រាជធានីភ្នំពេញ៖ ​តាមការគ្រោងទុកកំពូលតារាថៃនាំមុខក្នុងការសម្តែងលោកជេមពិតជាបានបង្ហាញវត្តមានក្នុងការសម្តែងរបស់ខ្លួនសាជាថ្មីជូនដល់អ្នកគាំទ្ររបស់លោកទាក់ទិននិងព្រឹត្តិការណ៍ប្រគំតន្ត្រី។ក្នុងការបង្ហាញវត្តមានផ្លូវការតារាមានមន្តស្នេហ៍ខាងស្អាតនិងស្រស់សង្ហារបានបញ្ចេញស្នាដៃសម្តែងរួមគ្នាជាមួយក្រុមចម្រៀង«ក្មេងខ្មែរ»គ្រាដែលតារាថៃរូបនេះច្រៀងនូវបទចម្រៀងជាភាសាខ្មែរដែលមានប្រភេទបទពេញនិយមក្រោមចំណងជើងថា«បុណ្យភូមិ»ឡើងកក្រើកឆាកអ្នកមើលនាំគ្នារាំយ៉ាងរីករាយ។

ការសម្តែងរបស់តារាល្បីល្បាញរបស់ប្រទេសថៃលោកJames JIនារាត្រីថ្ងៃទី២៥ កុម្ភៈ ឆ្នាំ២០១៧នៅសាលមហោស្រពកោះពេជ្រក្រោមការរៀបចំរបស់ស្ថានីយ៍ទូរទស្សន៍នោះហាក់បានបង្កប់ដោយការបង្ហាញវប្បធម៌ស្និតស្នាលរួមគ្នារបស់អ្នករៀបចំកម្មវិធីដោយមិនត្រឹមតែតារាថៃជាតួអង្គសំខាន់នោះទេតែក៍បានរំលេចឡើងពីការលើកយកនូវទម្រង់សិល្បៈខ្មែរមួយចំនួនមកសម្តែងចែកជូនយុវវ័យដែលមកយ៉ាងណែនពេញមុខឆាកឲ្យប្លែកអារម្មណ៍ផងដែរ។

មហាជនមួយចំនួនប្រហែលជាគិតថាលោកជេមមកសម្តែងនៅលើវេទិកាដ៍ធំរបស់ឆាកមហោស្រពកោះពេជ្រសុទ្ឋតែមានទម្រង់ជាសិល្បៈរបស់ប្រទេសថៃពិសេសចម្រៀងកន្ត្រាក់អារម្មណ៍របស់ប្រទេសថៃដែលយុវវ័យជាច្រើនបានគិតទុកជាមុន។យ៉ាងណាមិញបើទោះជាមានបទចម្រៀងញាក់កន្ត្រាក់អារម្មណ៍ច្រៀងដោយលោកជេមបុរសសង្ហារមានមន្តស្នេហ៍របស់អ្នកគាំទ្រនោះស្រាប់តែមានការលើកយកនូវបចម្រៀងមួយចំនួនពេញនិយមរបស់ប្រទេសកម្ពុជាមកសម្តែងបញ្ចូលគ្នាគួរឲ្យទាក់ទាញញាំងកម្មវិធីរិតតែសប្បាយនិងភ្ញាក់ផ្អើលបំផុតរបស់យុវវ័យដែលមកទស្សនា។នាឱកាសនោះលោកជេមច្រៀងភាសាជាតិខ្លួនបានប៉ុន្មានបទក៍មានចម្រៀងខ្មែររបស់ក្រុម«ក្មេងខ្មែរ»គឺបទ«បុណ្យភូមិ»សម្តែងលើឆាកហើយតារាចម្រៀងទាំងលោកជេមនិងខាងកម្ពុជាច្រៀងជាភាសាជាតិខ្មែរជូនអ្នកគាំទ្រស្តាប់ឡើងកញ្ជោ្រលពេញឆាកដោយមិនដឹងថាជេមគេអាចច្រៀងជាភាសាខ្មែរនូវបទល្បី«បុណ្យភូមិ»បានបែបនេះឡើយ។ក្រៅពីច្រៀងជាភាសាខ្មែរក៍មានការលេងហ្គេមជាមួយប្រិយមិត្តការបង្ហាញសំណួរសួរពីរឿងរ៉ាវដែលលោកជេមថតខ្សែភាពយន្តដោយតារារូបនេះបានសម្តែងចំនួន៥រឿងមកហើយដោយភាគច្រើនបណ្តារឿងមួយចំនួនលោកថតតាំងពី៥ឆ្នាំមុន។បន្ថែមពីលើនេះមានការបង្ហាញសាច់រឿងខ្លះៗនៅក្រៅឆាកសម្តែងដោយលោកជេមបានបង្ហាញក្នុងនោះមានបទចម្រៀងមួយចំនួនដែលលោកជេមច្រៀងបញ្ចូលក្នុងខ្សែភាពយន្តដែលលោកបានសម្តែងក្នុងនោះផងដែរ។

នេះជាលើកទី២ហើយដែលោកជេមមកសម្តែងនៅកម្ពុជាក្រោមការរៀបចំរបស់ស្ថានីយ៍ទូរទស្សន៍ភីអិនអិនដោយលោកជេមមកលើកទី២នេះសម្តែងក្នុងព្រឹត្តិការណ៍តន្ត្រីឈ្មោះថា«JAMES JI 2017 Fan Meeting Phnom Penh»។កំពូលតារាថៃរូបនេះបានសម្រេចចិត្តបើកការសម្តែងតាមរយៈតន្ត្រីរបស់លោកនៅអាស៊ីដោយជម្រើសទី១លោកជ្រើសរើសកម្ពុជាមុនគេរួចបន្តដំណើរទៅថៃ វៀតណាម មីយ៉ាន់ម៉ានិងប្រទេសឡាវផងដែរ។យ៉ាងណាលោកក៍នៅមានគម្រោងបន្តដំណើរមកជួបប្រិយមិត្តកម្ពុជាជាបន្តបន្ទាប់ទៀតគ្រាដែលលោកហាក់មានភាគកក់ក្តៅក្រោយពីដឹងថាយុវវ័យនិងប្រជាជនកម្ពុជាជាច្រើនពេញចិត្តនិងឲ្យតម្លៃចំពោះទេពកោសល្យសម្តែងរបស់លោក។                

• JAMES JI
• ក្មេងខ្មែរ
• តន្ត្រី