូនទាំងអស់ជាបន្តទៀតដើម្បីឲ្យនាងមានកម្លាំងចិត្តធ្វើយ៉ាងណាឲ្យសម្រេចដល់គោលដៅ។ជាពិសេសសូមកុំភ្លេចជួយជាវនិងស្តាប់ចម្រៀងថ្មីៗរបស់នាងនៅកក្នុងផលិតកម្មថោនដោយនាងមាន៦បទរួចហើយទើបចេញដោយមានបទម្នាក់ឯងនិងបទចាប់ដៃគូជាមួយអ្នកនាងយក់ឋិតរដ្ឋាព្រមទាំងចាប់ដៃគូជាមួយលោកសុគន្ឋ ថេរ៉ាយុផងដែរ។                            

• ឈិត សុវណ្ណបញ្ញា
• តារាចម្រៀង